Yeh Musa bin Uqbah ne byaan kiya hai .

Hum se Abdullah bin Zubayr Humaydi ne byaan kiya , kaha hum ne Sufyan bin Uyaynah se suna , un se Hisham bin Urwah ne byaan kiya , un se un ke walid ne , un se Zaynub bint Abi Salamah ne aur un se un ki walda Umm al-Momineen Umm Salamah razi Allahu anha ne ke Nabi Karim salla Allahu alaihi wasallam mere yahan tashreef laye to mere paas ek mukhannas baitha hua tha phir Nabi Karim salla Allahu alaihi wasallam ne suna ke woh Abdullah bin Umayyah se keh raha tha ke ae Abdullah! Dekho agar kal Allah Ta'ala ne Taif ki fatah tumhein ata farmayi to Ghaylan bin Salmah ki beti (Badiyah naami) ko le lena woh jab samne aati hai to pait par char bal aur peeth morr kar jati hai to aath bal dikhayi dete hain (yani bahut moti taza aurat hai) to Nabi Karim salla Allahu alaihi wasallam ne farmaya yeh log ab tumhare ghar mein na aaya karein . Ibn Uyaynah ne byaan kiya ke Ibn Jurayj ne kaha , is mukhannas ka naam Hayt tha . Hum se Mahmood ne byaan kiya , un se Abu Usamah ne byaan kiya , un se Hisham ne isi tarah byaan kiya aur yeh izafa kiya hai ke Nabi Karim salla Allahu alaihi wasallam is waqt Taif ka muasara kiye huay thay .

Hum se Ali bin Abdullah ne byaan kiya , kaha hum se Sufyan bin Uyaynah ne byaan kiya , un se Amr bin Dinar ne , un se Abu al-Abbas nabina shair ne aur un se Abdullah bin Umar razi Allahu anhuma ne , unhon ne byaan kiya ke jab Rasool Allah salla Allahu alaihi wasallam ne Taif ka muasara kiya to dushman ka kuch bhi nuqsan nahi kiya . Aakhir Aap ne farmaya ke ab In sha Allah hum wapas ho jayein ge . Musalmanon ke liye nakam lautna bara shaq guzra . Unhon ne kaha ke wah baghair fatah ke hum wapas chale jayein (rawi ne) ek martaba «nazhhab» ke bajaye «naqfil» ka lafz istemal kiya yani hum . . . laut jayein aur Taif ko fatah na karein (yeh kyonkar ho sakta hai) is par Nabi Karim salla Allahu alaihi wasallam ne farmaya ke phir subah sawere maidan mein jang ke liye aa jao . Pas woh sahabah sawere hi aa gaye lekin un ki bari tadaad zakhmi ho gayi . Ab phir Nabi Karim salla Allahu alaihi wasallam ne farmaya ke In sha Allah hum kal wapas chalein ge . Sahabah ne usay bahut pasand kiya . Aap salla Allahu alaihi wasallam is par hans paray . Aur Sufyan ne ek martaba byaan kiya ke Nabi Karim salla Allahu alaihi wasallam muskura diye . Humaydi ne kaha ke hum se Sufyan ne yeh poori khabar byaan ki .

Hum se Muhammad bin Bashar ne byaan kiya , kaha hum se Ghundar (Muhammad bin Jafar) ne byaan kiya , un se Shubah ne byaan kiya , un se Aasim bin Sulayman ne byaan kiya , unhon ne Abu Usman Nahdi se suna kaha main ne Saad bin Abi Waqqas razi Allahu anhu se suna , jinon ne sab se pehle Allah ke raste mein teer chalaya tha aur Abu Bakrah razi Allahu anhu se jo Taif ke qile par chand Musalmanon ke saath charhay thay aur is tarah Nabi Karim salla Allahu alaihi wasallam ki khidmat mein hazir huay thay . In donon sahabiyon ne byaan kiya ke hum ne Nabi Karim salla Allahu alaihi wasallam se suna , Aap farma rahe thay ke jo shakhs jaante huay apne baap ke siwa kisi doosre ki taraf apne aap ko mansoob kare to us par jannat haram hai . Aur Hisham ne byaan kiya aur unhein Mamar ne khabar di , unhein Aasim ne , unhein Abu al-Aaliyah ya Abu Usman Nahdi ne , kaha ke main ne Saad bin Abi Waqqas razi Allahu anhu aur Abu Bakrah razi Allahu anhu se suna ke Nabi Karim salla Allahu alaihi wasallam ne farmaya , Aasim ne byaan kiya ke main ne (Abu al-Aaliyah ya Abu Usman Nahdi razi Allahu anhu) se kaha Aap se yeh riwayat aise do as-haab (Saad aur Abu Bakrah razi Allahu anhuma) ne byaan ki hai ke yaqeen ke liye un ke naam kafi hain . Unhon ne kaha yaqeenan in mein se ek (Saad bin Abi Waqqas razi Allahu anhu) to woh hain jinon ne Allah ke raste mein sab se pehle teer chalaya tha aur doosre (Abu Bakrah razi Allahu anhu) woh hain jo teesway aadmi thay in logon mein jo Taif ke qile se utar kar Nabi Karim salla Allahu alaihi wasallam ke paas aaye thay .

