Hum se Ismail Bin Abi Uwais ne bayan kiya, kaha ke mujh se Imam Malik ne bayan kiya Ibn Shihab se, wo Ubaidullah Bin Abdullah Bin Utba Bin Masood se, wo Abdullah Bin Abbas (Radi Allahu Anhuma) se aur aur wo Saab Bin Jassama (Radi Allahu Anhu) se ke unhon ne Nabi Kareem (Sallallahu Alaihi Wasallam) ki khidmat mein gor-khar ka tohfa pesh kiya tha. Aap (Sallallahu Alaihi Wasallam) is waqt maqam-e-Abwa ya maqam-e-Waddan mein thay (raavi ko shuba hai) Aap (Sallallahu Alaihi Wasallam) ne un ka tohfa wapas kar diya. Phir un ke chehre par (ranj ke aasar) dekh kar farmaya ke mein ne ye tohfa sirf is liye wapas kiya hai ke hum ihram bandhe hue hain
.

Hum se Ibrahim Bin Musa ne bayan kiya, kaha hum se Abdah Bin Suleman ne bayan kiya, kaha hum se Hisham Bin Urwah ne bayan kiya, un se un ke walid ne aur un se Aisha (Radi Allahu Anha) ne ke log (Rasul Allah Sallallahu Alaihi Wasallam ki khidmat mein) tahaif bhejne ke liye Aisha (Radi Allahu Anha) ki bari ka intezar kiya karte thay. Apne hadaya se, ya is khass din ke intezar se (raavi ko shak hai) log Rasul Allah (Sallallahu Alaihi Wasallam) ki khushi hasil karna chahte thay
.

Hum se Adam Bin Abi Iyas ne bayan kiya, kaha hum se Shuba ne bayan kiya, kaha hum se Jafar Bin Iyas ne bayan kiya, kaha ke mein ne Saeed Bin Jubair se suna ke Ibn Abbas (Radi Allahu Anhuma) ne bayan kiya ke un ki khala Umm-ul-Hafid (Radi Allahu Anha) ne Nabi Kareem (Sallallahu Alaihi Wasallam) ki khidmat mein paneer, ghee aur goh (saahina) ke tahaif bheje. Nabi Kareem (Sallallahu Alaihi Wasallam) ne paneer aur ghee mein se to tanawul farmaya lekin goh pasand na hone ki wajah se chor di. Ibn Abbas (Radi Allahu Anhuma) ne kaha ke Rasul Allah (Sallallahu Alaihi Wasallam) ke (isi) dastar khawan par goh (saahina) ko bhi khaya gaya aur agar wo haram hoti to Aap (Sallallahu Alaihi Wasallam) ke dastar khawan par kyun khayi jati
.

Hum se Ibrahim Bin Al-Munzir ne bayan kiya, unhon ne kaha hum se Maan Bin Isa ne bayan kiya, unhon ne kaha ke mujh se Ibrahim Bin Tahman ne bayan kiya unhon ne Muhammad Bin Ziyad se aur wo Abu Hurairah (Radi Allahu Anhu) se Riwayat karte hain ke Rasul Allah (Sallallahu Alaihi Wasallam) ki khidmat mein jab koi khane ki cheez layi jati to Aap (Sallallahu Alaihi Wasallam) daryaft farmate ye tohfa hai ya sadqa? Agar kaha jata ke sadqa hai to Aap (Sallallahu Alaihi Wasallam) apne ashaab se farmate ke khao, Aap (Sallallahu Alaihi Wasallam) khud na khate aur agar kaha jata ke tohfa hai to Aap (Sallallahu Alaihi Wasallam) khud bhi hath barhate aur Sahaba ke sath ise khate
.

Hum se Muhammad Bin Bashar ne bayan kiya, kaha hum se Ghundar ne bayan kiya, kaha hum se Shuba ne bayan kiya, un se Qatada ne aur un se Anas (Radi Allahu Anhu) ne bayan kiya ke Rasul Allah (Sallallahu Alaihi Wasallam) ki khidmat mein ek martaba gosht pesh kiya gaya aur ye bataya gaya ke ye Barira (Radi Allahu Anha) ko kisi ne bataur-e-sadqa ke diya hai. Nabi Kareem (Sallallahu Alaihi Wasallam) ne farmaya "Un ke liye ye sadqa hai aur hamare liye (jab un ke yahan se pahuncha to) hadiya hai."
.

