Hum se Musaddad ne bayan kiya, kaha hum se Yahya ne bayan kiya, in se Humayd ne, in se Sabit ne aur in se Anas razi Allahu anhu ne ke Nabi Karim salla Allahu alaihi wasallam ne farmaya ”Allah Ta'ala is se be-parwa hai ke yeh shakhs apni jaan ko azab mein daale.“ Nabi Karim salla Allahu alaihi wasallam ne usay dekha ke woh apne do beton ke darmiyan chal raha thu aur Fazari ne bayan kiya, in se Humayd ne, in se Sabit ne bayan kiya aur in se Anas razi Allahu anhu ne.

Hum se Abdullah Bin Yusuf ne bayan kiya, kaha ke hum se Imam Malik ne khabar di, unhein Abu Al-Zanad ne, unhein Aaraj aur unhein Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ne ek shakhs ko qurbani ka janwar le jate dekha to Aap (Sallallahu Alaihi Wasallam) ne farmaya ke is par sawar ho ja. Is shakhs ne kaha ke ye to qurbani ka janwar hai, Aap (Sallallahu Alaihi Wasallam) ne farmaya ke is par sawar ho jana. Is ne kaha ke ye to qurbani ka janwar hai to Aap (Sallallahu Alaihi Wasallam) ne phir farmaya afsos! Sawar bhi ho jao ( «Wailaka» Aap Sallallahu Alaihi Wasallam ne) doosri ya teesri martaba farmaya
.

Hum se Muslim Bin Ibrahim ne bayan kiya, kaha ke hum se Hisham aur Shuba ne bayan kiya, kaha ke hum se Qatada ne bayan kiya aur un se Anas (Radi Allahu Anhu) ne ke Nabi Kareem (Sallallahu Alaihi Wasallam) ne ek shakhs ko dekha ke qurbani ka janwar liye ja raha hai to Aap (Sallallahu Alaihi Wasallam) ne farmaya ke is par sawar ho ja is ne kaha ke ye to qurbani ka janwar hai Aap (Sallallahu Alaihi Wasallam) ne farmaya ke sawar ho ja is ne phir arz kiya ke ye to qurbani ka janwar hai, lekin Aap (Sallallahu Alaihi Wasallam) ne teesri martaba phir farmaya ke sawar ho ja
.

Hum se Muhammad ne bayan kiya, kaha hum ko Abdul Ala ne khabar di, unhein Ma'mar ne, unhein Yahya Bin Abi Kasir ne, unhein Ikrima ne, unhein Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne ek aadmi ko dekha ke wo qurbani ka ont liye ja raha hai aap (Sallallahu Alaihi Wasallam) ne farmaya ke is par sawar ho ja, is ne kaha ke ye to qurbani ka hai to aap (Sallallahu Alaihi Wasallam) ne phir farmaya ke sawar ho ja. Abu Hurairah (Radi Allahu Anhu) ne kaha ke phir mein ne dekha ke wo is par sawar hai aur Nabi Kareem (Sallallahu Alaihi Wasallam) ke sath chal raha hai aur joote (ka haar) is ont ke gardan mein hai. Is riwayat ki mutabiat Muhammad Bin Bashar ne ki hai. Hum se Usman Bin Umar ne bayan kiya, hum ko Ali Bin Mubarak ne khabar di, unhein Yahya ne unhein Ikrima ne aur unhein Abu Hurairah (Radi Allahu Anhu) ne Nabi Kareem (Sallallahu Alaihi Wasallam) se (misl-e-sabiq hadees ke)
.

Hum se Muhammad Bin Salam ne bayan kiya, kaha humein Marwan Fazari ne khabar di, unhein Humaid Taweel ne, unhon ne bayan kiya ke mujh se Thabit ne bayan kiya aur un se Anas (Radi Allahu Anhu) ne ke Nabi Kareem (Sallallahu Alaihi Wasallam) ne ek boodhe shakhs ko dekha jo apne do beton ka sahara liye chal raha hai. Aap (Sallallahu Alaihi Wasallam) ne poocha in sahab ka kya haal hai ? Logon ne bataya ke unhon ne Kaabah ko paidal chalne ki mannat mani hai. Aap (Sallallahu Alaihi Wasallam) ne farmaya ke Allah Ta'ala is se beniyaz hai ke ye apne ko takleef mein dalein phir Aap (Sallallahu Alaihi Wasallam) ne unhein sawar hone ka hukm diya
.

