Hum se Umar bin Aun ne bayan kiya, kaha hum se Khalid aur Hushaim ne bayan kiya, in se Ismail ne, in se Qays ne aur in se Jareer razi Allahu anhune ke hum Nabi Karim salla Allahu alaihi wasallam ki khidmat mein baithe thay ke Aap ne chaand ki taraf dekha, choudhvein raat ka chaand thu aur farmaya ke tum log apne Rabb ko isi tarah dekho ge jis tarah is chaand ko dekh rahe ho aur is ke dekhne mein koi dhakam-peil nahi ho gi. Pas agar tumhein is ki taqat ho ke sooraj tuloo hone ke pehle aur sooraj ghuroob hone ke baad ki namazon mein susti na ho to aisa kar lo.

Hum se Abdullah bin Zubair Humaidi ne bayan kiya , kaha hum se Marwan bin Muawiya ne , kaha hum se Ismail bin Abi Khalid ne Qais bin Abi Hazim se . Unhon ne Jarir bin Abdullah Bajli raziyallahu anhu se , unhon ne kaha ke hum Nabi Karim salla Allahu alaihi wa sallam ki khidmat mein mojood thay . Aap salla Allahu alaihi wa sallam ne chand par ek nazar dali phir farmaya ke tum apne Rab ko aakhir mein isi tarah dekhoge jaisay is chand ko ab dekh rahe ho . Is ke dekhne mein tum ko koi zehmat bhi nahi ho gi , pas agar tum aisa kar sakte ho ke sooraj tulu hone se pehle wali namaz fajr aur sooraj ghuroob hone se pehle wali namaz asr se tumhein koi cheez rok na sake to aisa zaroor karo . Phir aap salla Allahu alaihi wa sallam ne yeh ayat tilawat farmayi ke pas apne Malik ki hamd wa tasbeeh kar sooraj tulu hone aur ghuroob hone se pehle . Ismail raawi hadees ne kaha ke asr aur fajr ki namazen tum se chhootne na payen . Un ka hamesha khas tor par dhiyan rakho .

Hum se Musaddad ne bayan kiya , kaha hum se Yahya ne Ismail se , kaha hum se Qais ne bayan kiya , kaha mujh se Jarir bin Abdullah ne bayan kiya , ke hum Nabi Karim salla Allahu alaihi wa sallam ki khidmat mein hazir thay aap salla Allahu alaihi wa sallam ne chand ki taraf nazar uthayi jo chaudhvin raat ka tha . Phir farmaya ke tum log be tok apne Rab ko isi tarah dekhoge jaisay is chand ko dekh rahe ho is ke dekhne mein tum ko kisi qisam ki bhi muzahmat na ho gi ya yeh farmaya ke tumhein is ke deedar mein mutlaq shubha na ho ga is liye agar tum se sooraj ke tulu aur ghuroob se pehle fajr aur asr ki namazon ke parhne mein kotahi na ho sake to aisa zaroor karo . Kyunke in hi ke tafail deedar ilahi naseeb ho ga ya in hi waqton mein yeh ruyat mile gi phir aap salla Allahu alaihi wa sallam ne yeh ayat tilawat farmayi fasabbih bihamdi rabbika qabla tulu al-shams wa qabla ghurubiha pas apne Rab ke hamd ki tasbeeh parh sooraj ke nikalne aur is ke ghuroob hone se pehle . Imam Abu Abdullah Bukhari rahimahullah ne kaha ke Ibn Shihab ne Ismail ke wastay se jo Qais se bo-wastay Jarir raawi hain yeh zyadti naql ki ke Nabi Karim salla Allahu alaihi wa sallam ne farmaya tum apne Rab ko saaf dekhoge .

