Hum se Abu Mamar Abdullah bin Amr ne byaan kiya , kaha ke hum se Abdul Warith bin Saeed ne byaan kiya , kaha ke hum se Abdul Aziz bin Suhayb ne Anas bin Malik razi Allahu anhu se byaan kiya ke Nabi Karim salla Allahu alaihi wasallam namaaz ko mukhtasar aur poori parhte thay .

Hum se Ibrahim bin Musa ne byaan kiya , kaha ke hum se Waleed bin Muslim ne byaan kiya , kaha ke hum se Imam Abdur Rahman bin Amr Awzai ne Yahya bin Abi Kathir se byaan kiya , unhon ne Abdullah bin Abi Qatadah se , unhon ne apne baap Abu Qatadah Harith bin Rabee se , unhon ne Nabi Karim salla Allahu alaihi wasallam se ke Aap salla Allahu alaihi wasallam ne farmaya ke main namaaz der tak parhne ke irade se khara hota hoon . Lekin kisi bache ke rone ki awaaz sun kar namaaz ko halki kar deta hoon , kyunke us ki maan ko (jo namaaz mein shareek ho gi) takleef mein daalna bura samajhta hoon . Waleed bin Muslim ke saath is riwayat ki mutabaat Bishr bin Bakr , Baqiyyah bin Waleed aur Ibn Mubarak ne Awzai ke wastay se ki hai .

Hum se Khalid bin Makhlad ne byaan kiya , kaha ke hum se Sulayman bin Bilal ne byaan kiya , kaha ke hum se Shareek bin Abdullah bin Abi Namr Qurayshi ne byaan kiya , kaha ke main ne Anas bin Malik razi Allahu anhu se suna , unhon ne batlaya ke Nabi Karim salla Allahu alaihi wasallam se zyada halki lekin kaamil namaaz mein ne kisi imam ke peeche kabhi nahi parhi . Aap salla Allahu alaihi wasallam ka yeh haal tha ke agar Aap salla Allahu alaihi wasallam bache ke rone ki awaaz sun lete to us khayal se ke us ki maan kahin pareshani mein na mubtala ho jaye namaaz mukhtasar kar dete .

Hum se Ali bin Abdullah Madini ne byaan kiya , kaha ke hum se Yazid bin Zuray ne byaan kiya , kaha ke hum se Saeed bin Abi Arubah ne byaan kiya . Kaha ke hum se Qatadah ne byaan kiya ke Anas bin Malik razi Allahu anhu ne un se byaan kiya ke Nabi Karim salla Allahu alaihi wasallam ne farmaya main namaaz shuru kar deta hoon . Irada yeh hota hai ke namaaz taweel karoon , lekin bache ke rone ki awaaz sun kar mukhtasar kar deta hoon kyunke mujhe maloom hai ke maan ke dil par bache ke rone se kaisi chot parti hai .

Hum se Muhammad bin Bashar ne byaan kiya , kaha ke hamein Muhammad bin Ibrahim bin Adi ne Saeed bin Abi Arubah ke wastay se khabar di , unhon ne Qatadah se , unhon ne Anas bin Malik razi Allahu anhu se , unhon ne Nabi Karim salla Allahu alaihi wasallam se ke Aap salla Allahu alaihi wasallam ne farmaya ke main namaaz ki niyat bandhta hoon , irada yeh hota hai ke namaaz ko taweel karoon ga , lekin bache ke rone ki awaaz sun kar mukhtasar kar deta hoon kyunke main us dard ko samajhta hoon jo bache ke rone ki wajah se maan ko ho jata hai . Aur Musa bin Ismail ne kaha hum se Aban bin Yazid ne byaan kiya , kaha hum se Qatadah ne , kaha hum se Anas ne Nabi Karim salla Allahu alaihi wasallam se yahi hadees byaan ki .

Hum se Sulayman bin Harb aur Abun Numan Muhammad bin Fadl ne byaan kiya , unhon ne kaha ke hum se Hammad bin Zaid ne byaan kiya , unhon ne Ayyub Sakhtiyani se , unhon ne Amr bin Dinar se , unhon ne Jabir razi Allahu anhu se farmaya ke Muaz razi Allahu anhu , Nabi Karim salla Allahu alaihi wasallam ke saath namaaz parhte phir wapas aa kar apni qom ko namaaz parhate thay .

