Hum se Ismail bin Abi Uways ne byaan kiya , unhon ne kaha ke hum se Sulayman bin Hilal ne byaan kiya ke Hisham bin Urwah ne kaha ke mujhe mere baap Urwah bin Zubayr ne Umm al-Momineen Aishah Siddiqah razi Allahu anha se khabar di , unhon ne kaha ke Abdur Rahman bin Abi Bakr (ek marteba) aye . Un ke haath mein miswaak thi jisay woh istimal kiya karte thay . Rasool Allah salla Allahu alaihi wasallam ne bimari ki haalat mein un se kaha Abdur Rahman yeh miswaak mujhe de de . Unhon ne de di . Main ne us ke sire ko pehle tora yani itni lakri nikaal di jo Abdur Rahman apne munh se lagaya karte thay , phir usay chaba kar Rasool Allah salla Allahu alaihi wasallam ko de diya . Nabi Karim salla Allahu alaihi wasallam ne us se daant saaf kiye aur Aap salla Allahu alaihi wasallam us waqt mere seene par take lagaye huay thay .

Hum se Ismail bin Abi Uwais ne byaan kiya ‘ kaha ke mujh se Sulayman bin Bilal ne byaan kiya aur un se Hisham bin Urwah ne (doosri sanad . Imam Bukhari rahmahu Allah ne kaha) aur mujh se Muhammad bin Harb ne byaan kiya ‘ kaha hum se Abu Marwan Yahya bin Abi Zakariyya ne byaan kiya , un se Hisham bin Urwah ne , un se Urwah bin Zubayr ne aur un se Aisha razi Allahu anha ne ke Rasool Allah salla Allahu alaihi wasallam apne marad-ul-wafat mein goya ijazat lena chahte thay (daryaft farmate) aaj meri bari kin ke yahan hai . Kal kin ke yahan ho gi ? Aisha razi Allahu anha ki bari ke din ke mutalliq khayal farmate thay ke bahut din baad aaye gi . Chunanche jab meri bari aayi to Allah Ta'ala ne Aap salla Allahu alaihi wasallam ki rooh is haal mein qabz ki ke Aap salla Allahu alaihi wasallam mere seene se taik lagaye hue thay aur mere hi ghar mein Aap salla Allahu alaihi wasallam dafan kiye gaye .

Hum se Said Bin Abi Maryam ne bayan kiya, kaha hum se Nafi ne bayan kiya, kaha ke mein ne Ibn Abi Mulika se suna. Unhon ne bayan kiya ke Aisha (Radi Allahu Anha) ne kaha ke Rasul Allah (Sallallahu Alaihi Wasallam) ne mere ghar, meri bari ke din, mere halaq aur seene ke darmiyan taik lagaye hue wafat payi, Allah Ta'ala ne (wafat ke waqt) mere thook aur Nabi Kareem (Sallallahu Alaihi Wasallam) ke thook ko ek sath jama kar diya tha, bayan kiya (wo is tarah ke) Abdur Rahman (Radi Allahu Anhu) (Aisha Radi Allahu Anha ke bhai) miswak liye hue andar aaye. Aap (Sallallahu Alaihi Wasallam) ise chaba na sake. Is liye mein ne ise apne hath mein le liya aur mein ne ise chabane ke baad wo miswak aap ke daanton par mali
.

Mujh se Ubaid Bin Ismail ne bayan kiya, kaha hum se Abu Usama ne bayan kiya, un se Hisham ne, un se un ke walid ne ke Rasul Allah Sallallahu Alaihi Wasallam apne marz-ul-wafat mein bhi Azwaj-e-Mutahharat ki bari ki pabandi farmate rahe albatta ye daryaft farmate rahe ke kal mujhe kis ke yahan theherna hai? Kyunke aap Aisha Radi Allahu Anha ki bari ke khwahon thay. Aisha Radi Allahu Anha ne bayan kiya ke jab mere yahan qiyam ka din aaya to aap ko sukoon hua
.

Hum se Muhammad bin Yahya Zhuhli ne byaan kiya . Kaha hum se Affan bin Muslim ne byaan kiya , un se Sakhr bin Juwayriyah ne , un se Abdur Rahman bin Qasim ne , un se un ke walid (Qasim bin Muhammad) ne aur un se Aisha razi Allahu anha ne ke (un ke bhai) Abdur Rahman bin Abi Bakr razi Allahu anhu Nabi Karim salla Allahu alaihi wasallam ki khidmat mein hazir huay . Nabi Karim salla Allahu alaihi wasallam mere seene se taik lagaye huay thay . Abdur Rahman razi Allahu anhu ke hath mein ek taza miswak istemal ke liye thi . Aap salla Allahu alaihi wasallam is miswak ki taraf dekhte rahe . Chunanche main ne un se miswak le li aur usay apne daanton se chaba kar achhi tarah jhaarne aur saaf karne ke baad Nabi Karim salla Allahu alaihi wasallam ko de di . Aap ne woh miswak istemal ki jitne umdah tariqa se Aap salla Allahu alaihi wasallam is waqt miswak kar rahe thay , main ne Aap ko itni achhi tarah miswak karte kabhi nahi dekha . Miswak se farigh hone ke baad Aap ne apna hath ya apni ungli uthayi aur farmaya . «fir rafeeqil aa'la» teen martaba , aur Aap ka intiqal ho gaya . Aisha razi Allahu anha kaha karti thien ke Nabi Karim salla Allahu alaihi wasallam ki wafat hui to sar mubarak meri hansli aur thori ke darmiyan mein tha .

