Hum se Muhammad bin Salam ne bayan kiya, kaha hum ko Ismail bin Jafar ne khabar di, kaha hum ko Rabia bin Abi Abd-ur-Rahman ne khabar di, unhein Zayd bin Khalid Juhani ne ke ek sahab ne Rasool Allah salla Allahu alaihi wasallam se luqta (rasta mein giri pari cheez jise kisi ne utha liya ho) ke mutalliq poochha to Aap salla Allahu alaihi wasallam ne farmaya saal bhar logon se poochhte raho phir is ka sar-bandhan aur zarf pehchan ke rakh aur kharch kar daal. Phir agar is ke baad is ka maalik aa jaye to woh cheez usay wapas kar de. Poochha: ya Rasool Allah! Bhooli bhatki bakri ke mutalliq kya hukm hai? Aap salla Allahu alaihi wasallam ne farmaya ke usay pakar la kyunke woh tumhare bhai ki hai ya phir bheriye ki ho gi. Poochha: ya Rasool Allah! Aur khoya hua oont? Bayan kiya ke is par Nabi Karim salla Allahu alaihi wasallam naraz ho gaye aur Aap ke donon rukhsar surkh ho gaye, ya rawi ne yun kaha ke Aap ka chehra surkh ho gaya, phir Aap ne farmaya ke tumhein is oont se kya gharaz hai is ke saath to is ke paon hain aur is ka pani hai woh kabhi na kabhi apne maalik ko pa le ga.

Hum se Abdullah bin Muhammed ne bayan kiya, un se Abu Amir Al-’Aqadi ne, woh Sulaiman bin Bilal Al-Madeeni se, woh Rabee’ah bin Abi Abdur Rahman se, woh Yazeed se jo Munba’ath ke aazaad kardah the, woh Zaid bin Khalid Al-Juhani se riwayat karte hain ke ek shakhs (Umair ya Bilal) ne Rasoolullah Sallallahu Alaihi Wasallam se padi hue cheez ke baare mein daryaaft kiya. Aap Sallallahu Alaihi Wasallam ne farmaaya, us ki bandhan pehchaan le ya farmaaya ke us ka bartan aur thaili (pehchaan le) phir ek saal tak us ki shanaakht (ka elaan) karaao phir (us ka maalik na mile to) us se faida uthaao aur agar us ka maalik aa jaaye to use saunp do. Us ne poocha ke achcha gumshudah oont (ke baare mein) kya hukm hai? Aap ko is qadr ghussa aa gaya ke rukhsaar-e-mubarak surkh ho gaye. Ya rawi ne yeh kaha ke Aap ka chehra surkh ho gaya. (Yeh sun kar) Aap Sallallahu Alaihi Wasallam ne farmaaya. Tujhe oont se kya waasta? Us ke saath khud us ki mashak hai aur us ke (paaon ke) sam hain. Woh khud paani par pahunchega aur khud pi lega aur khud darakht par charega. Lihaaza use chor do yahan tak ke us ka maalik mil jaaye. Us ne kaha ke achcha gumshudah bakri ke (baare mein) kya irshaad hai? Aap Sallallahu Alaihi Wasallam ne farmaaya, woh teri hai ya tere bhai ki, warna bhedye ki (ghiza) hai.

Hum se Ismail ne bayan kiya, kaha ke hum se Imam Malik ne bayan kiya, un se Rabia Bin Abi Abdur Rahman ne, un se Manbath ke ghulam Yazid ne aur un se Zaid Bin Khalid (Radi Allahu Anhu) ne ke Rasul Allah (Sallallahu Alaihi Wasallam) ki khidmat mein ek shakhs aya aur Aap se luqtah (raste mein kisi ki gum hui cheez jo pa gayi ho) ke mutalliq poocha to Aap (Sallallahu Alaihi Wasallam) ne farmaya ke is ki theili aur is ke bandhan ki khoob jaanch kar lo. Phir ek saal tak is ka elan karte raho. Is arse mein agar is ka malik aa jaye (to ise day do) warna phir wo cheez tumhari hai. Sail ne poocha, aur gumshuda bakri ? Aap (Sallallahu Alaihi Wasallam) ne farmaya, wo tumhari hai ya tumhare bhai ki hai ya phir bhediye ki hai. Sail ne poocha aur gumshuda oont ? Aap (Sallallahu Alaihi Wasallam) ne farmaya, tumhe is se kya matlab ? Is ke sath ise seerab rakhne wali cheez hai aur is ka ghar hai, pani par bhi wo ja sakta hai aur darakht (ke patte) bhi kha sakta hai yahan tak ke is ka malik is ko pa jaye
.