Hum se Abul Yaman ne byaan kiya , kaha ke hamein Shoaib ne Zuhri se khabar di , unhon ne byaan kiya ke mujhe Saeed bin Musayyab aur Ata bin Yazid Laythi ne khabar di ke Abu Hurayrah razi Allahu anhu ne unhein khabar di ke logon ne poocha: ya Rasool Allah! kya hum apne Rab ko qiyamat mein dekh saken ge ? Aap ne (jawab ke liye) poocha , kya tumhein chaudhween raat ke chaand ke dekhne mein jab ke us ke qareeb kahin baadal bhi na ho shubha hota hai ? Log bole hargiz nahi ya Rasool Allah! Phir Aap ne poocha aur kya tumhein sooraj ke dekhne mein jab ke us ke qareeb kahin baadal bhi na ho shubha hota hai . Logon ne kaha ke nahi ya Rasool Allah! Phir Aap ne farmaya ke Rab ul Izzat ko tum isi tarah dekho ge . Log qiyamat ke din jama kiye jayen ge . Phir Allah Taala farmaye ga ke jo jisay poojta tha woh us ke saath ho jaye . Chunanchay bohot se log sooraj ke peeche ho len ge , bohot se chaand ke aur bohot se buton ke saath ho len ge . Yeh ummat baqi reh jayegi . Is mein munafiqeen bhi hon ge . Phir Allah Taala ek nayi soorat mein aye ga aur un se kahe ga ke main tumhara Rab hoon . Woh munafiqeen kahen ge ke hum yahin apne Rab ke aane tak kharay rahen ge . Jab hamara Rab aye ga to hum usay pehchaan len ge . Phir Allah uzz o jal un ke paas (aisi soorat mein jisay woh pehchaan len) aye ga aur farmaye ga ke main tumhara Rab hoon . Woh bhi kahen ge ke beshak tu hamara Rab hai . Phir Allah Taala bulaye ga . Pul sirat jahannam ke beechon beech rakha jayega aur Nabi Karim salla Allahu alaihi wasallam farmate hain ke main apni ummat ke saath is se guzarne wala sab se pehla rasool hoon ga . Us roz siwa anbiya ke koi bhi baat na kar sake ga aur anbiya bhi sirf yeh kahen ge . Aye Allah! mujhe mehfooz rakhiyo! Aye Allah! mujhe mehfooz rakhiyo! Aur jahannam mein saadan ke kanton ki tarah aankas hon ge . Saadan ke kante to tum ne dekhe hon ge ? Sahabah razi Allahu anhum ne arz ki haan! (Aap ne farmaya) to woh saadan ke kanton ki tarah hon ge . Albatta un ke tool o arz ko siwa Allah Taala ke aur koi nahi jaanta . Yeh aankas logon ko un ke amal ke mutabiq khench len ge . Bohot se log apne amal ki wajah se halaak hon ge . Bohot se tukre tukre ho jayen ge . Phir un ki nijaat ho gi . Jahannamiyon mein se Allah Taala jis par rehm farmana chahe ga to malaika ko hukm de ga ke jo khalis Allah Taala hi ki ibaadat karte thay unhein bahar nikaal lo . Chunanchay un ko woh bahar nikaalen ge aur muwahhidoon ko sajde ke aasaar se pehchaanen ge . Allah Taala ne jahannam par sajde ke aasaar ka jalana haram kar diya hai . Chunanchay yeh jab jahannam se nikaale jayen ge to asar sajda ke siwa un ke jism ke tamam hi hisson ko aag jala chuki ho gi . Jab jahannam se bahar hon ge to bilkul jal chuke hon ge . Is liye un par aab hayaat dala jayega . Jis se woh is tarah ubhar ayen ge . Jaise sailaab ke kore karkat par sailaab ke thhamne ke baad sabza ubhar aata hai . Phir Allah Taala bandon ke hisaab se farigh ho jayega . Lekin ek shakhs jannat aur dozakh ke darmiyan ab bhi baqi reh jayega . Yeh jannat mein daakhil hone wala aakhri dozakhii shakhs ho ga . Us ka munh dozakh ki taraf ho ga . Is liye kahe ga ke aye mere Rab! mere munh ko dozakh ki taraf se pher de . Kyunke us ki badboo mujh ko maare daalti hai aur us ki chamak mujhe jalaye deti hai . Allah Taala poochhe ga kya agar teri yeh tamanna poori kar doon to tu dobara koi naya sawal to nahi kare ga ? Banda kahe ga nahi teri buzurgi ki qasam! Aur jaise jaise Allah chahe ga woh qaul o qaraar kare ga . Aakhir Allah Taala jahannam ki taraf se us ka munh pher de ga . Jab woh jannat ki taraf munh kare ga aur us ki shadabi nazron ke saamne aayi to Allah ne jitni der chaha woh chup rahe ga . Lekin phir bol pare ga aye Allah! mujhe jannat ke darwaze ke qareeb pohanche de . Allah Taala poochhe ga kya tu ne ahd o paiman nahi baandha tha ke is ek sawal ke siwa aur koi sawal tu nahi kare ga . Banda kahe ga aye mere Rab! mujhe teri makhlooq mein sab se zyada badnaseeb na hona chahiye . Allah Rab ul Izzat farmaye ga ke phir kya zimmat hai ke agar teri yeh tamanna poori kar di gayi to doosra koi sawal tu nahi kare ga . Banda kahe ga nahi teri izzat ki qasam ab doosra sawal koi tujh se nahi karoon ga . Chunanchay apne Rab se har tarah ahd o paiman baandhe ga aur jannat ke darwaze tak pohanche diya jayega . Darwaza par pohanche kar jab jannat ki panhai , tazgi aur masraton ko dekhe ga to jab tak Allah Taala chahe ga woh banda chup rahe ga . Lekin aakhir bol pare ga ke aye Allah! mujhe jannat ke andar pohanche de . Allah Taala farmaye ga . Afsos aye ibn Adam! tu aisa dagha baaz kyun ban gaya ? Kya (abhi) tu ne ahd o paiman nahi baandha tha ke jo kuch mujhe diya gaya , us se zyada aur kuch na maangoon ga . Banda kahe ga aye Rab! mujhe apni sab se zyada badnaseeb makhlooq na bana . Allah Paak hans de ga aur usay jannat mein bhi daakhila ki ijazat ata farma de ga aur phir farmaye ga maang kya hai teri tamanna . Chunanchay woh apni tamannayen (Allah Taala ke saamne) rakhe ga aur jab tamam tamannayen khatam ho jayen gi to Allah Taala farmaye ga ke falan cheez aur maango , falan cheez ka mazeed sawal karo . Khud Allah Paak hi yaaddahani karaye ga . Aur jab woh tamam tamannayen poori ho jayen gi to farmaye ga ke tumhein yeh sab aur itni hi aur di gayeen . Abu Saeed Khudri razi Allahu anhu ne Abu Hurayrah razi Allahu anhu se kaha ke Rasool Allah salla Allahu alaihi wasallam ne farmaya ke yeh aur is se das guna aur zyada tumhein di gayeen . Is par Abu Hurayrah razi Allahu anhu ne farmaya ke Rasool Allah salla Allahu alaihi wasallam ki yahi baat sirf mujhe yaad hai ke tumhein yeh tamannayen aur itni hi aur di gayeen . Lekin Abu Saeed razi Allahu anhu ne farmaya ke main ne Aap ko yeh kehte suna tha ke yeh aur us ki das guna tamannayen tujh ko di gayeen .