Hum se Muhammad bin Bashar ne byaan kiya , kaha hum se Ghundar (Muhammad bin Jafar) ne byaan kiya , un se Shubah ne byaan kiya , un se Aasim bin Sulayman ne byaan kiya , unhon ne Abu Usman Nahdi se suna kaha main ne Saad bin Abi Waqqas razi Allahu anhu se suna , jinon ne sab se pehle Allah ke raste mein teer chalaya tha aur Abu Bakrah razi Allahu anhu se jo Taif ke qile par chand Musalmanon ke saath charhay thay aur is tarah Nabi Karim salla Allahu alaihi wasallam ki khidmat mein hazir huay thay . In donon sahabiyon ne byaan kiya ke hum ne Nabi Karim salla Allahu alaihi wasallam se suna , Aap farma rahe thay ke jo shakhs jaante huay apne baap ke siwa kisi doosre ki taraf apne aap ko mansoob kare to us par jannat haram hai . Aur Hisham ne byaan kiya aur unhein Mamar ne khabar di , unhein Aasim ne , unhein Abu al-Aaliyah ya Abu Usman Nahdi ne , kaha ke main ne Saad bin Abi Waqqas razi Allahu anhu aur Abu Bakrah razi Allahu anhu se suna ke Nabi Karim salla Allahu alaihi wasallam ne farmaya , Aasim ne byaan kiya ke main ne (Abu al-Aaliyah ya Abu Usman Nahdi razi Allahu anhu) se kaha Aap se yeh riwayat aise do as-haab (Saad aur Abu Bakrah razi Allahu anhuma) ne byaan ki hai ke yaqeen ke liye un ke naam kafi hain . Unhon ne kaha yaqeenan in mein se ek (Saad bin Abi Waqqas razi Allahu anhu) to woh hain jinon ne Allah ke raste mein sab se pehle teer chalaya tha aur doosre (Abu Bakrah razi Allahu anhu) woh hain jo teesway aadmi thay in logon mein jo Taif ke qile se utar kar Nabi Karim salla Allahu alaihi wasallam ke paas aaye thay .

Hum se Muhammad bin Alaa ne byaan kiya , kaha hum se Abu Usamah ne byaan kiya , un se Burayd bin Abdullah ne , un se Abu Burdah ne aur un se Abu Musa Ash'ari razi Allahu anhu ne byaan kiya ke main Nabi Karim salla Allahu alaihi wasallam ke qareeb hi tha jab Aap Jaranah se , jo Makkah aur Madinah ke darmiyan mein ek maqam hai utar rahe thay . Aap salla Allahu alaihi wasallam ke saath Bilal razi Allahu anhu thay . Isi dauran mein Nabi Karim salla Allahu alaihi wasallam ke paas ek badwi aaya aur kehne laga ke Aap ne jo mujh se waada kiya hai woh poora kyun nahi karte ? Aap salla Allahu alaihi wasallam ne farmaya ke tumhein bisharat ho . Is par woh badwi bola bisharat to Aap mujhe bahut de chuke phir Aap salla Allahu alaihi wasallam ne chehra mubarak Abu Musa aur Bilal ki taraf phera , Aap bahut ghussay mein maloom ho rahe thay . Aap ne farmaya is ne bisharat wapas kar di ab tum donon usay qabool kar lo . In donon hazrat ne arz kiya ke hum ne qabool kiya . Phir Aap ne pani ka ek piyala talab farmaya aur apne donon hathon aur chehre ko is mein dhoya aur isi mein kulli ki aur (Abu Musa Ash'ari razi Allahu anhu aur Bilal razi Allahu anhu har do se) farmaya ke is ka pani pee lo aur apne chehron aur seenon par usay daal lo aur bisharat haasil karo . In donon ne piyala le liya aur hidayat ke mutabiq amal kiya . Parda ke peeche se Umm Salamah razi Allahu anha ne bhi kaha apni maan ke liye bhi kuch chhor dena . Chunanche in donon ne un ke liye ek hissa chhor diya .

