Aur Allah Ta'ala ne (Surah al-Shuara mein) farmaya ”sha-iron ki pairwi wahi log karte hain jo gumrah hain , kya tum nahi dekhte ho ke woh har waadi mein bhatakte phirte hain aur woh , woh baatein kehte hain jo khud nahi karte . Siwa un logon ke jo iman le aaye aur jinon ne amal e saaleh kiye aur Allah ka kasrat se zikr kiya aur jab in par zhulm kiya gaya to unhon ne is ka badla liya aur zhulm karne walon ko jald hi maloom ho jaye ga ke in ka anjam kya hota hai .“ Ibn Abbas razi Allahu anhuma ne kaha ke «fee kulli laghvin yakhoodhoona» ka matlab yeh hai ke har ek lagh-v be-hooda baat mein ghuste hain .

Hum se Abu al-Yaman ne bayan kiya , unhon ne kaha hum ko Shuayb ne khabar di , in se Zuhri ne bayan kiya , unhon ne kaha mujhko Abu Bakr bin Abd-ur-Rahman ne khabar di , unhein Marwan bin Hakam ne khabar di , unhein Abd-ur-Rahman bin Aswad bin Abd Yaghoos ne khabar di , unhein Ubayy bin Kabb razi Allahu anhu ne khabar di ke Rasool Allah salla Allahu alaihi wasallam ne farmaya ”baaz shairon mein danayi hoti hai .“

Hum se Abu Nuaym ne bayan kiya , kaha hum se Sufyan bin Uyaynah ne bayan kiya , in se Aswad bin Qays ne , unhon ne kaha ke main ne Jundub bin Abdullah Bajali se suna , unhon ne kaha ke Nabi Karim salla Allahu alaihi wasallam chal rahe thay ke Aap ko patthar se thokar lagi aur Aap gir paray , is se Aap ki ungli se khoon behne laga , Aap salla Allahu alaihi wasallam ne yeh shair parha ”tu to ik ungli hai aur kya hai jo zakhmi ho gayi ... kya hua agar raah e Maula mein tu zakhmi ho gayi .“

Hum se Muhammad bin Bashar ne bayan kiya , unhon ne kaha hum se Abd-ur-Rahman bin Mahdi ne bayan kiya , in se Sufyan ne bayan kiya , in se Abd-ul-Malik ne , unhon ne kaha hamase Abu Salamah ne aur in se Abu Hurairah razi Allahu anhu ne ke Nabi Karim salla Allahu alaihi wasallam ne farmaya ki shuara ke kalam mein se sacha kalma Labeed ka misra hai jo yeh hai ke Allah ke siwa jo kuch hai sab madoom o fana hone wala hai . Umayyah bin Abi al-Salt sha-ir to qareeb thu ke Musalman ho jaye .

