Hum se Abdan ne bayan kiya, kaha hum se Abu Hamza (Muhammed bin Maymoon) ne, kaha main ne A’mash se suna, unhon ne Salim bin Abi-Ja’d se, unhon ne Kuraib se, unhon ne Ibn-e-Abbas se, aap ne kaha ke Maimunah Radhiallahu Anha ne farmaaya ke main ne Nabi-e-Kareem Sallallahu Alaihi Wasallam ke liye ghusl ka paani rakha aur ek kapde se pardah kar diya. Pehle Aap Sallallahu Alaihi Wasallam ne apne dono haathon par paani daala aur unhein dhoya. Phir apne daahne haath se baayein haath mein paani liya aur sharmgaah dhoyi. Phir haath ko zameen par maara aur dhoya. Phir kulli ki aur naak mein paani daala aur chehre aur baazu dhoye. Phir sar par paani bahaaya aur saare badan ka ghusl kiya. Us ke baad Aap Sallallahu Alaihi Wasallam maqam-e-ghusl se ek taraf ho gaye. Phir dono paaon dhoye. Us ke baad main ne Aap Sallallahu Alaihi Wasallam ko ek kapda dena chaaha. To Aap Sallallahu Alaihi Wasallam ne use nahi liya aur Aap Sallallahu Alaihi Wasallam haathon se paani jhaadne lage.

Hum se Khallad bin Yahya ne bayan kiya, unhon ne kaha ke hum se Ibrahim bin Nafe’ ne bayan kiya, unhon ne Hasan bin Muslim se riwayat ki, woh Safiyyah bint-e-Shaybah se, woh Aisha Radhiallahu Anha se, aap ne farmaaya ke hum azwaaj (mutahharaat) mein se kisi ko agar janabat laahiq hoti to woh haathon mein paani le kar sar par teen martaba daaltien. Phir haath mein paani le kar sar ke daahne hisse ka ghusl kartien aur doosre haath se baayein hisse ka ghusl kartien.

Aur Bahz bin Hakeem ne apne waalid se, unhon ne Bahz ke daada (Mu’aawiyah bin Haidah) se woh Nabi-e-Kareem Sallallahu Alaihi Wasallam se riwayat karte hain ke Aap Sallallahu Alaihi Wasallam ne farmaaya, Allah logon ke muqaable mein ziyada mustahiq hai ke us se sharm ki jaaye.

Hum se Ishaq bin Nasr ne bayan kiya, unhon ne kaha hum se Abdur Razzaq ne bayan kiya, unhon ne Ma’mar se, unhon ne Hammam bin Munabbih se, unhon ne Abu Hurairah Radhiallahu Anhu se, unhon ne Nabi-e-Kareem Sallallahu Alaihi Wasallam se ke Aap Sallallahu Alaihi Wasallam ne farmaaya Bani Israel nange ho kar is tarah nahaate the ke ek shakhs doosre ko dekhta lekin Musa Alaihissalam tanha pardah se ghusl farmaate. Us par unhon ne kaha ke ba-khuda Musa ko hamaare saath ghusl karne mein sirf yeh cheez rukawat hai ke aap ke khusye badhe huwe hain. Ek martaba Musa Alaihissalam ghusl karne lage aur aap ne kapdon ko ek paththar par rakh diya. Itne mein paththar kapdon ko le kar bhaaga aur Musa Alaihissalam bhi us ke peeche badi tezi se daude. Aap kehte jaate the. Aye paththar! Mera kapda de. Aye paththar! Mera kapda de. Us arsa mein Bani Israel ne Musa Alaihissalam ko nanga dekh liya aur kehne lage ke ba-khuda Musa ko koi beemari nahi aur Musa Alaihissalam ne kapda liya aur paththar ko maarne lage. Abu Hurairah Radhiallahu Anhu ne kaha ke ba-khuda us paththar par chhe ya saat maar ke nishaan baaqi hain.

Aur isi sanad ke saath Abu Hurairah se riwayat hai ke woh Nabi-e-Kareem Sallallahu Alaihi Wasallam se riwayat karte hain ke Aap ne farmaaya ke (ek baar) Ayyub Alaihissalam nange ghusl farmaa rahe the ke sone ki tiddiyan Aap par girne lagein. Ayyub Alaihissalam unhein apne kapde mein sametne lage. Itne mein un ke Rabb ne unhein pukaara ke aye Ayyub! Kya main ne tumhein us cheez se be-niyaaz nahi kar diya, jise tum dekh rahe ho. Ayyub Alaihissalam ne jawab diya haan teri buzurgi ki qasam. Lekin teri barkat se mere liye be-niyaazi kaise mumkin hai. Aur is Hadees ko Ibrahim ne Musa bin Uqbah se, woh Safwan se, woh Ata bin Yasaar se, woh Abu Hurairah se, woh Nabi-e-Kareem Sallallahu Alaihi Wasallam se, is tarah naql karte hain“Jab ke Ayyub Alaihissalam nange ho kar ghusl kar rahe the”(aakhir tak).