Hum se Muhammad Bin Bashar ne bayan kiya, kaha hum se Ghundar ne bayan kiya, kaha hum se Shuba ne bayan kiya Abdur Rahman Bin Qasim se, Shuba ne kaha ke mein ne ye hadees Abdur Rahman se suni thi aur unhon ne Qasim se Riwayat ki, unhon ne Aisha (Radi Allahu Anha) se ke unhon ne Barira (Radi Allahu Anha) ko (azad karne ke liye) khareedna chaha. Lekin un ke malikou ne wala ki shart apne liye lagayi. Jab is ka zikar Rasul Allah (Sallallahu Alaihi Wasallam) se hua to Aap (Sallallahu Alaihi Wasallam) ne farmaya, tu unhein khareed kar azad kar de, wala to usi ke sath qaim hoti hai jo azad kare. Aur Barira (Radi Allahu Anha) ke yahan (sadqa ka) gosht aaya tha to Nabi Kareem (Sallallahu Alaihi Wasallam) ne farmaya, accha ye wahi hai jo Barira ko sadqa mein mila hai. Ye un ke liye to sadqa hai lekin hamare liye (chunke un ke ghar se bataur hadiya mila hai) hadiya hai aur (azadi ke baad Barira ko) ikhtiyar diya gaya tha (ke agar chahein to apne nikah ko faskh kar sakti hain) Abdur Rahman ne poocha Barira (Radi Allahu Anha) ke khawand (Mughees Radi Allahu Anhu) ghalam thay ya azad? Shuba ne bayan kiya ke mein ne Abdur Rahman se un ke khawand ke mutalliq poocha to unhon ne kaha ke mujhe maloom nahi wo ghalam thay ya azad
.

Hum se Abu Al-Hassan Muhammad Bin Muqatil ne bayan kiya, unhon ne kaha hum ko Khalid Bin Abdullah ne khabar di, unhein Khalid Hazza ne Hafsa Bint Sirin se ke Umm-ul-Atiyya (Radi Allahu Anha) ne kaha ke Nabi Kareem (Sallallahu Alaihi Wasallam) Aisha (Radi Allahu Anha) ke yahan tashreef le gaye aur daryaft farmaya, kya koi cheez (khane ki) tumhare paas hai? Unhon ne kaha ke Umm-ul-Atiyya (Radi Allahu Anha) ke yahan jo Aap ne sadqa ki bakri bheji thi, is ka gosht unhon ne bheja hai. Is ke siwa aur kuch nahi hai. Aap (Sallallahu Alaihi Wasallam) ne farmaya ke wo apni jagah pahunch chuki
.

Hum se Suleman Bin Harb ne bayan kiya, kaha ke hum se Hammad Bin Zaid ne bayan kiya Hisham se, un se un ke walid ne, un se Aisha (Radi Allahu Anha) ne bayan kiya ke log tahaif bhejne ke liye meri bari ka intezar kiya karte thay. Aur Umm-ul-Salama (Radi Allahu Anha) ne kaha meri soukanein (Ummahat-ul-Momineen Rizwanullahi Alaihinna) jama theen is waqt unhon ne Nabi Kareem (Sallallahu Alaihi Wasallam) se (bataur-e-shikayat logon ki is rawish ka) zikar kiya. To Aap (Sallallahu Alaihi Wasallam) ne unhein koi jawab nahi diya
.

