Hum se Musaddad ne bayan kiya, kaha hum se Ismail bin Aliyyah ne bayan kiya, kaha hum se Ayub Sakhtiyani ne bayan kiya, in se Abu Qulabah ne, in se Abu Sulayman Malik bin Huwairis razi Allahu anhu ne bayan kiya ke hum Nabi Karim salla Allahu alaihi wasallam ki khidmat mein Madinah hazir huay aur hum sab nau-jawan aur hum umr thay. Hum Nabi Karim salla Allahu alaihi wasallam ke saath bees dinon tak rahe. Phir Nabi Karim salla Allahu alaihi wasallam ko khayal hua ke hamain apne ghar ke log yaad aa rahe hon ge aur Nabi Karim salla Allahu alaihi wasallam ne hamase in ke mutalliq poochha jinhein hum apne gharon par chhorr kar aaye thay. Hum ne Nabi Karim salla Allahu alaihi wasallam ko saara haal suna diya. Aap bare hi narm-kho aur bare raham karne wale thay. Aap salla Allahu alaihi wasallam ne farmaya ke tum apne gharon ko wapas jao aur apne mulk walon ko deen sikhao aur batao aur tum is tarah namaz parho jis tarah tum ne mujhe namaz parhte dekha hai aur jab namaz ka waqt aa jaye to tum mein se ek shakhs tumhare liye azan de phir jo tum mein bara ho woh imamat karaye.

Hum se Ismail bin Abi Oways ne bayan kiya, kaha mujh se Imam Malik ne bayan kiya, in se Abu Bakr ke ghulam Sumay ne, in se Abu Salih Samman ne aur in se Abu Hurairah razi Allahu anhu ne ke Rasool Allah salla Allahu alaihi wasallam ne farmaya ke ek shakhs rasta mein chal raha tha ke usay shiddat ki pyas lagi usay ek kunwaan mila aur us ne is mein utar kar pani piya. Jab bahar nikla to wahan ek kutta dekha jo haanp raha thu aur pyas ki wajah se tari ko chaat raha thu. Is shakhs ne kaha ke yeh kutta bhi itna hi zyada pyasa maloom ho raha hai jitna main thu. Chunanche woh phir kunwien mein utra aur apne jootay mein pani bhara aur munh se pakar kar oopar laya aur kutte ko pani pilaya. Allah Ta'ala ne is ke is amal ko pasand farmaya aur is ki maghfirat kar di. Sahabah ikraam razi Allahu anhum ne arz kiya ke ya Rasool Allah! Kya hamain janwaron ke saath naiki karne mein bhi sawab milta hai. Nabi Karim salla Allahu alaihi wasallam ne farmaya ke tumhein har taza kaleje wale par naiki karne mein sawab milta hai.

Hum se Abu al-Yaman ne bayan kiya, kaha hum ko Shuayb ne khabar di, in se Zuhri ne bayan kiya, kaha ke mujhe Abu Salamah bin Abd-ur-Rahman ne khabar di aur in se Abu Hurairah razi Allahu anhu ne bayan kiya ke Rasool Allah salla Allahu alaihi wasallam ek namaz ke liye khare huay aur hum bhi Nabi Karim salla Allahu alaihi wasallam ke saath khare huay. Namaz parhte hi ek dehati ne kaha: Ae Allah! Mujh par raham kar aur Muhammad (salla Allahu alaihi wasallam) par aur hamare saath kisi aur par raham na kar. Jab Nabi Karim salla Allahu alaihi wasallam ne salam phera to dehati se farmaya ke tum ne ek wasee cheez ko tang kar diya Aap ki murad Allah ki rahmat se thi.

Hum se Abu Nuaym ne bayan kiya, kaha hum se Zakariya ne bayan kiya, in se Aamir ne kaha ke main ne unhein yeh kehte suna hai ke main ne Numan bin Basheer se suna, woh bayan karte thay ke Rasool Allah salla Allahu alaihi wasallam ne farmaya ”tum momino ko aapas mein ek doosre ke saath rahmat o mohabbat ka muamla karne aur ek doosre ke saath lutf o narm-khooi mein ek jism jaisa pao ge ke jab is ka koi tukra bhi takleef mein hota hai, to saara jism takleef mein hota hai aisa ke neend urr jati hai aur jism bukhar mein mubtala ho jata hai.“

Hum se Abu al-Waleed ne bayan kiya, kaha hum se Abu Awanah ne bayan kiya, in se Qatadah ne aur in se Anas bin Malik razi Allahu anhu ne bayan kiya ke Nabi Karim salla Allahu alaihi wasallam ne farmaya ”agar koi Musalman kisi darakht ka pauda lagata hai aur is darakht se koi insan ya janwar khata hai to lagaane wale ke liye woh sadqa hota hai.“

Hum se Umar bin Hafs ne bayan kiya, unhon ne kaha hum se hamare walid ne bayan kiya, in se Aamash ne bayan kiya, unhon ne kaha ke mujh se Zayd bin Wahb ne bayan kiya, unhon ne kaha ke main ne Jareer bin Abdullah razi Allahu anhu se suna ke Nabi Karim salla Allahu alaihi wasallam ne farmaya ”jo raham nahi karta is par raham nahi kiya jata.“