Mujh se Muhammad Bin Salam ne bayan kiya ‘ in se Sufyan Bin Uyainah ne ‘ in se Amr Bin Dinar ne ‘ in se Ata Ibn Abi Rabah ne aur in se Ibn Abbas Radi Allahu Anhuma ne bayan kiya ke Nabi Kareem Sallallahu Alaihi Wasallam ne Bait-Allah ke tawaf mein ramal aur Safa-o-Marwa ke darmiyan dor ‘ mushrikeen ke samne apni taqat dikhane ke liye ki thi
.

Hum se Mumal bin Hisham ne byaan kiya ‘ kaha ke hum se Ismail ne Ayub se byaan kiya aur un se Ata bin Abi Rabah ne ke Ibn Abbas razi Allahu anhuma ne batlaya is waqt main maujood tha jab Rasool Allah salla Allahu alaihi wasallam ne khutba se pehle namaaz (Eid) parhi . Phir Aap salla Allahu alaihi wasallam ne dekha ke auraton tak Aap salla Allahu alaihi wasallam ki awaaz nahi puhanchi ‘ is liye Aap salla Allahu alaihi wasallam un ke paas bhi aaye . Aap salla Allahu alaihi wasallam ke saath Bilal razi Allahu anhu thay jo apna kapra phailaye hue thay . Aap salla Allahu alaihi wasallam ne auraton ko waaz sunaya aur un se sadqa karne ke liye farmaya aur auraten (apna sadqa Bilal razi Allahu anhu ke kapre mein) daalne lagein . Yeh kehte waqt Ayub ne apne kaan aur gale ki taraf ishaara kiya .

Hum se Sulayman bin Harb ne byaan kiya , kaha ke hum se Hammad bin Zaid ne byaan kiya , un se Ayub Sakhtiyani ne , un se Saeed bin Jubair ne aur un se Ibn Abbas razi Allahu anhuma ne byaan kiya ke (Umrat-ul-Qada 7 Hijri mein) jab Rasool Allah salla Allahu alaihi wasallam (Makka) tashreef laye to mushrikon ne kaha ke Muhammad (salla Allahu alaihi wasallam) aaye hain , in ke saath aise log aaye hain jinhein Yathrib (Madina Munawwarah) ke bukhar ne kamzor kar diya hai . Is liye Rasool Allah salla Allahu alaihi wasallam ne hukm diya ke tawaf ke pehle teen chakron mein raml (taiz chalna jis se izhaar-e-quwwat ho) karein aur dono Yamani rukno ke darmiyan hasb-e-mamool chalein aur Aap salla Allahu alaihi wasallam ne yeh hukm nahi diya ke sab pheron mein raml karein is liye ke in par aasani ho .

Hum se Asbagh bin Faraj ne byaan kiya , kaha ke mujhe Abdullah bin Wahab ne khabar di , unhein Yunus ne , unhein Zuhri ne , unhein Salim ne aur un se in ke walid ne byaan kiya ke maine Rasool Allah salla Allahu alaihi wasallam ko dekha . Jab Aap salla Allahu alaihi wasallam Makka tashreef laate to pehle tawaf shuroo karte waqt Hajr-e-Aswad ko bosa dete aur saat chakron mein se pehle teen chakron mein raml karte thay .

Hum se Muhammad bin Salam ne byaan kiya , kaha ke hum se Sureij bin Numan ne byaan kiya , kaha ke hum se Fulaih ne byaan kiya , un se Nafi ne aur un se Ibn Umar razi Allahu anhuma ne byaan kiya ke Nabi Karim salla Allahu alaihi wasallam ne pehle teen chakron mein raml kiya aur baqiya chaar chakron mein hasb-e-mamool chale , Hajj aur Umrah dono mein . Sureij ke saath is hadees ko Layth ne riwayat kiya hai . Kaha ke mujh se Kaseer bin Farqad ne byaan kiya , un se Nafi ne aur un se Ibn Umar razi Allahu anhuma ne Nabi Karim salla Allahu alaihi wasallam ke hawala se .

Hum se Ibrahim bin Al-Munzir ne byaan kiya , unhon ne kaha ke hum se Abu Damrah Anas bin Iyadh ne byaan kiya , unhon ne kaha ke hum se Musa bin Uqbah ne byaan kiya , unhon ne Nafi se byaan kiya aur un se Abdullah bin Umar razi Allahu anhuma ne byaan kiya ke Rasool Allah salla Allahu alaihi wasallam ne (Makka) aane ke baad sab se pehle Hajj aur Umrah ka tawaf kiya tha . Is ke teen chakron mein Aap salla Allahu alaihi wasallam ne sayi (raml) ki aur baaqi chaar mein hasb-e-mamool chale . Phir tawaf ki do rak'at namaaz parhi aur Safa Marwah ki sayi ki .

