Muhammed bin Musanna ne hum se bayan kiya, kaha ke hum se Abu ’Aasim (Zahhak bin Makhlad) ne bayan kiya, woh Hanzalah bin Abi Sufyan se, woh Qasim bin Muhammed se, woh Aisha Radhiallahu Anha se. Aap ne farmaaya ke Nabi-e-Kareem Sallallahu Alaihi Wasallam jab ghusl-e-janabat karna chaahte to Hilaab ki tarah ek cheez mangaate. Phir (paani ka chullu) apne haath mein lete aur sar ke daahne hisse se ghusl ki ibtida karte. Phir baayein hisse ka ghusl karte. Phir apne dono haathon ko sar ke beech mein lagaate the.

Hum se Umar bin Hafs bin Ghiyath ne bayan kiya, kaha ke hum se mere waalid ne bayan kiya, kaha ke hum se A’mash ne, kaha mujh se Salim ne Kuraib ke waasta se, woh Ibn-e-Abbas Radhiallahu Anhuma se riwayat karte hain, kaha hum se Maimunah ne bayan farmaaya ke main ne Nabi-e-Kareem Sallallahu Alaihi Wasallam ke liye ghusl ka paani rakha. To pehle Aap Sallallahu Alaihi Wasallam ne paani ko daayen haath se baayein par giraaya. Is tarah apne dono haathon ko dhoya. Phir apni sharmgaah ko dhoya. Phir apne haath ko zameen par ragad kar use mitti se mila aur dhoya. Phir kulli ki aur naak mein paani daala. Phir apne chehre ko dhoya aur apne sar par paani bahaaya. Phir ek taraf ho kar dono paaon dhoye. Phir Aap Sallallahu Alaihi Wasallam ko rumaal diya gaya. Lekin Aap Sallallahu Alaihi Wasallam ne us se paani ko khushk nahi kiya.

Hum se Abdullah bin Zubair Humaidi ne bayan kiya, unhon ne kaha hum se Sufyan ne bayan kiya, unhon ne kaha ke hum se A’mash ne bayan kiya Salim bin Abi-Ja’d ke waaste se, unhon ne Kuraib se, unhon ne Abdullah bin Abbas Radhiallahu Anhuma se, unhon ne Maimunah Radhiallahu Anha se ke Nabi-e-Kareem Sallallahu Alaihi Wasallam ne ghusl-e-janabat kiya to pehle apni sharmgaah ko apne haath se dhoya. Phir haath ko deewaar par ragad kar dhoya. Phir Namaz ki tarah Wuzu kiya aur jab Aap Sallallahu Alaihi Wasallam apne ghusl se faarigh ho gaye to dono paaon dhoye.

Ibn-e-Umar aur Bara bin Aazib Radhiallahu Anhum ne haath dhone se pehle ghusl ke paani mein apna haath daala tha. Aur Ibn-e-Umar aur Ibn-e-Abbas Radhiallahu Anhum us paani se ghusl mein koi muzaiqah nahi samjhte the jis mein ghusl-e-janabat ka paani tapak kar gir gaya ho.

Hum se Abdullah bin Maslamah ne bayan kiya, kaha hum se Aflah bin Humaid ne bayan kiya Qasim se, woh Aisha Radhiallahu Anha se, aap ne farmaaya ke main aur Nabi-e-Kareem Sallallahu Alaihi Wasallam ek bartan mein is tarah ghusl karte the ke hamaare haath baari baari us mein padte the.

Hum se Musaddad ne bayan kiya, unhon ne kaha hum se Hammad ne Hishaam ke waaste se bayan kiya, woh apne waalid se, woh Aisha Radhiallahu Anha se, aap ne farmaaya ke jab Rasoolullah Sallallahu Alaihi Wasallam ghusl-e-janabat farmaate to (pehle) apna haath dhote.

Hum se Abul Waleed ne bayan kiya. Kaha hum se Sho’bah ne Abu Bakr bin Hafs ke waaste se bayan kiya, woh Urwah se, woh Aisha Radhiallahu Anha se, unhon ne kaha ke main aur Nabi-e-Kareem Sallallahu Alaihi Wasallam (dono mil kar) ek hi bartan mein ghusl-e-janabat karte the. Aur Sho’bah ne Abdur Rahman bin Qasim se, unhon ne apne waalid (Qasim bin Muhammed bin Abi Bakr Radhiallahu Anhu) se woh Aisha Radhiallahu Anha se. Isi tarah riwayat karte hain.

Hum se Abul Waleed ne bayan kiya, unhon ne kaha hum se Sho’bah ne Abdullah bin Abdullah bin Jabr se unhon ne kaha ke main ne Anas bin Malik se suna ke Nabi-e-Kareem Sallallahu Alaihi Wasallam aur Aap ki koi zauja-e-mutahharah ek bartan mein ghusl karte the. Is Hadees mein Muslim bin Ibrahim aur Wahb bin Jareer ki riwayat mein Sho’bah se «مِنَ الْجَنَابَة» ka lafz (ziyada) hai. (Yani yeh janabat ka ghusl hota tha).

Ibn-e-Umar Radhiallahu Anhuma se manqool hai ke unhon ne apne qadmon ko Wuzu kardah aazaa ke khushk hone ke baad dhoya.

Hum se Muhammed bin Mahboob ne bayan kiya, unhon ne kaha hum se Abdul Wahid bin Ziyaad ne bayan kiya, unhon ne kaha hum se A’mash ne Salim bin Abi-Ja’d ke waaste se bayan kiya, unhon ne Kuraib Maula Ibn-e-Abbas se, unhon ne Abdullah bin Abbas Radhiallahu Anhuma se ke Maimunah Radhiallahu Anha ne kaha ke main ne Nabi-e-Kareem Sallallahu Alaihi Wasallam ke liye ghusl ka paani rakha. To Aap Sallallahu Alaihi Wasallam ne pehle paani apne haathon par gira kar unhein do ya teen baar dhoya. Phir apne daahne haath se baayein par gira kar apni sharamgaahon ko dhoya. Phir haath ko zameen par ragda. Phir kulli ki aur naak mein paani daala phir apne chehre aur haathon ko dhoya. Phir apne sar ko teen martaba dhoya, phir apne saare badan par paani bahaaya, phir Aap apni ghusl ki jagah se alag ho gaye. Phir apne qadmon ko dhoya.