Hum se Hassan Bin Abi Abbad ne bayan kiya ' kaha hum se Hammam ne bayan kiya Qatadah se aur un se Anas (Radi Allahu Anhu) ne ke ek Yahoodi ne ek (Ansari) larki ka sar do pattharon ke darmiyan mein rakh kar kachal diya tha. Larki se poocha gaya ke tumhara sar is tarah kis ne kiya hai? Kya falan shakhs ne kiya? Falan ne kiya? Aakhir Yahoodi ka bhi naam liya gaya (jis ne us ka sar kachal diya tha) to larki ne sar ke ishaare se haan mein jawab diya. Phir wo Yahoodi bulaya gaya aur aakhir us ne bhi iqrar kar liya aur Nabi Kareem (Sallallahu Alaihi Wasallam) ke hukm se us ka bhi patthar se sar kachal diya gaya
.

Hum se Muhammad Bin Yusuf Faryabi ne bayan kiya Warqa se ' unhon ne Ibn Abi Najeeh se ' un se Ata ne aur un se Ibn Abbas (Radi Allahu Anhuma) ne bayan kiya ke shuru Islam mein (miras ka) maal aulad ko milta tha aur walidain ke liye wasiyat zaroori thi lekin Allah Ta'ala ne jis tarah chaha is hukm ko mansookh kar diya phir larke ka hissa do larkiyon ke barabar qarar diya aur walidain mein se har ek ka chatta hissa aur biwi ka (aulad ki maujoodgi mein) aathwan hissa aur (aulad ke na hone ki surat mein) chautha hissa qarar diya. Isi tarah shohar ka (aulad na hone ki surat mein) aadha (aulad hone ki surat mein) chauthayi hissa qarar diya
.

Hum se Muhammad Bin Ala ne bayan kiya ' kaha hum se Abu Usamah ne bayan kiya Sufyan Sawri se ' wo Amarah se ' un se Abu Zurah ne aur un se Abu Hurairah (Radi Allahu Anhu) ne bayan kiya ke ek sahabi ne Rasul Allah (Sallallahu Alaihi Wasallam) se poocha ya Rasul Allah! Kaun sa sadqa afzal hai? Farmaya ye ke sadqa tandurusti ki halat mein kar ke (tujh ko is maal ko baqi rakhne ki) khwahish bhi ho jis se kuch sarmaya jama ho jaane ki tumhein umeed ho aur (ise kharch karne ki surat mein) muhtaji ka darr ho aur is mein takheer na kar ke jab rooh halaq tak pahunch jaye to kehne baith jaye ke itna maal falan ke liye ' falane ko itna dena ' ab to falane ka ho hi gaya (to tu duniya se chala)
.

Aur manqool hai ke Qazi Shuraih, Umar Bin Abdul Aziz, Taoos, Ata aur Abdur Rahman Bin Azinah in logon ne bimari mein qarz ka iqrar durust rakkha hai aur Imam Hasan Basri ne kaha sab se zyada aadmi ko is waqt saccha samajhna chahiye jab duniya mein us ka aakhri din aur aakhirat mein pehla din ho aur Ibrahim Nakhi aur Hakam Bin Utbah ne kaha agar bimar waris se yun kahe ke mera is par kuch qarza nahi to ye ibra sahih hoga aur Rafay Bin Khadij (sahabi) ne ye wasiyat ki ke un ki biwi Fazariyah ke darwaze mein jo maal band hai wo na khola jaye aur Imam Hasan Basri ne kaha agar koi marte waqt apne ghulam se kahe mein tujh ko azad kar chuka to jaiz hai. Aur Shabi ne kaha ke agar aurat marte waqt yun kahe mera khawand mujh ko mahar de chuka hai aur mein le chuki hoon to jaiz hoga aur baaz log (Hanfiyah) kehte hain bimar ka iqrar kisi waris ke liye doosre warison ki bad-gumani ki wajah se sahih na hoga. Phir yehi log kehte hain ke amanat aur biza'at aur muzaribat ka agar bimar iqrar kare to sahih hai halankey Aap (Sallallahu Alaihi Wasallam) ne farmaya tum bad-gumani se bache raho bad-gumani bara jhoot hai aur musalmano! (Doosre warison ka haq) maar lena durust nahi kyunke Aap (Sallallahu Alaihi Wasallam) ne farmaya hai munafiq ki nishani ye hai ke amanat mein khiyanat kare aur Allah Ta'ala ne Surat-un-Nisa mein farmaya Allah Ta'ala tum ko ye hukm deta hai ke jis ki amanat hai us ko pahuncha do. Is mein waris ya ghair waris ki koi khusoosiyat nahi hai. Isi mazmoon mein Abdullah Bin Umar (Radi Allahu Anhuma) se marfoo hadees marwi hai
.