Hum se Ismail Bin Abi Uwais ne bayan kiya, kaha ke mujh se mere bhai Abdul Hamid Bin Abi Uwais ne, un se Suleman ne Hisham Bin Urwah se, un se un ke baap ne aur un se Aisha (Radi Allahu Anha) ne ke Nabi Kareem (Sallallahu Alaihi Wasallam) ki azwaj do giroh mein theen. Ek mein Aisha, Hafsa, Safiyya aur Sauda Rizwanullahi Alaihinna aur doosri mein Umm-ul-Salama aur baqiya tamam azwaj-e-mutahiraat Rizwanullahi Alaihinna theen. Musalmanou ko Rasul Allah (Sallallahu Alaihi Wasallam) ki Aisha (Radi Allahu Anha) ke sath mohabbat ka ilm tha is liye jab kisi ke paas koi tohfa hota aur wo ise Rasul Allah (Sallallahu Alaihi Wasallam) ki khidmat mein pesh karna chahta to intezar karta. Jab Rasul Allah (Sallallahu Alaihi Wasallam) ki Aisha (Radi Allahu Anha) ke ghar ki bari hoti to tohfa dene wale sahab apna tohfa Aap (Sallallahu Alaihi Wasallam) ki khidmat mein bhejte. Is par Umm-ul-Salama (Radi Allahu Anha) ki jamaat ki azwaj-e-mutahiraat ne aapas mein mashwara kiya aur Umm-ul-Salama (Radi Allahu Anha) se kaha ke wo Rasul Allah (Sallallahu Alaihi Wasallam) se baat karein taake Aap (Sallallahu Alaihi Wasallam) logon se farma dein ke jise Aap ke yahan tohfa bhejna ho wo jahan bhi Aap (Sallallahu Alaihi Wasallam) hon wahin bheja kare. Chunanchay un azwaj ke mashwara ke mutabiq unhon ne Rasul Allah (Sallallahu Alaihi Wasallam) se kaha lekin Aap (Sallallahu Alaihi Wasallam) ne unhein koi jawab nahi diya. Phir un khawateen ne poocha to unhon ne bata diya ke mujhe Aap (Sallallahu Alaihi Wasallam) ne koi jawab nahi diya. Azwaj-e-mutahiraat ne kaha ke phir ek martaba kaho. Unhon ne bayan kiya phir jab aap ki bari aayi to dubara unhon ne Aap (Sallallahu Alaihi Wasallam) se arz kiya. Is martaba bhi Aap (Sallallahu Alaihi Wasallam) ne mujhe is ka koi jawab hi nahi diya. Azwaj ne is martaba un se kaha ke Aap (Sallallahu Alaihi Wasallam) ko is masla par bulwayo to sahi. Jab un ki bari aayi to unhon ne phir kaha. Aap (Sallallahu Alaihi Wasallam) ne is martaba farmaya. Aisha ke bare mein mujhe takleef na do. Aisha ke siwa apni biwiyon mein se kisi ke kapre mein bhi mujh par wahi nazil nahi hoti hai. Aisha (Radi Allahu Anha) ne kaha ke Aap (Sallallahu Alaihi Wasallam) ke is irshad par unhon ne arz kiya, Aap ko eeza pahunchane ki wajah se mein Allah ke huzoor mein tauba karti hoon. Phir in azwaj-e-mutahiraat ne Rasul Allah (Sallallahu Alaihi Wasallam) ki sahibzadi Fatima (Radi Allahu Anha) ko bulaya aur un ke zariya Aap (Sallallahu Alaihi Wasallam) ki khidmat mein ye kehlowaya ke Aap ki azwaj Abu Bakr (Radi Allahu Anhu) ki beti ke bare mein Allah ke liye Aap se insaf chahti hain. Chunanchay unhon ne bhi Aap (Sallallahu Alaihi Wasallam) se baat cheet ki. Aap (Sallallahu Alaihi Wasallam) ne farmaya, meri beti! kya tum wo pasand nahi karti jo mein pasand karoon? Unhon ne jawab diya ke kyun nahi, is ke baad wo wapas aa gayein aur azwaj ko itla di. Unhon ne un se phir dubara khidmat-e-nabwi mein jane ke liye kaha. Lekin aap ne dubara jane se inkar kiya to unhon ne Zainab Bint Jahsh (Radi Allahu Anha) ko bheja. Wo khidmat-e-nabwi mein hazir huein to unhon ne sakht guftagu ki aur kaha ke Aap ki azwaj Abu Quhafa ki beti ke bare mein Aap se Allah ke liye insaf mangti hain aur un ki aawaz oonchi ho gayi. Aisha (Radi Allahu Anha) wahin baithi hui theen. Unhon ne (un ke munh par) unhein bhi bura bhala kaha. Rasul Allah (Sallallahu Alaihi Wasallam) Aisha (Radi Allahu Anha) ki taraf dekhne lage ke wo kuch bolti hain ya nahi. Raavi ne bayan kiya ke Aisha (Radi Allahu Anha) bhi bol parein aur Zainab (Radi Allahu Anha) ki baton ka jawab dene lagein aur aakhir unhein khamosh kar diya. Phir Rasul Allah (Sallallahu Alaihi Wasallam) ne Aisha (Radi Allahu Anha) ki taraf dekh kar farmaya ke ye Abu Bakr ki beti hai. Imam Bukhari (Rahimahullah) ne kaha ke aakhir kalam Fatima (Radi Allahu Anha) ke waqia se mutalliq Hisham Bin Urwah ne ek aur shaks se bayan kiya hai. Unhon ne Zuhri se Riwayat ki aur unhon ne Muhammad Bin Abdur Rahman se aur Abu Marwan ne bayan kiya ke Hisham se aur unhon ne Urwah se ke log tahaif bhejne ke liye Aisha (Radi Allahu Anha) ki bari ka intezar kiya karte thay aur Hisham ki ek Riwayat Quraish ke ek sahab aur ek doosre sahab se jo ghalamou mein se thay, bhi hai. Wo Zuhri se naqal karte hain aur wo Muhammad Bin Abdur Rahman Bin Haris Bin Hisham se ke Aisha (Radi Allahu Anha) ne kaha jab Fatima (Radi Allahu Anha) ne (andar aane ki) ijazat chahi to mein is waqt Aap (Sallallahu Alaihi Wasallam) hi ki khidmat mein maujood thi
.

Hum se Abu Maamar ne bayan kiya, kaha hum se Abdul Waris ne bayan kiya, un se Azrah Bin Sabit Ansari ne bayan kiya, kaha ke mujh se Sumama Bin Abdullah ne bayan kiya, Azrah ne kaha ke mein Sumama Bin Abdullah ki khidmat mein hazir hua to unhon ne mujhe khushbu inayat farmai aur bayan kiya ke Anas (Radi Allahu Anhu) khushbu ko wapas nahi karte thay. Sumama ne kaha ke Anas (Radi Allahu Anhu) ka guman tha ke Nabi Kareem (Sallallahu Alaihi Wasallam) khushbu ko wapas nahi farmaya karte thay
.