Hum se Qutaybah bin Saeed ne bayan kiya , kaha hum se Hatim bin Ismail ne , in se Burayd ibn Abi Ubaid ne aur in se Salama bin al-Akwa razi Allahu anhu ne ke Rasool Allah salla Allahu alaihi wasallam ke saath Jang e Khaibar mein gaye aur hum ne raat mein safar kiya , itne mein Musalmanon ke aadmi ne Aamir bin al-Akwa razi Allahu anhu se kaha ke apne kuch shair ashaar sunao . Rawi ne bayan kiya ke Aamir sha-ir thay . Woh logon ko apni hudi sunane lage . ”Ae Allah! Agar tu na hota to hum hidayat na paate na hum sadqa de sakte aur na namaz parh sakte . Hum tujh par fida hon , hum ne jo kuch pehle gunah kiye un ko tu maaf kar de aur jab (dushman se) hamara samna ho to hamain sabit-qadam rakh aur ham par sukoon nazil farma . Jab hamain jang ke liye bulaya jata hai , to hum maujood ho jaate hain aur dushman ne bhi pukar kar hamase najat chahi hai .“ Rasool Allah salla Allahu alaihi wasallam ne farmaya ke yeh kaun oonton ko haank raha hai jo hudi ga raha hai ? Sahabah ne arz kiya ke Aamir bin al-Akwa hai . Nabi Karim salla Allahu alaihi wasallam ne farmaya ke Allah Paak is par raham kare . Ek sahabi yani Umar razi Allahu anhu ne kaha: ya Rasool Allah! Ab to Aamir shaheed huay . Kaash aur chand roz Aap hum ko Aamir se faida uthane dete . Rawi ne bayan kiya ke phir hum Khaibar aaye aur us ko ghair liya is ghurao mein hum shadeed faaqon mein mubtala huay , phir Allah Ta'ala ne Khaibar walon par hum ko fatah ata farmayi jis din in par fatah hui is ki shaam ko logon ne jagah jagah aag jalayi . Nabi Karim salla Allahu alaihi wasallam ne poochha ke yeh aag kaisi hai , kis kaam ke liye tum logon ne yeh aag jalayi hai ? Sahabah ne arz kiya ke gosht pakaane ke liye . Is par Aap ne daryaft farmaya kis cheez ke gosht ke liye ? Sahabah ne kaha ke basti ke paaltu gadhon ka gosht pakaane ke liye . Nabi Karim salla Allahu alaihi wasallam ne farmaya ke gosht ko bartanon mein se phenk do aur bartanon ko torr do . Ek sahabi ne arz kiya: ya Rasool Allah! Hum gosht to phenk dein , magar bartan torne ke bajaye agar dho lein ? Nabi Karim salla Allahu alaihi wasallam ne farmaya achha yun hi kar lo . Jab logon ne jang ki saff-bandi kar li to Aamir (Ibn al-Akwa sha-ir) ne apni talwar se ek Yahudi par waar kiya , in ki talwar chhoti ku is ki nouk palat kar khud in ke ghutnon par lagi aur is ki wajah se in ki shahadat ho gayi . Jab log wapas aane lage to Salama (Aamir ke bhai) ne bayan kiya ke mujhe Nabi Karim salla Allahu alaihi wasallam ne dekha ke mere chehre ka rang badla hua hai . Daryaft farmaya ke kya baat hai ? Main ne arz kiya: ya Rasool Allah! Par mere maan aur baap fida hon , log keh rahe hain ke Aamir ke aamal barbad ho gaye . (kyunke in ki maut khud in ki talwar se hui hai) Nabi Karim salla Allahu alaihi wasallam ne farmaya yeh kisne kaha ? Main ne arz kiya: falan , falan , falan aur Usayd bin Huzayr Ansari ne . Nabi Karim salla Allahu alaihi wasallam ne farmaya ke jis ne yeh baat kahi us ne jhoot kaha hai unhein to dohra ajar mile ga . Nabi Karim salla Allahu alaihi wasallam ne apni do ungliyon ko mila kar isharah kiya ke woh aabid bhi thu aur mujahid bhi (to ibadat aur jihad donon ka sawab us ne paya) Aamir ki tarah to bahut kam bahadur Arab mein paida huay hain (woh aisa bahadur aur naik aadmi thu) .

Hum se Musaddad ne bayan kiya , kaha hum se Ismail ne bayan kiya , kaha hum se Ayub Sakhtiyani ne bayan kiya , in se Abu Qulabah ne aur in se Anas bin Malik razi Allahu anhu ne bayan kiya ke Nabi Karim salla Allahu alaihi wasallam (ek safar ke mauqa par) apni auraton ke paas aaye jo oonton par sawar ja rahi thien , in ke saath Umm Sulaym razi Allahu anha Anas ki walda bhi thien . Nabi Karim salla Allahu alaihi wasallam ne farmaya ke afsos , Anjashah! Sheeshon ko aahistagi se le chal . Abu Qulabah ne kaha ke Nabi Karim ne auraton se mutalliq aise alfaz ka istemal farmaya ke agar tum mein koi shakhs istemal kare to tum is par aib-jooyi karo . Yani Nabi Karim salla Allahu alaihi wasallam ka yeh irshad ke sheeshon ko narmi se le chal .