`Hum se Abdullah bin Maslama ne bayan kiya, kaha hum se Hatim ne bayan kiya, un se Yazid ne bayan kiya ke mein ne Salama Radi Allahu Anhu se poocha aap logon ne Sulah-e-Hudaibiya ke mauqe par Rasul Allah صلی اللہ علیہ وسلم se kis baat par bai'at ki thi? Unhon ne kaha ke maut par.

Hum se Abu Asim ne bayan kiya, unhon ne kaha ke hum se Ibn Juraij ne bayan kiya, ke mujhe Amr Bin Dinar ne khabar di aur un se Abu-al-Minhal ne bayan kiya ke mein sone chandi ki tijarat kiya karta tha. Is liye mein ne Zaid Bin Arqam (Radi Allahu Anhu) se is ke mutaliq poocha to unhon ne bayan kiya ke Rasul Allah (Sallallahu Alaihi Wasallam) ne farmaya. Aur mujh se Fazal Bin Yaqub ne bayan kiya, kaha ke hum se Hajjaj Bin Muhammad ne bayan kiya ke Ibn Juraij ne bayan kiya ke mujhe Amr Bin Dinar aur Aamir Bin Mus'ab ne khabar di, un donon hazraat ne Abu-al-Minhal se suna. Unhon ne bayan kiya ke mein ne Bara Bin Azib aur Zaid Bin Arqam (Radi Allahu Anhuma) se sone chandi ki tijarat ke mutaliq poocha, to un donon buzurgon ne farmaya ke hum Nabi Kareem (Sallallahu Alaihi Wasallam) ke ahd mein tajir thay, is liye hum ne Aap (Sallallahu Alaihi Wasallam) se sone chandi ke mutaliq poocha tha. Aap (Sallallahu Alaihi Wasallam) ne jawab ye diya tha ke (lein dein) hathon hath ho to koi haraj nahi lekin udhaar ki soorat mein jaiz nahi hai
.

Hum se Musa Bin Ismail ne bayan kiya, kaha hum se Wahb ne bayan kiya, kaha hum se Amr Bin Yahya ne, un se Abbad Bin Tamim ne aur un se Abdullah Bin Zaid (Radi Allahu Anhu) ne bayan kiya ke Harrah ki larayi ke zamana mein ek sahab un ke paas aaye aur kaha ke Abdullah Bin Hanzala logon se (Yazid ke khilaf) maut par bai'at le rahe hain. To unhon ne kaha ke Rasul Allah (Sallallahu Alaihi Wasallam) ke baad ab mein maut par kisi se bai'at nahi karun ga
.

Hum se Makki Bin Ibrahim ne bayan kiya, kaha hum se Yazid Bin Abi Ubaid ne bayan kiya, aur un se Salama Bin Al-Akwa ne bayan kiya (Hudaibiyah ke mauqe par) mein ne Rasul Allah (Sallallahu Alaihi Wasallam) se bai'at ki. Phir ek darakht ke saye mein aa kar khara ho gaya. Jab logon ka hujoom kam hua to Nabi Kareem (Sallallahu Alaihi Wasallam) ne daryaft kiya, Ibn-ul-Akwa kya bai'at nahi karo ge? Unhon ne kaha ke mein ne arz kiya, ya Rasul Allah! Mein to bai'at kar chuka hoon. Aap (Sallallahu Alaihi Wasallam) ne farmaya, dobara aur bhi! Chunancha mein ne dobara bai'at ki (Yazid Bin Abi Ubaidullah kehte hain ke) mein ne Salama Bin Al-Akwa (Radi Allahu Anhu) se poocha, Abu Muslim is din aap hazrat ne kis baat par bai'at ki thi? Kaha ke maut par
.

