Hum se ’Ali (bin Madeeni) ne bayan kiya, un se Sufyan ne, un se Ibn-e-Abi Najeeh ne Mujahid ke waaste se naql kiya, woh kehte hain ke main Abdullah bin Umar Radhiallahu Anhuma ke saath Madine tak raha, main ne (is) ek Hadees ke siwa un se Rasoolullah Sallallahu Alaihi Wasallam ki koi aur Hadees nahi suni, woh kehte the ke hum Rasoolullah Sallallahu Alaihi Wasallam ki khidmat mein haazir the ke Aap Sallallahu Alaihi Wasallam ke paas khajoor ka ek gaabha laaya gaya. (Use dekh kar) Aap Sallallahu Alaihi Wasallam ne farmaaya ke darakhton mein ek darakht aisa hai us ki misaal musalmaan ki tarah hai. (Ibn-e-Umar Radhiallahu Anhuma kehte hain ke yeh sun kar) main ne iradah kiya ke arz karun ke woh (darakht) khajoor ka hai magar choonke main sab mein chhota tha is liye khamoosh raha. (Phir) Rasoolullah Sallallahu Alaihi Wasallam ne khud hi farmaaya ke woh khajoor hai.

Aur Umar Radhiallahu Anhu ka irshaad hai ke sardaar banne se pehle samajhdaar bano (yani deen ka ilm haasil karo) aur Abu Abdullah (Imam Bukhari Rahimahullah) farmaate hain ke sardaar banaaye jaane ke baad bhi ilm haasil karo, kiunki Rasoolullah Sallallahu Alaihi Wasallam ke ashaab Radhiallahu Anhum ne budhaape mein bhi deen seekha.

Hum se Humaidi ne bayan kiya, un se Sufyan ne, un se Ismail bin Abi Khalid ne doosre lafzon mein bayan kiya, un lafzon ke alawah jo Zohri ne hum se bayan kiye, woh kehte hain main ne Qais bin Abi Haazim se suna, unhon ne Abdullah bin Mas’ood Radhiallahu Anhu se suna, woh kehte hain ke Rasoolullah Sallallahu Alaihi Wasallam ka irshaad hai ke hasad sirf do baaton mein jaaiz hai. Ek to us shakhs ke baare mein jise Allah ne daulat di ho aur woh us daulat ko raah-e-haq mein kharch karne par bhi qudrat rakhta ho aur ek us shakhs ke baare mein jise Allah ne hikmat (ki daulat) se nawaaza ho aur woh us ke zariye se faisla karta ho aur (logon ko) us hikmat ki ta’leem deta ho.

Aur Allah Ta’ala ka irshaad (jo Musa Alaihissalam ka qaul hai) kya main tumhaare saath chalun is shart par ke tum mujhe (apne ilm se kuch) sikhaao.

Hum se Muhammed bin Ghurair Zohri ne bayan kiya, un se Ya’qoob bin Ibrahim ne, un se un ke baap (Ibrahim) ne, unhon ne Saleh se suna, unhon ne Ibn-e-Shihaab se, woh bayan karte hain ke unhein Ubaidullah bin Abdullah ne Ibne-e-Abbas Radhiallahu Anhuma ke waaste se khabar di ke woh aur Hurr bin Qais bin Hisn Fazaari Musa Alaihissalam ke saathi ke baare mein behas-o-takraar karne lage. Ibne-e-Abbas Radhiallahu Anhuma ne farmaaya ke woh Khazir Alaihissalam the. Phir un ke paas se Ubai bin Ka’b guzre to Abdullah bin Abbas Radhiallahu Anhuma ne unhein bulaaya aur kaha ke main aur mere yeh rafeeq Musa Alaihissalam ke us saathi ke baare mein behas kar rahe hain jis se unhon ne mulaqaat chaahi thi. Kya aap ne Rasoolullah Sallallahu Alaihi Wasallam se is ke baare mein kuch zikr suna hai. Unhon ne kaha, haan main ne Rasoolullah Sallallahu Alaihi Wasallam ko yeh farmaate huwe suna hai. Ek din Musa Bani Israel ki ek jama’at mein baithe huwe the ke itne mein ek shakhs aaya aur us ne aap se poocha kya aap jaante hain ke (duniya mein) koi aap se bhi badh kar aalim maujood hai? Musa Alaihissalam ne farmaaya nahi. Is par Allah Ta’ala ne Musa Alaih Islam ke paas Wahi bheji ke haan hamaara bandah Khazir hai (jis ka ilm tum se ziyada hai) Musa Alaihissalam ne Allah se daryaaft kiya ke Khazir Alaihissalam se milne ki kya soorat hai? Allah Ta’ala ne ek machli ko un se mulaqaat ki alamat qaraar diya aur un se keh diya ke jab tum us machli ko gum kar do to (waapas) laut jaao, tab Khazir se tumhaari mulaqaat hogi. Tab Musa (chale aur) darya mein machli ki alamat talaash karte rahe. Us waqt un ke saathi ne kaha jab hum paththar ke paas the, kya aap ne dekha tha, main us waqt machli ka kehna bhool gaya aur shaitaan hi ne mujhe us ka zikr bhula diya. Musa Alaihissalam ne kaha, usi maqam ki hamein talaash thi. Tab woh apne nishanaat-e-qadam par (pichle paaon) baatein karte huwe laute (wahaan) unhon ne Khazir Alaihissalam ko paaya. Phir un ka wahi qissa hai jo Allah ne apni kitaab Quran mein bayan kiya hai.