Hum se Yaqoob bin Ibrahim ne byaan kiya , kaha hum se Ismail bin Ibrahim bin Aliyyah ne byaan kiya , un se Ibn Jurayj ne byaan kiya , kaha mujh ko Ata bin Abi Rabah ne khabar di , unhein Safwan bin Yala bin Umayyah ne khabar di ke Yala ne kaha kaash main Rasool Allah salla Allahu alaihi wasallam ko is waqt dekh sakta jab Aap par wahi nazil hoti hai . Byaan kiya ke Nabi Karim salla Allahu alaihi wasallam Jaranah mein thehray huay thay . Aap ke liye ek kapre se saya kar diya gaya tha aur is mein chand sahabah razi Allahu anhum bhi Aap ke saath maujood thay . Itne mein ek aarabi aaye woh ek jubba pehne huay thay , khushbu mein basa hua . Unhon ne arz kiya: ya Rasool Allah! Ek aise shakhs ke baare mein Aap ka kya hukm hai jo apne jubba mein khushbu lagane ke baad ihram bandhe ? Furan hi Umar razi Allahu anhu ne Yala razi Allahu anhu ko aane ke liye hath se isharah kiya . Yala razi Allahu anhu hazir ho gaye aur apna sar (Nabi Karim salla Allahu alaihi wasallam ko dekhne ke liye) andar kiya (nuzool e wahi ki kaifiyat se) Nabi Karim salla Allahu alaihi wasallam ka chehra mubarak surkh ho raha tha aur zor zor se saans chal rahi thi . Thori der tak yahi kaifiyat rahi phir khatam ho gayi to Aap salla Allahu alaihi wasallam ne daryaft farmaya ke abhi umrah ke mutalliq jis ne sawal kiya tha woh kahan hai ? Unhein talash kar ke laya gaya to Aap salla Allahu alaihi wasallam ne farmaya ke jo khushbu tum ne laga rakkhi hai usay teen martaba dho lo aur jubba utaar do aur phir umrah mein wahi kaam karo jo hajj mein karte ho .

Hum se Musa bin Ismail ne byaan kiya , kaha hum se Wuhayb bin Khalid ne byaan kiya , un se Amr bin Yahya ne , un se Abbad bin Tamim ne , un se Abdullah bin Zayd bin Aasim razi Allahu anhu ne byaan kiya ke Ghazwa Hunayn ke mauqa par Allah Ta'ala ne apne Rasool ko jo ghanimat di thi Aap ne is ki taqseem kamzor iman ke logon mein (jo Fatah Makkah ke baad iman laye thay) kar di aur Ansar ko is mein se kuch nahi diya . Is ka unhein kuch malal hua ke woh maal jo Nabi Karim salla Allahu alaihi wasallam ne doosron ko diya unhein kyun nahi diya . Aap ne is ke baad unhein khitab kiya aur farmaya: Ae Ansariyo! Kya main ne tumhein gumrah nahi paya tha phir tum ko mere zariye Allah Ta'ala ne hidayat naseeb ki aur tum mein aapas mein dushmani aur na-ittifaqi thi to Allah Ta'ala ne mere zariye tum mein baaham ulfat paida ki aur tum muhtaj thay Allah Ta'ala ne mere zariye ghani kiya . Aap ke ek ek jumle par Ansar kehte jate thay ke Allah aur us ke Rasool ke hum sab se zyada ihsan mand hain . Aap salla Allahu alaihi wasallam ne farmaya ke meri baaton ka jawab dene se tumhein kya cheez manay rahi ? Byaan kiya ke Aap salla Allahu alaihi wasallam ke har isharah par Ansar arz karte jate ke Allah aur us ke Rasool ke hum sab se zyada ihsan mand hain phir Aap salla Allahu alaihi wasallam ne farmaya ke agar tum chahte to mujh se is tarah bhi keh sakte thay (ke Aap aaye to log Aap ko jhutla rahe thay , lekin hum ne Aap ki tasdeeq ki waghaira) kya tum is par khush nahi ho ke jab log oont aur bakriyan le ja rahe hon to tum apne gharon ki taraf Rasool Allah salla Allahu alaihi wasallam ko saath le jao ? Agar hijrat ki fazeelat na hoti to main bhi Ansar ka ek aadmi hota . Log khwah kisi ghati ya wadi mein rahein ge main to Ansar ki ghati aur wadi mein rahoon ga . Ansar astar ki tarah hain jo jism se hamesha laga rehta hai aur doosre log oopar ke kapre yani abrah ki tarah hain . Tum log (Ansar) dekho ge ke mere baad tum par doosron ko tarjeeh di jaye gi . Tum aise waqt mein sabr karna yahan tak ke mujh se haudh par aa milo .

