Hum se Asim Bin Ali Abu Al-Hussain ne bayan kiya, kaha hum se Ibn Abi Zaib ne bayan kiya, un se Saeed Maqbari ne aur un se Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "Ae Musalman auratou! hargiz koi parousan apni doosri parousan ke liye (mamooli hadiya ko bhi) haqeer na samjhe, khwah bakri ke khur ka hi kyun na ho."
.

Hum se Abdul Aziz Bin Abdullah Owaisi ne bayan kiya, kaha hum se Ibn Abi Hazim ne bayan kiya, un se un ke walid ne Yazid Bin Rooman se, wo Urwah se aur un se Aisha (Radi Allahu Anha) ne bayan kiya ke aap ne Urwah se kaha, mere bhanje! Rasul Allah (Sallallahu Alaihi Wasallam) ke ahad-e-mubarak mein (ye haal tha ke) hum ek chand dekhte, phir doosra dekhte, phir teesra dekhte, isi tarah do do mahine guzar jate aur Rasul Allah (Sallallahu Alaihi Wasallam) ke gharon mein (khana pakane ke liye) aag na jalti thi. Mein ne poocha. Khala Amma! phir aap log zinda kis tarah rehti theen? Aap ne farmaya ke sirf do kali cheezon khajoor aur pani par. Albatta Rasul Allah (Sallallahu Alaihi Wasallam) ke chand Ansari parousi thay. Jin ke paas doodh dene wali bakriyan theen aur wo Rasul Allah (Sallallahu Alaihi Wasallam) ke yahan bhi un ka doodh tohfa ke taur par pahuncha jaya karte thay. Aap (Sallallahu Alaihi Wasallam) ise hamein bhi pila diya karte thay
.

Hum se Muhammad Bin Bashar ne bayan kiya, kaha hum se Muhammad Bin Abi Adi ne bayan kiya Shuba se, wo Suleman se, wo Abu Hazim se aur un se Abu Hurairah (Radi Allahu Anhu) ne kaha ke Rasul Allah (Sallallahu Alaihi Wasallam) ne farmaya "Agar mujhe bazu aur paye (ke gosht) par bhi dawat di jaye to mein qabool kar loon ga aur mujhe bazu ya paye (ke gosht) ka tohfa bheja jaye to ise bhi qabool kar loon ga."
.

Abu Saeed (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya, apne sath mera bhi ek hissa lagana (is se tarjuma bab sabit hua)
.

Hum se Saeed Bin Abi Maryam ne bayan, kaha hum se Abu Ghassan Muhammad Bin Mutarrif ne bayan kiya, kaha ke mujh se Abu Hazim Salama Bin Dinar ne bayan kiya Sahl Bin Saad Sa'idi (Radi Allahu Anhu) se ke Nabi Kareem (Sallallahu Alaihi Wasallam) ne ek muhajira aurat ke paas (apna aadmi) bheja. Un ka ek ghalam barhai tha. Un se Aap (Sallallahu Alaihi Wasallam) ne farmaya ke apne ghalam se hamare liye lakriyon ka ek minbar banane ke liye kahein. Chunanchay unhon ne apne ghalam se kaha. Wo Ghabah se ja kar jhao kaat laya aur isi ka ek minbar bana diya. Jab wo minbar bana chuke to is aurat ne Rasul Allah (Sallallahu Alaihi Wasallam) ki khidmat mein kehla bheja ke minbar ban kar tayyar hai. Aap (Sallallahu Alaihi Wasallam) ne kehlowaya ke ise mere paas bhijwa dein. Jab log ise laye to Aap (Sallallahu Alaihi Wasallam) ne khud ise uthaya aur jahan tum ab dekh rahe ho. Wahin Aap (Sallallahu Alaihi Wasallam) ne ise rakkha
.

