Aur Allah Ta'ala ne (Surah al-Kausar mein) farmaya «innaa aatainaakal-kausara» ”bilashubha hum ne Aap ko Kausar diya .“ Aur Abdullah bin Zaid Maazni ne bayan kiya ke Nabi Karim salla Allahu alaihi wasallam ne Ansar se farmaya ke tum is waqt tak sabr kiye rehna ke mujh se Hauz e Kausar par milo .

Mujh se Yahya bin Hamad ne bayan kiya , kaha hum se Abu Awanah ne bayan kiya , in se Sulayman ne , in se Shaqeeq ne aur in se Abdullah bin Masood razi Allahu anhu ne aur in se Nabi Karim salla Allahu alaihi wasallam ne ke main tum se pehle hi hauz par maujood rahoon ga .

(Doosri sanad) aur mujh se Amr bin Ali ne bayan kiya , kaha hum se Muhammad bin Jafar ne , kaha hum se Shubah ne , in se Mugheera ne , kaha ke main ne Abu Wail se suna aur in se Abdullah bin Masood razi Allahu anhu ne bayan kiya ke Nabi Karim salla Allahu alaihi wasallam ne farmaya ke main apne hauz par tum se pehle hi maujood rahoon ga aur tum mein se kuch log mere samne laaye jayein ge phir unhein mere samne se hata diya jaye ga to main kahoon ga ke Ae mere Rabb! Yeh mere saathi hain lekin mujh se kaha jaye ga ke Aap nahi jaante ke unhon ne Aap ke baad kiya kiya nayi cheezin ijaad kar li thien . Is riwayat ki mutabia-t Aasim ne Abu Wail se ki , in se Huzayfah razi Allahu anhu ne aur in se Nabi Karim salla Allahu alaihi wasallam ne bayan farmaya .

Hum se Musaddad ne bayan kiya , kaha hum se Yahya ne bayan kiya , in se Ubaidullah ne , in se Nafi ne bayan kiya aur in se Abdullah bin Umar razi Allahu anhuma ne bayan kiya ke Nabi Karim salla Allahu alaihi wasallam ne farmaya ”tumhare samne hi mera hauz ho ga woh itna bada hai jitna Jarba aur Azhruha ke darmiyan fasila hai .“

Mujh se Amr bin Muhammad ne bayan kiya , unhon ne kaha hum se Hushaim ne bayan kiya , unhon ne kaha hum ko Abu Bishr aur Ata bin Saib ne khabar di , unhein Saeed bin Jubayr ne aur in se Abdullah bin Abbas razi Allahu anhuma ne bayan kiya ke Kausar se murad bahut zyada bhalayi (khair e kaseer) hai jo Allah Ta'ala ne Nabi Karim salla Allahu alaihi wasallam ko di hai . Abu Bishr ne bayan kiya ke main ne Saeed bin Jubayr se kaha ke baaz logon ka khayal hai ke Kausar jannat mein ek nehar hai to unhon ne kaha ke jo nehar jannat mein hai woh bhi is khair (bhalayi) ka ek hissa hai jo Allah Ta'ala ne Nabi Karim salla Allahu alaihi wasallam ko di hai .

Hum se Saeed bin Maryam ne bayan kiya , kaha hum ko Nafi bin Amr ne khabar di , in se Ibn Abi Mulaykah ne bayan kiya , in se Abdullah bin Amr razi Allahu anhuma ne bayan kiya ke Nabi Karim salla Allahu alaihi wasallam ne farmaya ”mera hauz ek mahine ki masafat ke barabar ho ga . Is ka pani doodh se zyada sufaid aur is ki khushboo mushk se zyada achhi ho gi aur is ke koozay aasman ke sitaron ki tadaad ke barabar hon ge . Jo shakhs is mein se ek martaba pee le ga woh phir kabhi bhi (Maidan e Mahshar mein) pyasa na ho ga .“

Hum se Saeed bin Afir ne bayan kiya , unhon ne kaha ke mujh se Ibn Wahb ne bayan kiya , in se Yunus ne bayan kiya , in se Ibn Shihab ne bayan kiya , aur in se Anas bin Malik razi Allahu anhu ne bayan kiya ke Nabi Karim salla Allahu alaihi wasallam ne farmaya ”mere hauz ki lambayi itni ho gi jitni Ailah aur Yaman aur shehar Sanaa ke darmiyan ki lambayi hai . Aur wahan itni bari tadaad mein piyale hon ge jitni aasman ke sitaron ki tadaad hai .“

Hum se Abu al-Waleed ne bayan kiya , kaha hum se Humam ne bayan kiya , in se Qatadah ne , in se Anas razi Allahu anhu ne aur in se Nabi Karim salla Allahu alaihi wasallam ne (doosri sanad) aur hamase Hudba bin Khalid ne bayan kiya , kaha hum se Humam ne bayan kiya , kaha hamase Qatadah ne bayan kiya , kaha hamase Anas bin Malik ne bayan kiya aur in se Nabi Karim salla Allahu alaihi wasallam ne bayan kiya ke main jannat mein chal raha tha ke main ek nehar par pahuncha is ke donon kinaron par khol-dar motiyon ke gumbad bane huay thay . Main ne poochha: Jibrail! Yeh kiya hai ? Unhon ne kaha yeh Kausar hai jo Aap ke Rabb ne Aap ko diya hai . Main ne dekha ke is ki khushboo ya matti teiz mushk jaisi ku . Rawi Hudba ko shak thu .

Hum se Muslim bin Ibrahim ne bayan kiya , kaha hum se Wuhaib bin Khalid ne bayan kiya , kaha hamase Abd-ul-Aziz ne bayan kiya , in se Anas razi Allahu anhu bayan karte hain ke Nabi Karim salla Allahu alaihi wasallam ne farmaya ”mere kuch saathi hauz par mere samne laaye jayein ge aur main unhein pehchan loon ga lekin phir woh mere samne se hata diye jayein ge . Main is par kahoon ga ke yeh to mere saathi hain . Lekin mujh se kaha jaye ga ke Aap ko maloom nahi ke unhon ne Aap ke baad kiya kiya nayi cheezin ijaad kar li thien .“

Hum se Saeed bin Abu Maryam ne bayan kiya , kaha hum se Muhammad bin Mutarrif ne bayan kiya , kaha ke mujh se Abu Hazim ne , in se Sahl bin Saad razi Allahu anhu ne bayan kiya ke Nabi Karim salla Allahu alaihi wasallam ne farmaya ”main apne Hauz e Kausar par tum se pehle maujood rahoon ga . Jo shakhs bhi meri taraf se guzre ga woh is ka pani piye ga aur jo is ka pani piye ga woh phir kabhi pyasa nahi ho ga aur wahan kuch aise log bhi aayein ge jinhein main pehchanoon ga aur woh mujhe pehchanein ge lekin phir unhein mere samne se hata diya jaye ga .“