Hum se Abdullah bin Yusuf ne byaan kiya , kaha hum se Layth bin Saad ne byaan kiya , kaha ke mujh se Yazid bin al-Haad ne byaan kiya , un se Abdur Rahman bin Qasim ne , un se un ke walid Qasim bin Muhammad ne aur un se Aisha razi Allahu anha ne byaan kiya ke Nabi Karim salla Allahu alaihi wasallam ki wafat hui to Aap meri hansli aur thori ke darmiyan (sar rakkhe huay) thay . Aap salla Allahu alaihi wasallam (ki shiddat e sakarat) dekhne ke baad ab main kisi ke liye bhi naza ki shiddat ko bura nahi samajhti .

Mujh se Muhammad bin Ubayd ne byaan kiya , kaha hum se Esa bin Yunus ne byaan kiya , un se Amr bin Saeed ne , unhein Ibn Abi Mulaykah ne khabar di aur unhein Aisha razi Allahu anha ke ghulam Abu Amr Zhakwan ne ke Aisha razi Allahu anha farmaya karti thien , Allah ki bahut si ni'maton mein ek ni'mat mujh par yeh bhi hai ke Rasool Allah salla Allahu alaihi wasallam ki wafat mere ghar mein aur meri baari ke din hui . Aap is waqt mere seene se taik lagaye huay thay . Aur yeh ke Allah Ta'ala ne Aap salla Allahu alaihi wasallam ki wafat ke waqt mere aur Aap ke thook ko ek saath jama kiya tha ke Abdur Rahman razi Allahu anhu ghar mein aaye to un ke hath mein miswak thi . Aap salla Allahu alaihi wasallam mujh par taik lagaye huay thay , main ne dekha ke Aap salla Allahu alaihi wasallam is miswak ko dekh rahe hain . Main samajh gayi ke Aap miswak karna chahte hain , is liye main ne Aap se poocha , yeh miswak Aap ke liye le loon ? Aap salla Allahu alaihi wasallam ne sar ke isharah se isbat mein jawab diya , main ne woh miswak un se le li . Aap salla Allahu alaihi wasallam usay chaba na sake , main ne poocha Aap ke liye main usay narm kar doon ? Aap ne sar ke isharah se isbat mein jawab diya . Main ne miswak narm kar di . Aap ke samne ek bara piyala tha , chamre ka ya lakri ka (rawi e hadees) Amr ko is silsile mein shak tha , is ke andar pani tha , Nabi Karim salla Allahu alaihi wasallam baar baar apne hath is ke andar dakhil karte aur phir unhein apne chehre par pherte aur farmate «la ilaha illallah» . Maut ke waqt shiddat hoti hai phir Aap salla Allahu alaihi wasallam apna hath utha kar kehne lage «fir rafeeqil aa'la» yahan tak ke Aap rahlat farma gaye aur Aap ka hath jhuk gaya .

Hum se Ismail ne byaan kiya , kaha mujh se Sulayman bin Bilal ne byaan kiya , kaha hum se Hisham bin Urwah ne byaan kiya , unhein un ke walid ne khabar di aur unhein Aisha razi Allahu anha ne ke marz al-maut mein Rasool Allah salla Allahu alaihi wasallam poochte rehte thay ke kal mera qiyam kahan ho ga , kal mera qiyam kahan ho ga ? Aap Aisha razi Allahu anha ki baari ke muntazir thay , phir azwaj e mutahharat razi Allahu anhun ne Aisha razi Allahu anha ke ghar qiyam ki ijazat de di aur Aap ki wafat unhi ke ghar mein hui . Aisha razi Allahu anha ne byaan kiya ke Aap ki wafat isi din hui jis din qayada ke mutabiq mere yahan Aap ke qiyam ki baari thi . Rahlat ke waqt sar mubarak mere seene par tha aur mera thook Aap ke thook ke saath mila tha . Unhon ne byaan kiya ke Abdur Rahman bin Abi Bakr razi Allahu anhuma dakhil huay aur un ke hath mein istemal ke qabil miswak thi . Aap salla Allahu alaihi wasallam ne is ki taraf dekha to main ne kaha: Abdur Rahman! Yeh miswak mujhe de do . Unhon ne miswak mujhe de di . Main ne usay achhi tarah chabaya aur jhaar kar Aap salla Allahu alaihi wasallam ko di , phir Aap ne woh miswak ki , is waqt Aap mere seene se taik lagaye huay thay .