Hum se Abdullah bin Maslamah Qa’nabi ne riwayat ki. Unhon ne Imam Malik se, unhon ne Umar bin Ubaidullah ke Maula Abu Nazr se ke Umm-e-Haani bint-e-Abi Talib ke Maula Abu Murrah ne unhein bataaya ke unhon ne Umm-e-Haani bint-e-Abi Talib ko yeh kehte suna ke main Fatah-e-Makkah ke din Rasoolullah Sallallahu Alaihi Wasallam ki khidmat mein haazir hue to main ne dekha ke Aap ghusl farmaa rahe hain aur Fatima Radhiallahu Anha ne pardah kar rakha hai. Nabi-e-Kareem Sallallahu Alaihi Wasallam ne poocha yeh kaun hain. Main ne arz ki ke main Umm-e-Haani hun.

Hum se Abdan ne bayan kiya, unhon ne kaha hum se Abdullah bin Mubarak ne bayan kiya, unhon ne kaha hum se Sufyan ne bayan kiya, unhon ne A’mash se, woh Salim bin Abi-Ja’d se, woh Kuraib se, woh Ibn-e-Abbas Radhiallahu Anhuma se, woh Maimunah Radhiallahu Anha se, unhon ne kaha ke jab Nabi-e-Kareem Sallallahu Alaihi Wasallam ghusl-e-janabat farmaa rahe the main ne Aap Sallallahu Alaihi Wasallam ka pardah kiya tha. To Aap Sallallahu Alaihi Wasallam ne pehle apne haath dhoye, phir daahne haath se baayein par paani bahaaya aur sharmgaah dhoyi aur jo kuch us mein lag gaya tha use dhoya phir haath ko zameen ya deewaar par ragad kar (dhoya) phir Namaz ki tarah Wuzu kiya. Paaon ke alawah. Phir paani apne saare badan par bahaaya aur us jagah se hat kar dono qadmon ko dhoya. Is Hadees mein Abu ’Awaanah aur Muhammed bin Fuzail ne bhi parde ka zikr kiya hai.

Hum se Abdullah bin Yousuf ne bayan kiya, unhon ne kaha ke hum se Imam Malik ne bayan kiya, unhon ne Hishaam bin ’Urwah ke waaste se, unhon ne apne waalid ’Urwah bin Zubair se, woh Zainab bint-e-Abi Salamah se, unhon ne Umm-ul-Mo’mineen Umm-e-Salamah Radhiallahu Anha se, aap ne farmaaya ke Umm-e-Sulaim Abu Talha Radhiallahu Anhu ki aurat Rasoolullah Sallallahu Alaihi Wasallam ki khidmat mein haazir huen aur kaha ke Allah Ta’ala haq se haya nahi karta. Kya aurat par bhi jab ke use ehtelaam ho ghusl waajib ho jaata hai. To Rasoolullah Sallallahu Alaihi Wasallam ne farmaaya, haan agar (apni mani ka) paani dekhe (to use bhi ghusl karna hoga).

Hum se Ali bin Abdullah Madeeni ne bayan kiya, kaha hum se Yahya bin Sa’eed Qattan ne, kaha hum se Humaid At-Taweel ne, kaha hum se Bakr bin Abdullah ne Abu Rafe’ ke waaste se, unhon ne Abu Hurairah se suna ke Madinah ke kisi raaste par Nabi-e-Kareem Sallallahu Alaihi Wasallam se un ki mulaqaat hue. Us waqt Abu Hurairah Radhiallahu Anhu janabat ki haalat mein the. Abu Hurairah Radhiallahu Anhu ne kaha ke main peeche reh kar laut gaya aur ghusl kar ke waapas aaya. To Rasoolullah Sallallahu Alaihi Wasallam ne daryaaft farmaaya ke aye Abu Hurairah! Kahan chale gaye the. Unhon ne jawaab diya ke main janabat ki haalat mein tha. Is liye main ne Aap Sallallahu Alaihi Wasallam ke saath baghair ghusl ke baithna bura jaana. Aap Sallallahu Alaihi Wasallam ne irshaad farmaaya. Sub-hanallah! Momin hargiz najis nahi ho sakta.

Aur Ata ne kaha ke junubi pachna lagwa sakta hai, naakhun tarashwaa sakta hai aur sar mundwaa sakta hai. Agarche Wuzu bhi na kiya ho.