Hum se Muali bin Saad Asad Basri ne bayan kiya , kaha hum se Wuhaib bin Khalid ne Abu Ayyub se bayan kiya , unhon ne Abu Qalaba se , unhon ne kaha ke hum se Malik bin Huwairith ne bayan kiya , kaha ke mein Nabi Karim salla Allahu alaihi wa sallam ki khidmat mein apni qoum Bani Laith ke chand aadmiyon ke sath hazir hua aur mein ne aap salla Allahu alaihi wa sallam ki khidmat shareef mein bees raton tak qiyam kiya . Aap salla Allahu alaihi wa sallam bare reham dil aur milansar thay . Jab aap salla Allahu alaihi wa sallam ne hamare apne ghar pohanchne ka shauq mehsoos kar liya to farmaya ke ab tum ja sakte ho . Wahan ja kar apni qoum ko deen sikhao aur safar mein namaz parhte rehna . Jab namaz ka waqt aa jaye to tum mein se ek shakhs azan de aur jo tum mein sab se bara ho woh imamat karaye .

Hum se Muhammad bin Yusuf Faryabi ne bayan kiya , kaha ke hum se Sufyan Thauri ne Khalid Haza se , unhon ne Abu Qalaba Abdullah bin Zaid se , unhon ne Malik bin Huwairith se , unhon ne kaha ke do shakhs Nabi Karim salla Allahu alaihi wa sallam ki khidmat mein aaye yeh kisi safar mein jane wale thay . Aap salla Allahu alaihi wa sallam ne un se farmaya ke dekho jab tum safar mein niklo to namaz ke waqt raste mein azan dena phir iqamat kehna , phir jo shakhs tum mein umar mein bara ho namaz parhaye .

Hum se Muhammad bin Musanna ne bayan kiya , kaha ke humein Abdul Wahab ne khabar di , kaha ke humein Abu Ayyub Sakhtiyani ne Abu Qalaba se khabar di , unhon ne kaha ke hum se Malik bin Huwairith ne bayan kiya , kaha ke hum Nabi Karim salla Allahu alaihi wa sallam ki khidmat aqdas mein hazir hue . Hum sab hum umar aur naujawan hi thay . Aap salla Allahu alaihi wa sallam ki khidmat mubarak mein hamara bees din wa raat qiyam raha . Aap salla Allahu alaihi wa sallam bare hi reham dil aur milansar thay . Jab aap salla Allahu alaihi wa sallam ne dekha ke humein apne watan wapas jane ka shauq hai to aap salla Allahu alaihi wa sallam ne poocha ke tum log apne ghar kise chhor kar aaye ho . Hum ne bataya . Phir aap salla Allahu alaihi wa sallam ne farmaya ke achha ab tum apne ghar jao aur un ghar walon ke sath raho aur unhein bhi deen sikhao aur deen ki baton par amal karne ka hukm karo . Malik ne bohot si cheezon ka zikr kiya jin ke mutalliq Abu Ayyub ne kaha ke Abu Qalaba ne yun kaha woh batein mujh ko yaad hain ya yun kaha mujh ko yaad nahi . Aur Nabi Karim salla Allahu alaihi wa sallam ne farmaya ke isi tarah namaz parhna jaisay tum ne mujhe namaz parhte hue dekha hai aur jab namaz ka waqt aa jaye to koi ek azan de aur jo tum mein sab se bara ho woh namaz parhaye .

Hum se Musaddad bin Musarhad ne byaan kiya , kaha ke hum se Yazid bin Zuray ne byaan kiya , kaha ke hum se Khalid Haza ne Abu Qilabah Abdullah bin Zaid se , unhon ne Malik bin Huwayrith se , unhon ne Nabi Karim salla Allahu alaihi wasallam se ke Aap salla Allahu alaihi wasallam ne farmaya jab namaaz ka waqt aa jaye to tum dono azaan do aur iqamat kaho , phir jo tum mein bara hai woh imam bane .

Hum se Sulayman bin Harb ne byaan kiya , kaha ke hamein Hammad bin Zaid ne khabar di Ayyub Sakhtiyani se , unhon ne Abu Qilabah se , unhon ne Malik bin Huwayrith razi Allahu anhu se , unhon ne byaan kiya ke hum Nabi Karim salla Allahu alaihi wasallam ki khidmat mein apne mulk se haazir huay . Hum sab hum umar naujawan thay . Taqreeban bees raatein hum Aap ki khidmat mein thehray rahe . Aap salla Allahu alaihi wasallam bade hi rehm dil thay . Aap salla Allahu alaihi wasallam ne (hamari ghurbat ka haal dekh kar) farmaya ke jab tum log apne gharon ko jao to apne qabeela walon ko deen ki baatain batana aur un se namaaz parhne ke liye kehna ke falan namaaz falan waqt aur falan namaaz falan waqt parheen . Aur jab namaaz ka waqt ho jaye to koi ek azaan de aur jo umar mein bara ho woh imamat karaye .