Hum se Sulaiman Bin Dawood Abu Rabi ne bayan kiya ' unhon ne kaha hum se Ismail Bin Jafar ne ' unhon ne kaha hum se Nafi Bin Malik Bin Abi Aamir Abu Suhail ne ' unhon ne apne baap se ' unhon ne Abu Hurairah (Radi Allahu Anhu) se unhon ne Nabi Kareem (Sallallahu Alaihi Wasallam) se ' Aap (Sallallahu Alaihi Wasallam) ne farmaya "Munafiq ki teen nishaniyan hain jab baat kahe to jhoot kahe aur jab us ke paas amanat rakhein to khiyanat kare aur jab waada kare to khilaf kare."
.

Aur manqool hai ke Nabi Kareem (Sallallahu Alaihi Wasallam) ne qarz ko wasiyat par muqaddam karne ka hukm diya aur (is surat mein) aur Allah ka farman «Innallaha Ya'murukum An Tu'addul Amanati ila Ahliha‏» "Be-shak Allah tumhein hukm deta hai ke tum amanatein un ke haq daron ko ada karo." To amanat (qarz) ka ada karna nafal wasiyat ke poora karne se zyada zaroori hai aur Aap (Sallallahu Alaihi Wasallam) ne farmaya "Sadqa wahi umdah hai jis ke baad aadmi maldar rahe." Aur Ibn Abbas (Radi Allahu Anhuma) ne kaha ghulam baghair apne malik ki ijazat ke wasiyat nahi kar sakta aur Aap (Sallallahu Alaihi Wasallam) ne farmaya "Ghulam apne malik ke maal ka nigahban hai."
.

Hum se Muhammad Bin Yusuf Baikandi ne bayan kiya ' kaha hum ko Imam Awza'i ne khabar di ' unhon ne Zuhri se ' unhon ne Saeed Bin Musayyib aur Urwah Bin Zubair se ke Hakeem Bin Hizam (Radi Allahu Anhu) (mashhoor sahabi) ne bayan kiya mein ne Aap (Sallallahu Alaihi Wasallam) se manga Aap ne mujh ko diya ' phir manga phir Aap ne diya ' phir farmane lage Hakeem ye duniya ka rupiya paisa dekhne mein khush-numa aur maze mein shireen hai lekin jo koi is ko sair-chashmi se le us ko barkat hoti hai aur jo koi jaan lara kar hirs ke sath is ko le us ko barkat na hogi. Is ki misal aisi hai jo kamata hai lekin sair nahi hota upar wala (dene wala) hath neeche wale (lene wala) hath se behtar hai. Hakeem ne arz kiya ya Rasul Allah! Qasam us ki jis ne aap ko saccha paighambar kar ke bheja hai mein to aaj se aap ke baad kisi se koi cheez kabhi nahi loon ga marne tak phir (Hakeem ka ye haal raha) ke Abu Bakr Siddiq (Radi Allahu Anhu) un ka salana wazeefa dene ke liye un ko bulate ' wo is ke lene se inkar karte. Phir Umar (Radi Allahu Anhu) ne bhi apni khilafat mein un ko bulaya un ka wazeefa dene ke liye lekin unhon ne inkar kiya. Umar (Radi Allahu Anhu) kehne lage musalmano! Tum gawah rehna Hakeem ko us ka haq jo loot ke maal mein Allah ne rakkha hai deta hoon wo nahi leta. Gharaz Hakeem ne Aap (Sallallahu Alaihi Wasallam) ke baad phir kisi shakhs se koi cheez qabool nahi ki (apna wazeefa bhi Bait-ul-Maal mein na liya) yahan tak ke un ki wafat ho gayi. Allah un par raham kare
.