Hum se Sulayman bin Harb ne byaan kiya , kaha hum se Hammad bin Zayd ne byaan kiya , in se Ayub ne , un se Ibn Abi Mulaykah ne aur un se Aisha razi Allahu anha ne byaan kiya ke Rasool Allah salla Allahu alaihi wasallam ki wafat mere ghar mein , meri baari ke din hui . Aap is waqt mere seene se taik lagaye huay thay . Jab Aap beemar pare to hum Aap ki sehat ke liye duaein kiya karte thay . Is beemari mein bhi main Aap ke liye dua karne lagi lekin Aap salla Allahu alaihi wasallam farma rahe thay aur Aap ka sar aasman ki taraf utha hua tha «fir rafeeqil aa'la fir rafeeqil aa'la» aur Abdur Rahman bin Abi Bakr razi Allahu anhuma aaye to un ke hath mein ek taza tehni thi . Aap salla Allahu alaihi wasallam ne is ki taraf dekha to main samajh gayi ke Aap salla Allahu alaihi wasallam miswak karna chahte hain . Chunanche woh tehni main ne un se le li . Pehle main ne usay chabaya , phir saaf kar ke Aap ko de di . Aap salla Allahu alaihi wasallam ne is se miswak ki , jis tarah pehle Aap miswak kiya karte thay is se bhi achhi tarah se . Phir Aap salla Allahu alaihi wasallam ne woh miswak mujhe inayat farmayi aur Aap ka hath jhuk gaya , ya (rawi ne yeh byaan kiya ke) miswak Aap ke hath se chhoot gayi . Is tarah Allah Ta'ala ne mere aur Aap salla Allahu alaihi wasallam ke thook ko is din jama kar diya jo Aap ki duniya ki zindagi ka sab se aakhri aur aakhirat ki zindagi ka sab se pehla din tha .

Hum se Ismail bin Abi Oways ne byaan kiya , kaha ke mujh se Sulayman bin Bilal ne byaan kiya , in se Hisham bin Urwah ne byaan kiya , unhein un ke walid ne khabar di aur unhein Aisha razi Allahu anha ne ke Rasool Allah salla Allahu alaihi wasallam ki jis marz mein wafat hui , is mein Aap poocha karte thay ke kal meri baari kis ke yahan hai ? Kal meri baari kis ke yahan hai ? Aap ko Aisha ki baari ka intizar thu . Chunanche Aap ki tamam azwaj ne Aap ko is ki ijazat de di ke Aap jahan chahein beemari ke din guzarein . Nabi Karim salla Allahu alaihi wasallam Aisha razi Allahu anha ke ghar aa gaye aur yahien Aap ki wafat hui . Aisha razi Allahu anha ne byaan kiya ke Nabi Karim salla Allahu alaihi wasallam ki isi din wafat hui jo meri baari ka din tha aur Allah Ta'ala ka yeh bhi ihsan dekho us ne jab Nabi Karim salla Allahu alaihi wasallam ko apne yahan bulaya to Nabi Karim salla Allahu alaihi wasallam ka sar mubarak meere seene par tha aur Nabi Karim salla Allahu alaihi wasallam ka lu-aab e dahan meere lu-aab e dahan se mila .

Hum se Muhammad bin Ubaid bin Maymoon ne bayan kiya , unhon ne kaha hum se Esa bin Yunus ne bayan kiya , in se Amr bin Saeed ne bayan kiya , unhon ne kaha mujhko Ibn Abi Mulaykah ne khabar di , unhein Aisha razi Allahu anha ke ghulam Abu Amr Zhakwan ne khabar di ke Umm al-Momineen Aisha Siddiqa razi Allahu anha kaha karti thien ke Rasool Allah salla Allahu alaihi wasallam (ki wafat ke waqt) Aap ke samne ek bada pani ka piyala rakkha hua tha jis mein pani tha . Yeh Amr ko shubha hua ke haandi ka kounda thu . Nabi Karim salla Allahu alaihi wasallam apna hath is bartan mein daalte aur phir is hath ko apne chehre par malte aur farmate Allah ke siwa koi mabood nahi , bilashubha maut mein takleef hoti hai , phir Aap apna hath utha kar farmane lage «fir-rafeeqil-a'laa» yahan tak ke Aap ki rooh mubarak qabz ho gayi aur Aap ka hath jhuk gaya .