Hum se Adam ne bayan kiya, kaha hum se Shuba ne bayan kiya (doosri sanad) aur mujh se Muhammad Bin Bashar ne bayan kiya, un se Ghundar ne, un se Shuba ne, un se Salama ne ke mein ne Suwaid Bin Ghaflah se suna, unhon ne bayan kiya ke mein ne Ubayy Bin Kaab (Radi Allahu Anhu) se mulaqat ki to unhon ne kaha ke mein ne sau dinar ki ek theili (kahin raste mein pari hui) payi. Mein ise Rasul Allah (Sallallahu Alaihi Wasallam) ki khidmat mein laya to Aap (Sallallahu Alaihi Wasallam) ne farmaya ke ek saal tak is ka elan karta reh. Mein ne ek saal tak is ka elan kiya, lekin mujhe koi aisa shakhs nahi mila jo ise pehchan sakta. Is liye mein phir Aap (Sallallahu Alaihi Wasallam) ki khidmat mein aya. Aap (Sallallahu Alaihi Wasallam) ne farmaya ke ek saal tak is ka elan karta reh. Mein ne phir (saal bhar) elan kiya. Lekin in ka malik mujhe nahi mila. Teesri martaba hazir hua, to Aap (Sallallahu Alaihi Wasallam) ne farmaya ke is theili ki banawat, dinar ki tadaad aur theili ke bandhan ko mahfooz rakh. Agar is ka malik aa jaye to (alamat pooch ke) ise wapas kar dena, warna apne kharch mein ise istemal kar lay chunanche mein ise apne akhrajaat mein laya. (Shuba ne bayan kiya ke) phir mein ne Salama se is ke baad Makkah mein mulaqat ki to unhon kaha ke mujhe yaad nahi Rasul Allah (Sallallahu Alaihi Wasallam) ne (hadees mein) teen saal tak (elan karne ke liye farmaya tha) ya sirf ek saal ke liye
.

Hum se Amr Bin Abbas ne bayan kiya, kaha ke hum se Abdur Rahman Bin Mahdi ne bayan kiya, kaha hum se Sufyan ne, un se Rabia ne, un se Manbath ke ghulam Yazid ne, aur un se Zaid Bin Khalid Juhani (Radi Allahu Anhu) ne ke Nabi Kareem (Sallallahu Alaihi Wasallam) ki khidmat mein ek dehati hazir hua. Aur raste mein pari hui kisi cheez ko uthane ke baare mein Aap (Sallallahu Alaihi Wasallam) se sawal kiya. Aap (Sallallahu Alaihi Wasallam) ne in se farmaya ke ek saal tak is ka elan karta reh. Phir is ke bartan ki banawat aur is ke bandhan ko zehan mein rakh. Agar koi aisa shakhs aaye jo is ki nishaniyan theek theek bata day (to ise is ka maal wapas kar day) warna apni zarooriyat mein kharch kar. Sahabi ne poocha, Ya Rasul Allah! aaisi bakri ka kya kiya jaye jis ke malik ka pata na ho ? Aap (Sallallahu Alaihi Wasallam) ne farmaya ke wo ya to tumhari ho gi ya tumhare bhai (malik) ko mil jaye gi ya phir bhediye ka luqma bane gi. Sahaba ne phir poocha aur is oont ka kya kiya jaye jo rasta bhool gaya ho ? Is par Rasul Allah (Sallallahu Alaihi Wasallam) ke chehra mubarak ka rang badal gaya. Aap (Sallallahu Alaihi Wasallam) ne farmaya, tumhe is se kya matlab ? Is ke sath khud is ke khur hain. (Jin se wo chale ga) is ka mashkeeza hai, pani par wo khud pahunch jaye ga. Aur darakht ke patte wo khud kha lay ga
.

Hum se Ismail Bin Abdullah ne bayan kiya, kaha ke mujh se Sulaiman Taimi ne bayan kiya, un se Yahya Bin Saeed Ansari ne, un se Manbath ke ghulam Yazid ne, unhon ne Zaid Bin Khalid se suna, unhon ne kaha ke Nabi Kareem (Sallallahu Alaihi Wasallam) se luqtah ke mutalliq poocha gaya. Wo yaqeen rakhte thay ke Aap (Sallallahu Alaihi Wasallam) ne farmaya is ke bartan ki banawat aur is ke bandhan ko zehan mein rakh, phir ek saal tak is ka elan karta reh. Yazid bayan karte thay ke agar ise pehchanne wala (is arsa mein) na milay to pane wale ko apni zarooriyat mein kharch kar lena chahiye. Aur ye is ke paas amanat ke taur par ho ga. Is aakhri tukre (ke is ke paas amanat ke taur par ho ga) ke mutalliq mujhe maloom nahi ke ye Rasul Allah (Sallallahu Alaihi Wasallam) ki hadees hai ya khud unhon ne apni taraf se ye baat kahi hai. Phir poocha, rasta bhooli hui bakri ke mutalliq aap ka kya irshad hai ? Aap (Sallallahu Alaihi Wasallam) ne farmaya ke ise pakar lo. Wo ya tumhari ho gi (jab ke asal malik na milay) ya tumhare bhai (malik) ke paas pahunch jaye gi, ya phir ise bhediya utha lay jaye ga. Yazid ne bayan kiya ke is ka bhi elan kiya jaye ga. Phir sahabi ne poocha, rasta bhoole hue oont ke baare mein aap ka kya irshad hai ? Aap (Sallallahu Alaihi Wasallam) ne farmaya ke ise azad rehne do, is ke sath is ke khur bhi hain aur is ka mashkeeza bhi, khud pani par pahunch jaye ga aur khud hi darakht ke patte kha lay ga aur is tarah wo apne malik tak pahunch jaye ga
.

