Aur Allah Ta'ala ka (Surah Nisa mein) farman «wa-budullaaha wa laa tushrikoo bihi shay-an wa bil-waalidaini ihsaanan» ”aur Allah ki ibadat karo aur is ke saath kisi ko shareek na thehrao aur walidain ke saath naik sulook karo.“ Irshad «mukhtalan fakhooran» tak.

Hum se Ismail bin Abi Oways ne bayan kiya, kaha ke mujh se Imam Malik ne bayan kiya, in se Yahya bin Saeed ne kaha ke mujhe Abu Bakr bin Muhammad ne khabar di, unhein Umrah ne aur unhein Aisha razi Allahu anha ne ke Nabi Karim salla Allahu alaihi wasallam ne farmaya ”Jibrail alaihissalam mujhe parosi ke baare mein baar baar is tarah wasiyat karte rahe ke mujhe khayal guzra ke shayad parosi ko wirasat mein shareek na kar dein.“

Hum se Muhammad bin Minhal ne bayan kiya, kaha hum se Yazid bin Zuray ne bayan kiya, in se Umar bin Muhammad ne, in se un ke walid ne aur in se Ibn Umar razi Allahu anhuma ne bayan kiya ke Rasool Allah salla Allahu alaihi wasallam ne farmaya ”Jibrail alaihissalam mujhe is tarah baar baar parosi ke haq mein wasiyat karte rahe ke mujhe khayal guzra ke shayad parosi ko wirasat mein shareek na kar dein.“