(phir namaaz sikhlane ke baad Malik bin Huwayrith ne byaan kiya ke) hum Nabi Karim salla Allahu alaihi wasallam ki khidmat mein haazir huay aur Aap salla Allahu alaihi wasallam ke yahan thehray rahe Aap salla Allahu alaihi wasallam ne farmaya ke (behtar hai) tum apne gharon ko wapas jao . Dekho yeh namaaz falan waqt aur yeh namaaz falan waqt parhna . Jab namaaz ka waqt ho jaye to ek shakhs tum mein se azaan de aur jo tum mein bara ho woh namaaz parhaye .

Hum se Ahmad Bin Yunus ne bayan kiya, kaha hum se Abu Shihab ne bayan kiya, un se Khalid Hazza ne, un se Abu Qilaba ne aur un se Malik Bin Huwairis (Radi Allahu Anhu) ne bayan kiya ke jab hum Nabi Kareem (Sallallahu Alaihi Wasallam) ke yahan se watan ke liye wapas laute to Aap (Sallallahu Alaihi Wasallam) ne hum se farmaya ek mein tha aur doosre mere sathi, (har namaz ke waqt) azan pukarna aur iqamat kehna aur tum donon mein jo bara ho wo namaz parhaye
.

Hum se Musaddad ne bayan kiya, kaha hum se Ismail bin Aliyyah ne bayan kiya, kaha hum se Ayub Sakhtiyani ne bayan kiya, in se Abu Qulabah ne, in se Abu Sulayman Malik bin Huwairis razi Allahu anhu ne bayan kiya ke hum Nabi Karim salla Allahu alaihi wasallam ki khidmat mein Madinah hazir huay aur hum sab nau-jawan aur hum umr thay. Hum Nabi Karim salla Allahu alaihi wasallam ke saath bees dinon tak rahe. Phir Nabi Karim salla Allahu alaihi wasallam ko khayal hua ke hamain apne ghar ke log yaad aa rahe hon ge aur Nabi Karim salla Allahu alaihi wasallam ne hamase in ke mutalliq poochha jinhein hum apne gharon par chhorr kar aaye thay. Hum ne Nabi Karim salla Allahu alaihi wasallam ko saara haal suna diya. Aap bare hi narm-kho aur bare raham karne wale thay. Aap salla Allahu alaihi wasallam ne farmaya ke tum apne gharon ko wapas jao aur apne mulk walon ko deen sikhao aur batao aur tum is tarah namaz parho jis tarah tum ne mujhe namaz parhte dekha hai aur jab namaz ka waqt aa jaye to tum mein se ek shakhs tumhare liye azan de phir jo tum mein bara ho woh imamat karaye.

`Hum se Muhammad bin Musanna ne bayan kiya, kaha hum se Abdul Wahhab ne bayan kiya, kaha hum se Ayub ne bayan kiya, un se Abu Qulaba ne, un se Malik Radi Allahu Anhu ne bayan kiya ke hum Nabi Kareem صلی اللہ علیہ وسلم ki khidmat mein hazir hue. Hum sab jawan aur hum-umr thay, hum Aap ki khidmat mein bees din tak thehre rahe. Nabi Kareem صلی اللہ علیہ وسلم bahut shafeeq thay. Jab Aap ne maloom kiya ke ab hamara dil apne ghar walon ki taraf mushtaq hai to Aap ne hum se poocha ke apne peeche hum kin logon ko chhod kar aaye hain. Hum ne Aap ko bataya to Aap صلی اللہ علیہ وسلم ne farmaya ke apne ghar chale jao aur un ke saath raho aur unhein Islam sikhao aur deen batao aur bahut si baatein Aap ne kahein jin mein baaz mujhe yaad nahi hain aur baaz yaad hain aur (farmaya ke) jis tarah mujhe tum ne namaz parhte dekha usi tarah namaz parho. Pas jab namaz ka waqt aa jaye to tum mein se ek tumhare liye azan kahe aur jo umr mein sab se bada ho wo imamat karaye.