Aur Laith Bin Saad ne bayan kiya ke mujh se Jafar Bin Rabia ne bayan kiya, un se Abdur Rahman Bin Hurmuz ne aur un se Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ne Bani Israel ke ek mard ka zikar kiya. Phir poori hadees bayan ki (jo is se pehle guzar chuki hai) ke (qarz dene wala) bahar ye dekhne ke liye nikla ke mumkin hai koi jahaz is ka rupiyah lay kar aya ho. (Darya ke kinare par jab wo pahuncha) to ise ek lakri mili jise us ne apne ghar ke indhan ke liye utha liya. Lekin jab ise cheera to is mein rupiyah aur khat paya
.

Hum se Qutaiba Bin Saeed ne bayan kiya, kaha ke hum se Ismail Bin Jafar ne bayan kiya, un se Rabia Bin Abdur Rahman ne, un se Manbath ke ghulam Yazid ne, aur un se Zaid Bin Khalid Juhani (Radi Allahu Anhu) ne ke ek shakhs ne Rasul Allah (Sallallahu Alaihi Wasallam) se luqtah ke baare mein poocha. Aap (Sallallahu Alaihi Wasallam) ne farmaya ke ek saal tak is ka elan karta reh. Phir is ke bandhan aur bartan ki banawat ko zehan mein yaad rakh. Aur ise apni zarooriyat mein kharch kar. Is ka malik agar is ke baad aaye to ise wapas kar day. Sahaba (Radi Allahu Anhum) ne poocha Ya Rasul Allah! rasta bhooli hui bakri ka kya kiya jaye ? To Aap (Sallallahu Alaihi Wasallam) ne farmaya ke ise pakar lo, kyunke wo ya tumhari ho gi ya tumhare bhai ki ho gi ya phir bhediye ki ho gi. Sahaba ne poocha, Ya Rasul Allah! rasta bhoole hue oont ka kya kiya jaye ? Aap (Sallallahu Alaihi Wasallam) is par ghussa ho gaye aur chehra mubarak surkh ho gaya (ya rawi ne «وجنتاه» ke bajaye) «احمر وجهه» kaha. Phir Aap (Sallallahu Alaihi Wasallam) ne farmaya, tumhe is se kya matlab ? Is ke sath khud is ke khur aur is ka mashkeeza hai. Isi tarah ise is ka asal malik mil jaye ga
.

Hum se Sulaiman Bin Harb ne bayan kiya, kaha ke hum se Shuba ne bayan kiya, un se Salama Bin Kuhail ne bayan kiya ke mein ne Suwaid Bin Ghaflah se suna, unhon ne bayan kiya ke mein Salman Bin Rabia aur Zaid Bin Souhan ke sath ek Jihad mein shareek tha. Mein ne ek kora paya (aur is ko utha liya) donon mein se ek ne mujh se kaha ke ise phenk day. Mein ne kaha ke mumkin hai mujhe is ka malik mil jaye. (To is ko day donga) warna khud is se nafa uthaonga. Jihad se wapas hone ke baad hum ne hajj kiya. Jab mein Madine gaya to mein ne Ubayy Bin Kaab (Radi Allahu Anhu) se is ke baare mein poocha, unhon ne batlaya ke Nabi Kareem (Sallallahu Alaihi Wasallam) ke zamana mein mujh ko ek theili mil gayi thi. Jis mein sau dinar thay. Mein ise lay kar Aap (Sallallahu Alaihi Wasallam) ki khidmat mein gaya. Aap (Sallallahu Alaihi Wasallam) ne farmaya ke ek saal tak is ka elan karta reh, mein ne ek saal tak is ka elan kiya aur phir hazir hua. (Ke malik abhi tak nahi mila) Aap (Sallallahu Alaihi Wasallam) ne farmaya ke ek saal tak aur elan kar, mein ne ek saal tak is ka phir elan kiya, aur hazir khidmat hua. Is martaba bhi Aap (Sallallahu Alaihi Wasallam) ne farmaya ke ek saal tak is ka phir elan kar, mein ne phir ek saal tak elan kiya aur jab chauthi martaba hazir hua to Aap (Sallallahu Alaihi Wasallam) ne farmaya ke raqam ke adad, theili ka bandhan, aur is ki saakht ko khayal mein rakh, agar is ka malik mil jaye to ise de-day warna ise apni zarooriyat mein kharch kar. Hum se Abdan ne bayan kiya kaha ke mujhe mere baap ne khabar di Shuba se aur unhein Salama ne yahi hadees, Shuba ne bayan kiya ke phir is ke baad Makkah mein Salama se mila, to unhon ne kaha ke mujhe khayal nahi (is hadees mein Suwaid ne) teen saal tak batlane ka zikar kiya tha ya ek saal ka
.