Hum se Bishr Bin Muhammad ne bayan kiya ' kaha hum ko Abdullah Bin Mubarak ne khabar di kaha hum ko Yunus ne ' unhon ne Zuhri se ' unhon ne kaha mujh ko Salim ne khabar di ' unhon ne Abdullah Bin Umar (Radi Allahu Anhuma) se unhon ne kaha mein ne Aap (Sallallahu Alaihi Wasallam) se suna ' Aap (Sallallahu Alaihi Wasallam) farmate thay tum mein se har koi nigahban hai aur apni ra'iyyat ke baare mein poocha jayega. Hakim bhi nigahban hai apni ra'iyyat ke baare mein poocha jayega aur mard apne ghar walon ka nigahban hai aur apni ra'iyyat ke baare mein poocha jayega aur aurat apne khawand ke ghar ki nigahban hai apni ra'iyyat ke baare mein poochhi jayegi aur ghulam apne sahib ke maal ka nigahban hai aur apni ra'iyyat ke baare mein poocha jayega. Ibn Umar (Radi Allahu Anhuma) ne kaha ke mein samajhta hoon Aap (Sallallahu Alaihi Wasallam) ne ye bhi farmaya ke mard apne baap ke maal ka nigahban hai aur apni ra'iyyat ke baare mein poocha jayega
.

Aur Sabit ne Anas (Radi Allahu Anhu) se riwayat kiya ke Nabi Kareem (Sallallahu Alaihi Wasallam) ne Abu Talhah se farmaya tu ye bagh apne zaroorat mand azeezon ko de daal. Unhon ne Hassan aur Ubayy Bin Kaab ko de diya (jo Abu Talhah ke chacha ki aulad thay) aur Muhammad Bin Abdullah Ansari ne kaha mujh se mere baap ne bayan kiya ' unhon ne Sumamah se ' unhon ne Anas (Radi Allahu Anhu) se Sabit ki tarah riwayat ki ' is mein yun hai apne qarabat dar muhtajon ko de. Anas (Radi Allahu Anhu) ne kaha. To Abu Talhah ne wo bagh Hassan aur Ubayy Bin Kaab ko de diya ' wo mujh se zyada Abu Talhah (Radi Allahu Anhu) ke qareebi rishtedar thay aur Hassan aur Ubayy Bin Kaab ki qarabat Abu Talhah se yun thi ke Abu Talhah ka naam Zaid hai wo Suhail ke bete ' wo Aswad ke ' wo Haram ke ' wo Amr Bin Zaid Manah Bin Adi Bin Amr Bin Malik Bin Najjar ke aur Hassan Sabit ke bete ' wo Munzir ke ' wo Haram ke to dono Haram mein ja kar mil jate hain jo pardada hai to Haram Bin Amr Bin Zaid ' Manah Bin Adi Bin Amr Bin Malik Bin Najjar Hassan aur Abu Talhah ko mila deta hai aur Ubayy Bin Kaab chatti pusht mein yaani Amr Bin Malik mein Abu Talhah se milte hain ' Ubayy Bin Kaab ke bete ' wo Qais ke ' wo Ubaid ke ' wo Zaid ke ' wo Muawiyah ke ' wo Amr Bin Malik Bin Najjar ke to Amr Bin Malik Hassan aur Abu Talhah aur Ubayy teeno ko mila deta hai aur baazon ne (Imam Abu Yusuf Imam Abu Hanifah ke shagird ne) kaha azeezon ke liye wasiyat kare to jitne musalman baap dada guzaray hain wo sab dakhil hon ge
.

Hum se Abdullah Bin Yusuf ne bayan kiya ' kaha hum ko Imam Malik ne khabar di ' unhon ne Ishaq Bin Abdullah Bin Abi Talhah se ' unhon ne Anas (Radi Allahu Anhu) se suna ' unhon ne kaha Nabi Kareem (Sallallahu Alaihi Wasallam) ne Abu Talhah se farmaya (jab unhon ne apna bagh Bir-ha Allah ki raah mein dena chaha) mein munasib samajhta hoon tu ye bagh apne azeezon ko dede. Abu Talhah ne kaha bahut khoob aisa hi karoon ga. Phir Abu Talhah ne wo bagh apne azeezon aur chacha ke beton mein taqseem kar diya aur Ibn Abbas (Radi Allahu Anhuma) ne kaha jab (Surat-ush-Shu'ara ki) ye ayat utri «Wa Anzir Ashiratakal Aqrabina‏» aur apne qareeb ke naate walon ko (Allah ke azab se) dara to Aap (Sallallahu Alaihi Wasallam) Quraish ke khandanon Bani Fihr ' Bani Adi ko pukarane lage (un ko daraya) aur Abu Hurairah (Radi Allahu Anhu) ne kaha jab ye ayat utri «Wa Anzir Ashiratakal Aqrabina‏» Aap (Sallallahu Alaihi Wasallam) ne farmaya ae Quraish ke logo! (Allah se daro)
.