Mujh se Abdullah bin Muhammad ne byaan kiya , kaha hum se Hisham bin Urwah ne byaan kiya , unhein Mamar ne khabar di , un se Zuhri ne byaan kiya aur unhein Anas bin Malik razi Allahu anhu ne khabar di , byaan kiya ke jab qabila Hawazin ke maal mein se Allah Ta'ala ne apne Rasool ko jo dena tha woh diya to Ansar ke kuch logon ko ranj hua kyunke Aap salla Allahu alaihi wasallam ne kuch logon ko sau sau oont de diye thay . Kuch logon ne kaha ke Allah apne Rasool ki maghfirat kare , Quraysh ko to Aap inayat farma rahe hain aur hum ko Aap ne chhor diya hai haalan ke hamari talwaron se un ka khoon tapak raha hai . Anas razi Allahu anhu ne byaan kiya ke Ansar ki yeh baat Nabi Karim salla Allahu alaihi wasallam ke kanon mein aayi to Aap ne unhein bula bheja aur chamre ke ek khaime mein unhein jama kiya , un ke saath un ke alawa kisi ko bhi Aap ne nahi bulaya tha . Jab sab log jama ho gaye to Aap salla Allahu alaihi wasallam kharay huay aur Aap ne farmaya tumhari jo baat mujhe maloom hui hai kya woh sahi hai ? Ansar ke jo samajhdar log thay unhon ne arz kiya: ya Rasool Allah! Jo log hamare muazzaz aur sardar hain , unhon ne aisi koi baat nahi kahi . Albatta hamare kuch log jo abhi nau-umr hain , unhon ne kaha hai ke Allah , Rasool Allah salla Allahu alaihi wasallam ki maghfirat kare , Quraysh ko Aap de rahe hain aur hamain Aap ne chhor diya hai haalan ke hamari talwaron se un ka khoon tapak raha hai . Nabi Karim salla Allahu alaihi wasallam ne is par farmaya ke main aise logon ko deta hoon jo abhi naye naye Islam mein dakhil huay hain , is tarah main un ki dil-joi karta hoon . Kya tum is par raazi nahi ho ke doosre log to maal o daulat le jayein aur tum Nabi ko apne saath apne ghar le jao . Allah ki qasam! Jo cheez tum apne saath le jao ge woh is se behtar hai jo woh le ja rahe hain . Ansar ne arz kiya: ya Rasool Allah! Hum is par raazi hain . Is ke baad Nabi Karim salla Allahu alaihi wasallam ne farmaya ke mere baad tum dekho ge ke tum par doosron ko tarjeeh di jaye gi . Is waqt sabr karna , yahan tak ke Allah aur us ke Rasool se aa milo . Main Haudh e Kawsar par miloon ga . Anas razi Allahu anhu ne kaha lekin Ansar ne sabr nahi kiya .

Hum se Sulayman bin Harb ne byaan kiya , kaha hum se Shubah ne byaan kiya , un se Abu al-Tayyah ne aur un se Anas bin Malik razi Allahu anhu ne byaan kiya ke Fatah Makkah ke zamane mein Nabi Karim salla Allahu alaihi wasallam ne Quraysh mein (Hunayn ki) ghanimat ki taqseem kar di . Ansar razi Allahu anhum is se ranjeeda huay . Aap salla Allahu alaihi wasallam ne farmaya kya tum is par raazi nahi ho ke doosre log duniya apne saath le jayein aur tum apne saath Rasool Allah salla Allahu alaihi wasallam ko le jao . Ansar ne arz kiya ke hum is par khush hain . Aap salla Allahu alaihi wasallam ne farmaya ke log doosre kisi wadi ya ghati mein rahein to main Ansar ki wadi ya ghati mein rahoon ga .