Hum se Ibrahim Bin Musa ne bayan kiya, kaha ke hum ko Hisham Bin Yusuf ne khabar di ke Ibn Juraij ne unhein khabar di, unhon ne bayan kiya ke mujhe Saeed Bin Abi Ayyub ne khabar di, unhein Yazid Bin Habib ne khabar di, unhein Abu-al-Khair ne khabar di, ke Uqba Bin Aamir (Radi Allahu Anhu) ne bayan kiya meri behan ne mannat mani thi ke Baitullah tak wo paidal jayein gi, phir unhon ne mujh se kaha ke tum is ke mutaliq Rasul Allah (Sallallahu Alaihi Wasallam) se bhi pooch lo chunanche mein ne Aap (Sallallahu Alaihi Wasallam) se poocha to Aap (Sallallahu Alaihi Wasallam) ne farmaya ke wo paidal chalein aur sawar bhi ho jayein. Yazid ne kaha ke Abu-al-Khair hamesha Uqba (Radi Allahu Anhu) ke sath rehte thay
.

Hum se Qutaibah Bin Saeed ne bayan kiya, kaha hum se Abu Awanah ne bayan kiya, un se Qatadah ne aur un se Anas (Radi Allahu Anhu) ne ke Nabi Kareem (Sallallahu Alaihi Wasallam) ne dekha ke ek shakhs qurbani ka oont hanke liye ja raha hai. Aap (Sallallahu Alaihi Wasallam) ne us se farmaya ke is par sawar ho ja. Is sahab ne kaha ya Rasul Allah! Ye qurbani ka oont hai. Aap (Sallallahu Alaihi Wasallam) ne teesri ya chauthi baar farmaya afsos! Sawar bhi ho ja ya aap ne «Wailaka» ki bajaye «Waihaka» farmaya jis ke maani bhi wahi hain
.

Hum se Ismail Bin Abi Uwais ne bayan kiya, kaha hum se Imam Malik ne bayan kiya, un se Abul Zinad ne, un ne Aaraj se aur un Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ne dekha ke ek sahab qurbani ka oont hanke liye ja rahe hain. Aap (Sallallahu Alaihi Wasallam) ne farmaya ke is par sawar ho ja lekin unhon ne mazrat ki ke ya Rasul Allah! Ye to qurbani ka hai. Aap (Sallallahu Alaihi Wasallam) ne phir farmaya ke sawar bhi ho ja. Afsos! Ye kalma Aap (Sallallahu Alaihi Wasallam) ne teesri ya chauthi martaba farmaya tha
.

Hum se Musa bin Ismail ne bayan kiya , kaha hum se Humam bin Yahya ne bayan kiya , in se Qatadah ne aur in se Anas razi Allahu anhu ne ke Nabi Karim salla Allahu alaihi wasallam ne ek shakhs ko dekha ke qurbani ke liye ek oontni haankay liye ja raha hai . Nabi Karim salla Allahu alaihi wasallam ne farmaya ke is par sawar ho kar ja , unhon ne kaha ke yeh to qurbani ka janwar hai . Nabi Karim salla Allahu alaihi wasallam ne farmaya ke sawar ho ja , afsos ”wailaka“ doosri ya teesri martaba yeh farmaya .

Mujh se Qutaybah bin Saeed ne bayan kiya , woh Imam Malik se riwayat karte hain , woh Abu al-Zinad se , woh Aaraj se , woh Abu Hurairah razi Allahu anhu se riwayat karte hain ke Rasool Allah salla Allahu alaihi wasallam ne ek shakhs ko dekha ke qurbani ka oont hankaaye ja raha hai . Aap salla Allahu alaihi wasallam ne is se kaha ke tu is par sawar ho ja . Us ne arz kiya: ya Rasool Allah! Yeh to qurbani ka oont hai . Aap salla Allahu alaihi wasallam ne doosri baar ya teesri baar farmaya ke teri kharabi ho , tu sawar ho ja .