Hum se Abdul Aziz Bin Abdullah ne bayan kiya, kaha ke mujh se Muhammad Bin Jafar ne bayan kiya Abu Hazim se, wo Abdullah Bin Abi Qatada Salmi se aur un se un ke baap ne bayan kiya ke Makkah ke raste mein ek jagah mein Rasul Allah (Sallallahu Alaihi Wasallam) ke chand sathiyon ke sath baitha hua tha. Rasul Allah (Sallallahu Alaihi Wasallam) hum se aage qayam farma thay. (Hujjat-ul-Wida ke moqa par) aur log to ihram bandhe hue thay lekin mera ihram nahi tha. Mere sathiyon ne ek gor-khar dekha. Mein is waqt apni jooti gant-hne mein mashghool tha. In logon ne mujh ko kuch khabar nahi di. Lekin un ki khwahish yahi thi ke kisi tarah mein gor-khar ko dekh loon. Chunanchay mein ne jo nazar uthayi to gor-khar dikhayi diya. Mein fauran ghore ke paas gaya aur is par zain kas kar sawaar ho gaya, magar ittefaq se (jaldi mein) kora aur neza donon bhool gaya. Is liye mein ne apne sathiyon se kaha ke wo mujhe kora aur neza utha dein. Unhon ne kaha hargiz nahi qasam Allah ki, hum tumhare (shikar mein) kisi qisam ki madad nahi kar sakte. (Kyunke hum sab log halat-e-ihram mein hain) mujhe is par ghussa aaya aur mein ne khud hi utar kar donon cheezein le lein. Phir sawaar ho kar gor-khar par hamla kiya aur is ko shikar kar laya. Wo mar bhi chuka tha. Ab logon ne kaha ke ise khana chahiye. Lekin phir ihram ki halat mein ise khane (ke jawaz) par shuba hua. (Lekin baaz logon ne shuba nahi kiya aur gosht khaya) phir hum aage barhe aur mein ne is gor-khar ka ek bazu chhupa rakkha tha. Jab hum Rasul Allah (Sallallahu Alaihi Wasallam) ke paas pahunche to is ke mutalliq Aap se sawal kiya, (Aap Sallallahu Alaihi Wasallam ne muhram ke liye shikar ke gosht khane ka fatwa diya) aur daryaft farmaya ke is mein se kuch bacha hua gosht tumhare paas maujood bhi hai? Mein ne kaha ke ji han! aur wahi bazu Aap (Sallallahu Alaihi Wasallam) ki khidmat mein pesh kiya. Aap (Sallallahu Alaihi Wasallam) ne ise tanawul farmaya. Yahan tak ke wo khatam ho gaya. Aap (Sallallahu Alaihi Wasallam) bhi is waqt ihram se thay (Abu Hazim ne kaha ke) mujh se yahi hadees Zaid Bin Aslam ne bayan ki, un se Ata Bin Yasar ne aur un se Abu Qatada (Radi Allahu Anhu) ne
.

Aur Sahl Bin Saad Sa'idi (Radi Allahu Anhu) ne kaha ke Rasul Allah (Sallallahu Alaihi Wasallam) ne mujh se farmaya "Mujhe pani pilao." (Is se apne sathiyon se pani mangna sabit hua)
.

Hum se Khalid Bin Makhlad ne bayan kiya, kaha hum se Suleman Bin Bilal ne, kaha ke mujh se Abu Tuwala ne jin ka naam Abdullah Bin Abdur Rahman tha ke mein ne Anas (Radi Allahu Anhu) se suna, wo kehte thay ke (ek martaba) Rasul Allah (Sallallahu Alaihi Wasallam) hamare isi ghar mein tashreef laye aur pani talab farmaya. Hamare paas ek bakri thi, ise hum ne doha. Phir mein ne isi kunwein ka pani mila kar Aap (Sallallahu Alaihi Wasallam) ki khidmat mein (lassi bana kar) pesh kiya, Abu Bakr (Radi Allahu Anhu) Aap (Sallallahu Alaihi Wasallam) ki bayein taraf baithe hue thay aur Umar (Radi Allahu Anhu) samne thay aur ek dehati Aap (Sallallahu Alaihi Wasallam) ke dayein taraf tha. Jab Aap (Sallallahu Alaihi Wasallam) pee kar farigh hue to (piyale mein kuch doodh bach gaya tha is liye) Umar (Radi Allahu Anhu) ne arz kiya ke ye Abu Bakr (Radi Allahu Anhu) hain. Lekin Aap (Sallallahu Alaihi Wasallam) ne ise dehati ko ata farmaya. (Kyunke wo dayein taraf tha) phir Aap (Sallallahu Alaihi Wasallam) ne farmaya, dayein taraf baithne wale, dayein taraf baithne wale hi haq rakhte hain. Pas khabardar dayein taraf hi se shuru kiya karo. Anas (Radi Allahu Anhu) ne kaha ke yahi sunnat hai, yahi sunnat hai, teen martaba (aap ne is baat ko dohraya)
.

Aur Nabi Kareem (Sallallahu Alaihi Wasallam) ne shikar ke bazu ka tohfa Abu Qatada se qabool farmaya tha (isi se tarjumatul-bab sabit hua)
.

Hum se Suleman Bin Harb ne bayan kiya, kaha hum se Shuba ne bayan kiya, un se Hisham Bin Zaid Bin Anas Bin Malik ne aur un se Anas (Radi Allahu Anhu) ne bayan kiya ke Marr-uz-Zahran nami jagah mein hum ne ek khargosh ka peecha kiya. Log (is ke peeche) daure aur ise thaka diya aur mein ne qareeb pahunch kar ise pakar liya. Phir Abu Talha (Radi Allahu Anhu) ke haan laya. Unhon ne ise zibah kiya aur is ke peeche ka ya donon raanon ka gosht Nabi Kareem (Sallallahu Alaihi Wasallam) ki khidmat mein bheja. (Shuba ne baad mein yaqeen ke sath) kaha ke donon raanein unhon ne bheji theen, is mein koi shak nahi. Rasul Allah (Sallallahu Alaihi Wasallam) ne ise qabool farmaya tha mein ne poocha aur is mein se Aap (Sallallahu Alaihi Wasallam) ne kuch tanawul bhi farmaya? Unhon ne bayan kiya ke han! kuch tanawul farmaya tha. Is ke baad phir unhon ne kaha ke Aap ne wo hadiya qabool farma liya tha
.