Hum se Abdul A’laa bin Hammad ne bayan kiya, unhon ne kaha hum se Yazeed bin Zurai’ ne bayan kiya, unhon ne kaha hum se Sa’eed bin Abi Aroobah ne bayan kiya, unhon ne Qatadah se, ke Anas bin Malik Radhiallahu Anhu ne un se bayan kiya ke Nabi-e-Kareem Sallallahu Alaihi Wasallam apni tamaam azwaaj ke paas ek hi raat mein tashreef le gaye. Us waqt Aap Sallallahu Alaihi Wasallam ke azwaaj mein nau biwiyaan thein.

Hum se ’Ayyaash ne bayan kiya, unhon ne kaha hum se Abdul A’laa ne bayan kiya, unhon ne kaha hum se Humaid ne Bakr ke waaste se bayan kiya, unhon ne Abu Rafe’ se, woh Abu Hurairah Radhiallahu Anhu se, kaha ke meri mulaqaat Rasoolullah Sallallahu Alaihi Wasallam se hue. Us waqt main junubi tha. Aap Sallallahu Alaihi Wasallam ne mera haath pakad liya aur main Aap Sallallahu Alaihi Wasallam ke saath chalne laga. Aakhir Aap Sallallahu Alaihi Wasallam ek jagah baith gaye aur main aahista se apne ghar aaya aur ghusl kar ke haazir-e-khidmat huwa. Aap Sallallahu Alaihi Wasallam abhi baithe huwe the, Aap Sallallahu Alaihi Wasallam ne daryaaft farmaaya aye Abu Hurairah! Kahan chale gaye the, main ne waqi’ah bayan kiya to Aap Sallallahu Alaihi Wasallam ne farmaaya Sub-hanallah! Momin to najis nahi hota.

Hum se Abu Nu’aim ne bayan kiya, kaha hum se Hishaam aur Shaibaan ne, woh Yahya se, woh Abu Salamah se kaha main ne Aisha Radhiallahu Anha se poocha ke kya Nabi-e-Kareem Sallallahu Alaihi Wasallam janabat ki haalat mein ghar mein sote the? Kaha haan lekin Wuzu kar lete the.

Hum se Qutaibah bin Sa’eed ne bayan kiya, unhon ne kaha hum se Laith bin Sa’d ne bayan kiya, unhon ne Nafe’ se, woh Ibn-e-Umar Radhiallahu Anhuma se ke Umar bin Khattaab Radhiallahu Anhu ne Rasoolullah Sallallahu Alaihi Wasallam se poocha ke kya hum mein se koi janabat ki haalat mein so sakta hai? Farmaaya haan, Wuzu kar ke janabat ki haalat mein bhi so sakte ho.

Hum se Yahya bin Bukair ne bayan kiya, unhon ne kaha hum se Laith ne bayan kiya, unhon ne Ubaidullah bin Abi Al-Ja’d ke waaste se, unhon ne Muhammed bin Abdur Rahman se, unhon ne Urwah se, woh Aisha Radhiallahu Anha se, aap ne farmaaya ke Nabi-e-Kareem Sallallahu Alaihi Wasallam jab janabat ki haalat mein hote aur sone ka iradah karte to sharmgaah ko dho lete aur Namaz ki tarah Wuzu karte.

Hum se Musa bin Ismail ne bayan kiya, kaha hum se Juwairiyah ne Nafe’ se, woh Abdullah bin Umar se, kaha Umar Radhiallahu Anhu ne Nabi-e-Kareem Sallallahu Alaihi Wasallam se daryaaft kiya ke kya hum janabat ki haalat mein so sakte hain? Aap Sallallahu Alaihi Wasallam ne farmaaya haan lekin Wuzu kar ke.

Hum se Abdullah bin Yousuf ne bayan kiya, unhon ne kaha hamein Imam Malik ne khabar di unhon ne Abdullah bin Dinaar se, unhon ne Abdullah bin Umar Radhiallahu Anhuma se, unhon ne kaha Umar Radhiallahu Anhu ne Rasoolullah Sallallahu Alaihi Wasallam se arz kiya ke raat mein unhein ghusl ki zaroorat ho jaaya karti hai to Rasoolullah Sallallahu Alaihi Wasallam ne farmaaya ke Wuzu kar liya kar aur sharmgaah ko dho kar so jaa.

Hum se Mu’aaz bin Fazalah ne bayan kiya, kaha hum se Hishaam Dastuwaayi ne bayan kiya.

(Doosri sanad se) Imam Bukhari Rahimahullah ne farmaaya ke hum se Abu Nu’aim ne bayan kiya, woh Hishaam se, woh Qatadah se, woh Imam Hasan Basri se, woh Abu Rafe’ se, woh Abu Hurairah Radhiallahu Anhu se ke Nabi-e-Kareem Sallallahu Alaihi Wasallam ne farmaaya ke jab mard aurat ke chihaar zaanu mein baith gaya aur us ke saath jima’ ke liye koshish ki to ghusl waajib ho gaya, is Hadees ki mutaba’at ’Amr ne Sho’bah ke waaste se ki hai aur Musa ne kaha ke hum se Abaan ne bayan kiya, kaha hum se Qatadah ne bayan kiya, kaha hum se Hasan Basri ne bayan kiya. Isi Hadees ki tarah. Abu Abdullah (mam Bukhari Rahimahullah) ne kaha yeh Hadees is baab ki tamaam Ahadees mein umdah aur behtar hai aur hum ne doosri Hadees (Uthman aur Ibn-e-Abi Ka’b ki) Sahaba ke ikhtilaaf ke pesh-e-nazar bayan ki aur ghusl mein ehtiyaat ziyada hai.

Hum se Abu Ma’mar Abdullah bin ’Amr ne bayan kiya, unhon ne kaha hum se Abdul Waaris bin Sa’eed ne bayan kiya, unhon ne Husain bin Zakwaan Mu’allim ke waaste se, un ko Yahya ne kaha mujh ko Abu Salamah bin Abdur Rahman bin ’Awf ne khabar di, un ko Ata bin Yasaar ne khabar di, unhein Zaid bin Khalid Juhani ne bataaya ke unhon ne Uthman bin Affan Radhiallahu Anhu se poocha ke mard apni biwi se hambistar huwa lekin inzaal nahi huwa to woh kya kare? Uthman Radhiallahu Anhu ne farmaaya ke Namaz ki tarah Wuzu kar le aur sharamgaah ko dho le aur Uthman Radhiallahu Anhu ne farmaaya ke main ne Rasoolullah Sallallahu Alaihi Wasallam se yeh baat suni hai. Main ne is ke mutalliq Ali bin Abi Talib, Zubair bin Al-Awaam, Talha bin Ubaidullah, Ubai bin Ka’b Radhiallahu Anhum se poocha to unhon ne bhi yahi farmaaya Yahya ne kaha aur Abu Salamah ne mujhe bataaya ke unhein ’Urwah bin Zubair ne khabar di, unhein Abu Ayyub Radhiallahu Anhu ne ke yeh baat unhon ne Rasoolullah Sallallahu Alaihi Wasallam se suni thi.