Mujh se Muhammad bin Abdul Aziz ne byaan kiya , kaha hum se Abu Amr Hafs bin Maysarah ne byaan kiya , un se Zayd bin Aslam ne , un se Ata bin Yasar aur un se Abu Saeed Khudri razi Allahu anhu ne byaan kiya ke kuch sahabah razi Allahu anhum ne Rasool Allah salla Allahu alaihi wasallam ke zamana mein Aap salla Allahu alaihi wasallam se poocha: ya Rasool Allah! Kya Qayamat ke din hum apne Rabb ko dekh sakein ge ? Aap salla Allahu alaihi wasallam ne farmaya ke haan , kya sooraj ko dopahar ke waqt dekhne mein tumhein koi dushwari hoti hai , jabke is par baadal bhi na ho ? Sahabah razi Allahu anhum ne arz kiya ke nahi . Phir Aap salla Allahu alaihi wasallam ne farmaya aur kya chaudhween raat ke chaand ko dekhne mein tumhein kuch dushwari pesh aati hai , jabke is par baadal na ho ? Sahabah razi Allahu anhum ne arz kiya ke nahi . Phir Aap salla Allahu alaihi wasallam ne farmaya ke bas isi tarah tum bila kisi diqqat aur rukawat ke Allah Ta'ala ko dekho ge . Qayamat ke din ek munadi nida kare ga ke har ummat apne jhoote maboodon ke saath hazir ho jaye . Is waqt Allah ke siwa jitne bhi buton aur pattharon ki pooja hoti thi , sab ko jahannum mein jhonk diya jaye ga . Phir jab wahi log baqi reh jayein ge jo sirf Allah ki pooja kiya karte thay , khwah naik hon ya gunahgar aur Ahl e Kitab ke kuch log , to pehle Yahud ko bulaya jaye ga aur poocha jaye ga ke tum (Allah ke siwa) kis ki pooja karte thay ? Woh arz karein ge ke Uzair Ibn Allah ki , Allah Ta'ala un se farmaye ga lekin tum jhoote thay , Allah ne na kisi ko apni biwi banaya aur na beta , ab tum kya chahte ho ? Woh kahein ge , hamare Rabb! Hum pyaase hain , hamain pani pila de . Unhein isharah kiya jaye ga ke kya idhar nahi chalte . Chunanche sab ko jahannum ki taraf le jaya jaye ga . Wahan chamakti rait pani ki tarah nazar aaye gi , baaz baaz ke tukre kiye de rahi ho gi . Phir sab ko aag mein daal diya jaye ga . Phir Nasara ko bulaya jaye ga aur un se poocha jaye ga ke tum kis ki ibadat kiya karte thay ? Woh kahein ge ke hum Maseeh Ibn Allah ki ibadat karte thay . Un se bhi kaha jaye ga ke tum jhoote thay . Allah ne kisi ko biwi aur beta nahi banaya , phir un se poocha jaye ga ke kya chahte ho ? Aur un ke saath Yahudiyon ki tarah bartao kiya jaye ga . Yahan tak ke jab in logon ke siwa aur koi baqi na rahe ga jo sirf Allah ki ibadat karte thay , khwah woh naik hon ya gunahgar , to un ke paas un ka Rabb ek surat mein jalwa-gar ho ga , jo pehli surat se jis ko woh dekh chuke hon ge , milti julti ho gi (yeh woh surat na ho gi) ab un se kaha jaye ga . Ab tumhein kis ka intizar hai ? Har ummat apne maboodon ko saath le kar ja chuki , woh jawab dein ge ke hum duniya mein jab logon se (jinon ne kufr kiya tha) juda huay to hum in mein sab se zyada muhtaj thay , phir bhi hum ne un ka saath nahi diya aur ab hamain apne sache Rabb ka intizar hai jis ki hum duniya mein ibadat karte rahe . Allah Ta'ala farmaye ga ke tumhara Rabb main hi hoon . Is par tamam Musalman bol uthein ge ke hum apne Rabb ke saath kisi ko shareek nahi thehrate , do ya teen martaba yun kahein ge hum Allah ke saath kisi ko shareek karne wale nahi hain .

