Hum se Yahya Bin Bukair ne bayan kiya, kaha hum se Lais ne bayan kiya, un se Yunus ne, un se Ibn Shihab ne bayan kiya, un se Abu Salama ne bayan kiya aur un se Aisha Radi Allahu Anha ne bayan kiya ke Rasul Allah Sallallahu Alaihi Wasallam ne ek din farmaya " Ay Aish ye Jibrail Alaihis Salam tashreef farma hain aur tumhein salam kehte hain " mein ne is par jawab diya wa alaihis salamu wa rahmatullahi wa barakatuhu, aap wo cheez mulahiza farmate hain jo mujh ko nazar nahi aati (aap ki murad Nabi Kareem Sallallahu Alaihi Wasallam se thi)
.

Hum se Adam ne bayan kiya, kaha hum se Shuba ne bayan kiya, kaha (Imam Bukhari Rahimahullah ne) aur hum se Amr ne bayan kiya, kaha hum ko Shuba ne khabar di, unhein Amr Bin Murrah ne, unhein Murrah ne aur unhein Abu Musa Ashari Radi Allahu Anhu ne ke Nabi Kareem Sallallahu Alaihi Wasallam ne farmaya " Mardon mein to bahut se kamil paida hue lekin aurton mein Maryam Bint Imran, Firaun ki biwi Asiyah ke siwa aur koi kamil paida nahi hui, aur Aisha ki fazilat aurton par aisi hai jaise sareed ki fazilat baqiya tamam khanon par hai. "
.

Hum se Abdul Aziz Bin Abdullah ne bayan kiya, kaha ke mujh se Muhammad Bin Jafar ne bayan kiya, un se Abdullah Bin Abdur Rahman ne aur unhon ne Anas Bin Malik Radi Allahu Anhu se suna, unhon ne bayan kiya ke mein ne Rasul Allah Sallallahu Alaihi Wasallam ko ye farmate hue suna hai ke Aisha Radi Allahu Anha ki fazilat baqi aurton par aisi hai jaise sareed ki fazilat aur tamam khanon par
.

Muhammad Bin Bashar ne mujh se bayan kiya, kaha hum se Abdul Wahhab Bin Abdul Majeed ne bayan kiya, hum se Ibn Aun ne bayan kiya, un se Qasim Bin Muhammad ne ke Aisha Radi Allahu Anha bimar parheen to Ibn Abbas Radi Allahu Anhuma iyadat ke liye aaye aur arz kiya: Umm-ul-Momineen! Aap to sacche jaane wale ke paas ja rahi hain, yani Rasul Allah Sallallahu Alaihi Wasallam aur Abu Bakr ke paas (alam-e-barzakh mein un se mulaqat murad thi)
.

Hum se Muhammad Bin Bashar ne bayan kiya, kaha hum se Ghundar ne bayan kiya, un se Shuba ne bayan kiya, un se Hakam ne aur unhon ne Abu Wail se suna, unhon ne bayan kiya ke jab Ali Radi Allahu Anhu ne Ammar aur Hasan Radi Allahu Anhuma ko Kufa bheja tha taake logon ko apni madad ke liye tayyar karein to Ammar Radi Allahu Anhu ne un se khitab karte hue farmaya tha: Mujhe bhi khoob maloom hai ke Aisha Radi Allahu Anha Rasul Allah Sallallahu Alaihi Wasallam ki zaujah hain is duniya mein bhi aur akhirat mein bhi, lekin Allah Ta'ala tumhein azmana chahta hai ke dekhe tum Ali Radi Allahu Anhu ki ittaba karte ho (jo barhaqq khalifa hain) ya Aisha Radi Allahu Anha ki
.

Hum se Ubaid Bin Ismail ne bayan kiya, kaha hum se Abu Usama ne bayan kiya, un se Hisham ne, un se un ke walid ne aur un se Aisha Radi Allahu Anha ne ke (Nabi Kareem Sallallahu Alaihi Wasallam ke sath ek ghazwa mein jaane ke liye) aap ne (apni behen) Asma Radi Allahu Anha se ek haar aariyatan le liya tha, ittifaq se wo raste mein kahin gum ho gaya, Nabi Kareem Sallallahu Alaihi Wasallam ne ise talash karne ke liye chand Sahaba ko bheja, is dauran mein namaz ka waqt ho gaya to in hazrat ne baghair wuzu ke namaz parh li, phir jab aap Sallallahu Alaihi Wasallam ki khidmat mein hazir hue to aap se surat-e-haal ke mutaliq arz kiya. Is ke baad tayammum ki ayat nazil hui. Is par Usaid Bin Hudair Radi Allahu Anhu ne kaha: Tumhein Allah Ta'ala jazaye khair de, Allah ki qasam! Tum par jab bhi koi marhala aaya to Allah Ta'ala ne is se nikalne ki sabil tumhare liye paida kar di, aur tamam musalmanon ke liye bhi is mein barkat paida farmai
.

Mujh se Ubaid Bin Ismail ne bayan kiya, kaha hum se Abu Usama ne bayan kiya, un se Hisham ne, un se un ke walid ne ke Rasul Allah Sallallahu Alaihi Wasallam apne marz-ul-wafat mein bhi Azwaj-e-Mutahharat ki bari ki pabandi farmate rahe albatta ye daryaft farmate rahe ke kal mujhe kis ke yahan theherna hai? Kyunke aap Aisha Radi Allahu Anha ki bari ke khwahon thay. Aisha Radi Allahu Anha ne bayan kiya ke jab mere yahan qiyam ka din aaya to aap ko sukoon hua
.

Hum se Abdullah Bin Abdul Wahhab ne bayan kiya, kaha hum se Hammad ne kaha, hum se Hisham ne, unhon ne apne walid (Urwah) se, unhon ne kaha ke log aap Sallallahu Alaihi Wasallam ko tuhfe bhejne mein Aisha Radi Allahu Anha ki bari ka intezar kiya karte thay. Aisha Radi Allahu Anha kehti hain ke meri souknein sab Umm Salama Radi Allahu Anha ke paas gayeen aur un se kaha: Allah ki qasam log jaan boojh kar apne tuhfe is din bhejte hain jis din Aisha Radi Allahu Anha ki bari hoti hai, hum bhi Aisha Radi Allahu Anha ki tarah apne liye faida chahti hain, is liye tum Nabi Kareem Sallallahu Alaihi Wasallam se kaho ke aap logon ko farma dein ke mein jis bhi biwi ke paas rahoon jis ki bhi bari ho isi ghar mein tuhfe bhej diya karo. Umm Salama Radi Allahu Anha ne ye baat aap Sallallahu Alaihi Wasallam ke samne bayan ki, aap ne kuch bhi jawab nahi diya. Unhon ne dobara arz kiya jab bhi jawab na diya, phir teesri baar arz kiya to aap Sallallahu Alaihi Wasallam ne farmaya: Ay Umm Salama! Aisha ke bare mein mujh ko na satao. Allah ki qasam! Tum mein se kisi biwi ke luhaf mein (jo mein odhta hoon sote waqt) mujh par wahyi nazil nahi hoti haan (Aisha ka maqam ye hai) un ke luhaf mein wahyi nazil hoti hai
.