Hum se Ibrahim bin Al-Munzir ne byaan kiya , unhon ne kaha ke hum se Anas bin Iyadh ne byaan kiya , un se Ubaidullah Umari ne , un se Nafi ne aur un se Abdullah bin Umar razi Allahu anhuma ne ke Nabi Karim salla Allahu alaihi wasallam jab Baitullah ka pehla tawaf (yani tawaf-e-qudoom) karte to us ke teen chakron mein Aap salla Allahu alaihi wasallam dour kar chalte aur chaar mein mamool ke muwafiq chalte phir jab Safa aur Marwah ki sayi karte to ”batan-e-maseel“ (wadi) mein dour kar chalte .

Hum ne Muhammad Bin Ubaid ne bayan kiya, unhon ne kaha ke hum se Isa Bin Yunus ne bayan kiya, un se Ubaidullah Bin Umar ne, un se Nafi ne aur un se Abdullah Bin Umar (Radi Allahu Anhuma) ne bayan kiya ke jab Rasul Allah (Sallallahu Alaihi Wasallam) pehla tawaf karte to is ke teen chakron mein ramal karte aur baqiya chaar mein mamool ke mutabiq chalte aur jab Safa aur Marwah ki sayee karte to Aap nale ke nasheeb mein doura karte thay. Ubaidullah ne kaha mein ne Nafi se poocha, Ibn Umar (Radi Allahu Anhuma) jab Rukn-e-Yamani ke paas pohanchte to kya hasb-e-mamool chalne lagte thay? Unhon ne farmaya ke nahi. Albatta agar Rukn-e-Yamani par hujoom hota to Hajar-e-Aswad ke paas aa kar aap aahista chalne lagte kyunke wo baghair choome is ko nahi chhortay thay
.

Hum se Ali Bin Abdullah Madini ne bayan kiya, kaha ke hum se Sufyan Bin Uyainah ne bayan kiya, un se Amr Bin Dinar ne, un se Ata Bin Abi Rabah ne aur un se Abdullah Bin Abbas (Radi Allahu Anhuma) ne ke Rasul Allah (Sallallahu Alaihi Wasallam) ne Bait Allah ka tawaf aur Safa Marwah ki sayee is tarah ki ke Mushrikeen ko Aap apni quwat dikhla sakein. Humaidi ne ye izafa kiya hai ke hum se Sufyan Bin Uyainah ne bayan kiya, un se Amr Bin Dinar ne bayan kiya, kaha ke mein ne Ata se suna aur unhon ne Ibn Abbas (Radi Allahu Anhuma) se yahi hadees suni
.

Hum se Sulaiman Bin Harb ne bayan kiya ‘ kaha hum se Hammad Bin Zaid ne bayan kiya ‘ in se Ayub Sakhtiyani ne ‘ in se Saeed Bin Jubair ne aur in se Abdullah Bin Abbas Radi Allahu Anhuma ne ke jab Nabi Kareem Sallallahu Alaihi Wasallam sahaba Radi Allahu Anhum ke sath (umra ke liye Makka) tashreef laye to mushrikeen ne kaha ke tumhare yahan wo log aa rahe hain jinhein Yasrib (Madina) ke bukhar ne kamzor kar diya hai. Is liye Nabi Kareem Sallallahu Alaihi Wasallam ne hukm diya ke tawaf ke pehle teen chakron mein akar kar chala jaye aur Rukn-e-Yamani aur Hajar-e-Aswad ke darmiyan hasb-e-mamool chalein. Tamam chakron mein akar kar chalne ka hukm Aap ne is liye nahi diya ke kahin ye (ummat par) dushwar na ho jaye. Aur Hammad Bin Salama ne Ayub se is hadees ko riwayat kar ke ye izafa kiya hai. In se Saeed Bin Jubair ne aur in se Ibn Abbas Radi Allahu Anhuma ne bayan kiya ke jab Nabi Kareem Sallallahu Alaihi Wasallam is saal umra karne aaye jis mein mushrikeen ne Aap ko aman diya tha to Aap Sallallahu Alaihi Wasallam ne farmaya ke akar kar chalo taake mushrikeen tumhari quwwat ko dekhein. Mushrikeen Jabal-e-Quaiqiaan ki taraf kharay dekh rahe thay
.