Hum se Muhammad Bin Yusuf ne bayan kiya, kaha ke hum se Sufyan Sawri ne bayan kiya Rabia se, un se Manbath ke ghulam Yazid ne, aur un se Zaid Bin Khalid (Radi Allahu Anhu) ne kaha ke ek dehati ne Rasul Allah (Sallallahu Alaihi Wasallam) se luqtah ke mutalliq poocha, to Aap (Sallallahu Alaihi Wasallam) ne farmaya ke ek saal tak is ka elan karta reh, agar koi aisa shakhs aa jaye jo is ki banawat aur bandhan ke baare mein sahih sahih bataye (to ise de-day) warna apni zarooriyat mein ise kharch kar. Unhon ne jab aise oont ke mutalliq bhi poocha jo rasta bhool gaya ho. To Aap (Sallallahu Alaihi Wasallam) ke chehra mubarak ka rang badal gaya aur Aap (Sallallahu Alaihi Wasallam) ne farmaya ke tumhe is se kya matlab ? Is ke sath is ka mashkeeza aur is ke khur maujood hain. Wo khud pani tak pahunch sakta hai. Aur darakht ke patte kha sakta hai aur is tarah wo apne malik tak pahunch sakta hai. Unhon ne rasta bhooli hui bakri ke mutalliq bhi poocha, to Aap (Sallallahu Alaihi Wasallam) ne farmaya ke ya wo tumhari ho gi ya tumhare bhai (asal malik) ko mil jaye gi. Warna ise bhediya utha lay jaye ga
.

Hum se Ali bin Abdullah Madini ne kaha , in se Sufyan bin Uyaynah ne , in se Yahya bin Saeed ne , in se Munba-is ke maula Yazid ne ke Nabi Karim salla Allahu alaihi wasallam se khoyi hui bakri ke mutalliq sawal kiya gaya to Aap salla Allahu alaihi wasallam ne farmaya ke usay pakar lo , kyunke ya woh tumhari ho gi (agar ek saal tak elan ke baad is ka malik na mila) . Tumhare kisi bhai ki ho gi ya phir bheriye ki ho gi (agar inhi janglon mein phirti rahi) aur Aap salla Allahu alaihi wasallam se khoye huay oont ke mutalliq sawal kiya gaya to Aap ghussa ho gaye aur ghussa ki wajah se Aap ke donon rukhsaar surkh ho gaye aur Aap salla Allahu alaihi wasallam ne farmaya ke tumhein is se kiya gharz! Is ke paas (mazboot) khur hain (jis ki wajah se chalne mein usay koi dushwari nahi ho gi) is ke paas mushkeeza hai jis se woh pani peeta rahe ga aur darakht ke patte khata rahe ga , yahan tak ke is ka malik usay paale ga . Aur Nabi Karim salla Allahu alaihi wasallam se luqtah ke mutalliq sawal kiya gaya to Aap salla Allahu alaihi wasallam ne farmaya ke is ki rassi ka (jis se woh bandha ho) aur is ke zarf ka (jis mein woh rakkha ho) elan karo aur is ka ek saal tak elan karo , phir agar koi aisa shakhs aa jaye jo usay pehchanta ho (aur is ka malik ho to usay de do) warna usay apne maal ke saath mila lo . Sufyan bin Uyaynah ne byaan kiya ke phir main Rabia bin Abdur Rahman se mila aur mujhe in se is ke siwa aur koi cheez mahfooz nahi hai . Main ne in se poocha thu ke gum-shuda cheezon ke baare mein Munba-is ke maula Yazid ki hadees ke baare mein Aap ka kiya khayal hai ? kiya woh Zayd bin Khalid se manqool hai ? To unhon ne kaha ke haan (Sufyan ne byaan kiya ke haan) Yahya ne byaan kiya ke Rabia ne Munba-is ke maula Yazid se byaan kiya , in se Zayd bin Khalid ne . Sufyan ne byaan kiya ke phir main ne Rabia se mulaqat ki aur in se is ke mutalliq poocha .