Hum se Musaddad ne bayan kiya , kaha hum se Yahya ne Ismail se , kaha hum se Qais ne bayan kiya , kaha mujh se Jarir bin Abdullah ne bayan kiya , ke hum Nabi Karim salla Allahu alaihi wa sallam ki khidmat mein hazir thay aap salla Allahu alaihi wa sallam ne chand ki taraf nazar uthayi jo chaudhvin raat ka tha . Phir farmaya ke tum log be tok apne Rab ko isi tarah dekhoge jaisay is chand ko dekh rahe ho is ke dekhne mein tum ko kisi qisam ki bhi muzahmat na ho gi ya yeh farmaya ke tumhein is ke deedar mein mutlaq shubha na ho ga is liye agar tum se sooraj ke tulu aur ghuroob se pehle fajr aur asr ki namazon ke parhne mein kotahi na ho sake to aisa zaroor karo . Kyunke in hi ke tafail deedar ilahi naseeb ho ga ya in hi waqton mein yeh ruyat mile gi phir aap salla Allahu alaihi wa sallam ne yeh ayat tilawat farmayi fasabbih bihamdi rabbika qabla tulu al-shams wa qabla ghurubiha pas apne Rab ke hamd ki tasbeeh parh sooraj ke nikalne aur is ke ghuroob hone se pehle . Imam Abu Abdullah Bukhari rahimahullah ne kaha ke Ibn Shihab ne Ismail ke wastay se jo Qais se bo-wastay Jarir raawi hain yeh zyadti naql ki ke Nabi Karim salla Allahu alaihi wa sallam ne farmaya tum apne Rab ko saaf dekhoge .

Hum se Hudba bin Khalid ne bayan kiya , kaha hum se Hammam ne , unhon ne kaha ke hum se Abu Jamra ne bayan kiya , Abu Bakr bin Abi Moosa Ashari raziyallahu anhu se , unhon ne apne walid se ke Nabi Karim salla Allahu alaihi wa sallam ne farmaya ke jis ne thande waqt ki do namazen waqt par parhin fajr aur asr to woh jannat mein dakhil ho ga . Ibn Raja ne kaha ke hum se Hammam ne Abu Jamra se bayan kiya ke Abu Bakr bin Abdullah bin Qais raziyallahu anhu ne unhein is hadees ki khabar di . Hum se Ishaq ne bayan kiya , kaha hum se Hiban ne , unhon ne kaha ke hum se Hammam ne bayan kiya , kaha hum se Abu Jamra ne bayan kiya Abu Bakr bin Abdullah raziyallahu anhu se , unhon ne apne walid se , unhon ne Nabi Karim salla Allahu alaihi wa sallam se , pehli hadees ki tarah .