Hum se Ismail Bin Abi Uwais ne bayan kiya ‘ in se in ke bhai Abdul Hamid ne ‘ in se Sulaiman Bin Bilal ne ‘ in se Amr Bin Yahya ne aur in se Abbad Bin Tamim ne bayan kiya ke Harra ki larayi mein log Abdullah Bin Hanzala Radi Allahu Anhu ke hath par baiat kar rahe thay. Abdullah Bin Zaid ne poocha ke Ibn Hanzala se kis baat par baiat ki ja rahi hai? To logon ne bataya ke maut par. Ibn Zaid ne kaha ke Rasul Allah Sallallahu Alaihi Wasallam ke baad ab mein kisi se bhi maut par baiat nahi karunga. Wo Aap Sallallahu Alaihi Wasallam ke sath Ghazwa Hudaibiya mein shareek thay
.

Hum se Qutaiba Bin Saeed ne bayan kiya ke hum se Hatim Bin Ismail ne bayan kiya ‘ in se Yazid Bin Abi Ubaid ne bayan kiya ke mein ne Salama Bin Akwa Radi Allahu Anhu se poocha ke sulh-e-Hudaibiya ke mauqe par Aap logon ne Rasul Allah Sallallahu Alaihi Wasallam se kis cheez par baiat ki thi? Unhon ne batlaya ke maut par
.

Mujh se Ahmad Bin Ishkab ne bayan kiya ‘ kaha hum se Muhammad Bin Fuzail ne bayan kiya ‘ in se Ala Bin Musayyab ne ‘ in se in ke walid ne bayan kiya ke mein Bara Bin Azib Radi Allahu Anhu ki khidmat mein hazir hua aur arz kiya ‘ mubarak ho! Aap ko Nabi Kareem Sallallahu Alaihi Wasallam ki khidmat naseeb hui aur Nabi Kareem Sallallahu Alaihi Wasallam se Aap ne shajar (darakht) ke neeche baiat ki. Unhon ne kaha bete! Tumhein maloom nahi ke hum ne Nabi Kareem Sallallahu Alaihi Wasallam ke baad kya kya kaam kiye hain
.

Hum se Ishaq ne bayan kiya ‘ kaha hum se Yahya Bin Salih ne bayan kiya ‘ kaha hum se Muawiya ne bayan kiya ‘ wo Salam ke bete hain ‘ in se Yahya ne ‘ in se Abu Qilaba ne aur unhein Sabit Bin Zahhak Radi Allahu Anhu ne khabar di ke unhon ne Nabi Kareem Sallallahu Alaihi Wasallam se darakht ke neeche baiat ki thi
.

Aur Hisham Bin Ammar ne bayan kiya ‘ in se Waleed Bin Muslim ne bayan kiya ‘ in se Umar Bin Umri ne bayan kiya ‘ unhein Nafi ne khabar di aur unhein Abdullah Bin Umar (Radi Allahu Anhuma) ne ke sulh-e-Hudaibiya ke mauqe par sahaba (Radi Allahu Anhum) jo Nabi Kareem Sallallahu Alaihi Wasallam ke sath thay ‘ mukhtalif darakhton ke saye mein phail gaye thay. Phir achanak bahut se sahaba Aap Sallallahu Alaihi Wasallam ke charon taraf jama ho gaye. Umar Radi Allahu Anhu ne kaha: Beta Abdullah! Dekho to sahi log Nabi Kareem Sallallahu Alaihi Wasallam ke pas jama kyun ho gaye hain? Unhon ne dekha to sahaba baiat kar rahe thay. Chunancha pehle unhon ne khud baiat kar li. Phir Umar Radi Allahu Anhu ko aa kar khabar di phir wo bhi gaye aur unhon ne bhi baiat ki
.

`Hum se Abul Aasim ne bayan kiya, kaha hum se Yazid bin Abi Ubaid ne, un se Salama Radi Allahu Anhu ne bayan kiya ke hum ne Nabi Kareem صلی اللہ علیہ وسلم se darakht ke neeche bai'at ki. Nabi Kareem صلی اللہ علیہ وسلم ne mujh se farmaya ”Salama! kya tum bai'at nahi karo ge? Mein ne arz kiya: ya Rasul Allah! mein ne pehli hi martaba mein bai'at kar li hai, farmaya ke aur doosri martaba mein bhi kar lo.“