Hum se Abu Ma’mar ne bayan kiya, un se Abdul Waris ne, un se Khalid ne ’Ikrimah ke waaste se bayan kiya, woh Ibne-e-Abbas Radhiallahu Anhuma se riwayat karte hain. Unhon ne farmaaya ke (ek martaba) Rasoolullah Sallallahu Alaihi Wasallam ne mujhe (seene se) laga liya aur dua dete huwe farmaaya ke "Aye Allah ise ilm-e-kitaab (Quran) ata farmaaiyo".

Hum se Ismail ne bayan kiya, un se Malik ne, un se Ibn-e-Shihaab ne, un se Ubaidullah bin Abdullah bin ’Utbah ne, woh Abdullah bin Abbas Radhiallahu Anhuma se riwayat karte hain ke main (ek martaba) gadhi par sawaar ho kar chala, us zamaane mein, main buloogh ke qareeb tha. Rasoolullah Sallallahu Alaihi Wasallam Minaa mein Namaz padh rahe the aur Aap ke saamne deewaar (ki aad) na thi, to main baaz safon ke saamne se guzra aur gadhi ko chor diya. Woh charne lagi, jab ke main saf mein shaamil ho gaya (magar) kisi ne mujhe us baat par toka nahi.

Hum se Muhammed bin Yousuf ne bayan kiya, un se Abu Mus-hir ne, un se Muhammed bin Harb ne, un se Zubaidi ne Zohri ke waaste se bayan kiya, woh Mahmood bin Ar-Rabee’ se naql karte hain, unhon ne kaha ke mujhe yaad hai ke (ek martaba) Rasoolullah Sallallahu Alaihi Wasallam ne ek dol se munh mein paani le kar mere chehre par kulli farmaayi, aur main us waqt paanch saal ka tha.

Jabir bin Abdullah ka ek Hadees ki khaatir Abdullah bin Onais ke paas jaane ke liye ek maah ki masaafat tay karna.

Hum se Abul Qasim Khalid bin Khali Qaazi Hims ne bayan kiya, un se Muhammed bin Harb ne, Awzaa’ee kehte hain ke hamein Zohri ne Ubaidullah Ibn-e-Abdullah bin ’Utbah bin Mas’ood se khabar di, woh Abdullah bin Abbas Radhiallahu Anhuma se riwayat karte hain ke woh aur Hurr bin Qais bin Hisn Fazaari Musa Alaihissalam ke saathi ke baare mein jhagde. (Us dauraan mein) un ke paas se Ubai bin Ka’b guzre, to Ibne-e-Abbas Radhiallahu Anhuma ne unhein bula liya aur kaha ke main aur mere (yeh) saathi Musa Alaihissalam ke saathi ke baare mein behas kar rahe hain jis se milne ki Musa Alaihissalam ne (Allah se) dua ki thi. Kya aap ne Rasoolullah Sallallahu Alaihi Wasallam ko kuch un ka zikr farmaate huwe suna hai? Ubai ne kaha ke haan! Main ne Rasoolullah Sallallahu Alaihi Wasallam ko un ka haal bayan farmaate huwe suna hai. Aap farmaa rahe the ke ek baar Musa Alaihissalam Bani Israel ki ek jama’at mein the ke itne mein ek shakhs aaya aur kehne laga kya aap jaante hain ke duniya mein aap se bhi badh kar koi aalim maujood hai. Musa Alaihissalam ne farmaaya ke nahi. Tab Allah Ta’ala ne Musa Alaihissalam par Wahi naazil ki ke haan hamaara bandah Khazir (ilm mein tum se badh kar) hai. To Musa Alaihissalam ne un se milne ki raah daryaaft ki, us waqt Allah Ta’ala ne (un se mulaqaat ke liye) machli ko nishaani qaraar diya aur un se keh diya ke jab tum machli ko na paao to laut jaana, tab tum Khazir Alaihissalam se mulaqaat kar loge. Musa Alaihissalam darya mein machli ke nishaan ka intezaar karte rahe. Tab un ke khaadim ne un se kaha. Kya aap ne dekha tha ke jab hum paththar ke paas the, to main (wahaan) machli bhool gaya. Aur mujhe shaitaan hi ne ghaafil kar diya. Musa Alaihissalam ne kaha ke hum usi (maqam) ke to mutalaashi the, tab woh apne (qadmon ke) nishaano par baatein karte huwe waapas laute. (Wahaan) Khazir Alaihissalam ko unhon ne paaya. Phir un ka qissa wahi hai jo Allah Ta’ala ne apni kitaab mein bayan farmaaya hai.