Hum se Ishaq bin Ibrahim ne byaan kiya , un se Jareer ne , un se Ismail ne , un se Qays bin Abi Hazim ne aur un se Jareer bin Abdullah razi Allahu anhuma ne byaan kiya ke hum ek raat Nabi Karim salla Allahu alaihi wasallam ke saath baithe huay thay chaudhween raat ku . Nabi Karim salla Allahu alaihi wasallam ne chaand ki taraf dekha aur phir farmaya ke yaqeenan tum apne Rabb ko isi tarah dekho ge jis tarah is chaand ko dekh rahe ho . Is ki ru'yat mein tum dhakkam payl nahi karo ge (balkay bare itminan se ek doosre ko dhakka diye baghair dekho ge) is liye agar tumhare liye mumkin ho to sooraj nikalne aur doobne se pehle namaz na chhoro . Phir Aap ne aayat «wa sabbih bi-hamdi rabbika qabla tuloo-ish-shamsi wa qablal ghuroobi» ”aur apne Rabb ki hamd o tasbeeh karte rahiye aaftab nikalne se pehle aur chhupne se pehle .“ Ki tilawat ki .

Hum se Yusuf bin Musa ne bayan kiya, unhon ne kaha hum se Aasim bin Yusuf al-Yarbooi ne bayan kiya, in se Abu Shihab ne bayan kiya, in se Ismail bin Abi Khalid ne bayan kiya, in se Qays bin Abi Hazim ne bayan kiya aur in se Jareer bin Abdullah raziAllahu anhuma ne bayan kiya ke Nabi kareem salla Allahu alaihi wasallam ne farmaya ke tum apne Rabb ko saaf saaf dekho ge.

Hum se Abdah bin Abdullah ne bayan kiya, kaha hum se Husain Jafi ne bayan kiya in se Zaid ne, in se Bayaan bin Bishr ne, in se Qays bin Abi Hazim ne aur in se Jareer razi Allahu anhune bayan kiya ke Rasool Allah salla Allahu alaihi wasallam choudhvein raat ko hamare paas tashreef laaye aur farmaya ke tum apne Rabb ko Qayamat ke din is tarah dekho ge jis tarah is chaand ko dekh rahe ho. Is ke dekhne mein koi muzahamat nahi ho gi. Khul-lam khul-la dekho ge, be-takal-luf, be-mashaq-qat, be-zhahmat.

Ata bin Yazid ne bayan kiya ke Abu Saeed Khudri razi Allahu anhu is waqt Abu Hurairah razi Allahu anhu ke saath maujood thay. In ki hadees ka koi hissa rad nahi karte thay. Albatta jab Abu Hurairah razi Allahu anhu ne kaha ke Allah Ta'ala kahe ga ke ”Yeh aur unhein jaisi tumhein aur milein gi“ to Abu Saeed Khudri razi Allahu anhu ne kaha ke is ke das guna milein gi Ae Abu Hurairah. Abu Hurairah razi Allahu anhu ne kaha ke mujhe Nabi Karim salla Allahu alaihi wasallam ka yahi irshad yaad hai ke ”Yeh aur unhein jaisi aur“ is par Abu Saeed Khudri razi Allahu anhu ne kaha ke main gawahi deta hoon ke Nabi Karim salla Allahu alaihi wasallam se main ne Aap ka yeh irshad yaad kiya hai ke ”Tumhein yeh sab cheezin milein gi aur is se das guna“ aur Abu Hurairah razi Allahu anhu ne farmaya ke yeh shakhs jannat mein sab se aakhri dakhil hone wala ho ga.