Hum se Musaddad bin Musarhad ne byaan kiya , kaha ke hum se Abdullah bin Dawood ne byaan kiya , kaha ke hum se Amash ne Ibrahim Nakhai se byaan kiya , unhon ne Aswad se , unhon ne Aishah razi Allahu anha se ke Aap ne batlaya ke Nabi Karim salla Allahu alaihi wasallam ke marz al-wafat mein Bilal razi Allahu anhu namaaz ki ittila dene ke liye haazir khidmat huay . Aap ne farmaya ke Abu Bakr se namaaz parhane ke liye kaho . Main ne arz kiya ke Abu Bakr kache dil ke aadmi hain agar Aap ki jagah kharay hon ge to ro den ge aur qiraat na kar saken ge . Aap ne farmaya ke Abu Bakr se kaho woh namaaz parhayen . Main ne wohi uzr phir dohraya . Phir Aap ne teesri ya chothi marteba farmaya ke tum log to bilkul Sawahib Yusuf ki tarah ho . Abu Bakr se kaho ke woh namaaz parhayen . Khair Abu Bakr razi Allahu anhu ne namaaz shuru kara di . Phir Nabi Karim salla Allahu alaihi wasallam (apna mizaj zara halka pa kar) do aadmiyon ka sehaara liye huay bahar tashreef laye . Goya meri nazron ke saamne woh manzar hai ke Aap ke qadam zameen par nishaan kar rahe thay . Abu Bakr Aap ko dekh kar peeche hatne lage . Lekin Aap ne ishaare se unhein namaaz parhane ke liye kaha . Abu Bakr peeche hat gaye aur Nabi Karim salla Allahu alaihi wasallam un ke baazu mein baithe . Abu Bakr razi Allahu anhu logon ko Nabi Karim salla Allahu alaihi wasallam ki takbeer suna rahe thay . Abdullah bin Dawood ke saath is hadees ko Muhazir ne bhi Amash se riwayat kiya hai .

Aur Nabi Karim salla Allahu alaihi wasallam se marwi hai ke Aap salla Allahu alaihi wasallam ne (pehli saf walon se) farmaya tum meri pairwi karo aur tumhare peeche jo log hain woh tumhari pairwi karen .

Hum se Qutaybah bin Saeed ne byaan kiya , unhon ne kaha ke hum se Abu Muawiya Muhammad bin Hazim ne byaan kiya , unhon ne Amash ke wastay se byaan kiya , unhon ne Ibrahim Nakhai se , unhon ne Aswad se , unhon ne Aishah razi Allahu anha se . Aap ne batlaya ke Nabi Karim salla Allahu alaihi wasallam zyada bimaar ho gaye thay to Bilal razi Allahu anhu Aap salla Allahu alaihi wasallam ko namaaz ki khabar dene aye . Aap salla Allahu alaihi wasallam ne farmaya ke Abu Bakr se namaaz parhane ke liye kaho . Main ne kaha ke ya Rasool Allah! Abu Bakr ek narm dil aadmi hain aur jab bhi woh Aap ki jagah kharay hon ge logon ko (shiddat gariyah ki wajah se) awaaz nahi suna saken ge . Is liye agar Umar razi Allahu anhu se kehte to behtar tha . Aap salla Allahu alaihi wasallam ne farmaya ke Abu Bakr se namaaz parhane ke liye kaho . Phir main ne Hafsah razi Allahu anha se kaha ke tum kaho ke Abu Bakr narm dil aadmi hain aur agar Aap ki jagah kharay huay to logon ko apni awaaz nahi suna saken ge . Is liye agar Umar se kahen to behtar ho ga . Is par Aap salla Allahu alaihi wasallam ne farmaya ke tum log Sawahib Yusuf se kam nahi ho . Abu Bakr se kaho ke namaaz parhayen . Jab Abu Bakr razi Allahu anhu namaaz parhane lage to Nabi Karim salla Allahu alaihi wasallam ne apne marz mein kuch halka pan mehsoos farmaya aur do aadmiyon ka sehaara le kar kharay ho gaye . Aap salla Allahu alaihi wasallam ke paon zameen par nishaan kar rahe thay . Is tarah chal kar Aap salla Allahu alaihi wasallam masjid mein daakhil huay . Jab Abu Bakr ne Aap salla Allahu alaihi wasallam ki aahat payi to peeche hatne lage is liye Rasool Allah salla Allahu alaihi wasallam ne ishaare se roka phir Nabi Karim salla Allahu alaihi wasallam Abu Bakr razi Allahu anhu ke bayen taraf baith gaye to Abu Bakr kharay ho kar namaaz parh rahe thay . Aur Rasool Allah salla Allahu alaihi wasallam baith kar . Abu Bakr razi Allahu anhu Rasool Allah salla Allahu alaihi wasallam ki iqtida kar rahe thay aur log Abu Bakr razi Allahu anhu ki iqtida .

Hum se Abdullah bin Maslamah Qanabi ne byaan kiya , unhon ne Imam Malik bin Anas se byaan kiya , unhon ne Ayyub bin Abi Tamimah Sakhtiyani se , unhon ne Muhammad bin Sireen se , unhon ne Abu Hurayrah razi Allahu anhu se ke Rasool Allah salla Allahu alaihi wasallam ne (Zuhr ki namaaz mein) do rakat parh kar namaaz khatam kar di to Aap salla Allahu alaihi wasallam se Zul Yadain ne kaha ke ya Rasool Allah! kya namaaz kam ho gayi hai ya Aap bhool gaye hain ? Is par Aap salla Allahu alaihi wasallam ne (aur logon ki taraf dekh kar) poocha kya Zul Yadain sahi kehte hain ? Logon ne kaha ke haan! Phir Aap salla Allahu alaihi wasallam uthe aur doosri do rakatein bhi parheen . Phir salam phera . Phir takbeer kahi aur sajda kiya pehle ki tarah ya us se kuch lamba sajda .