Hum se Muhammad bin Salam ne byaan kiya , kaha ke hum se Sureij bin Numan ne byaan kiya , kaha ke hum se Fulaih ne byaan kiya , un se Nafi ne aur un se Ibn Umar razi Allahu anhuma ne byaan kiya ke Nabi Karim salla Allahu alaihi wasallam ne pehle teen chakron mein raml kiya aur baqiya chaar chakron mein hasb-e-mamool chale , Hajj aur Umrah dono mein . Sureij ke saath is hadees ko Layth ne riwayat kiya hai . Kaha ke mujh se Kaseer bin Farqad ne byaan kiya , un se Nafi ne aur un se Ibn Umar razi Allahu anhuma ne Nabi Karim salla Allahu alaihi wasallam ke hawala se .

Hum se Saeed bin Abi Maryam ne byaan kiya , kaha ke humein Muhammad bin Jafar ne khabar di , kaha ke mujhe Zaid bin Aslam ne khabar di , unhein in ke walid ne ke Umar bin Khattab razi Allahu anhu ne Hajr-e-Aswad ko khitab kar ke farmaya ”Bakhuda mujhe khoob maloom hai ke tu sirf ek patthar hai jo na koi nafa puhancha sakta hai na nuqsan aur agar maine Rasool Allah salla Allahu alaihi wasallam ko tujhe bosa dete na dekha hota to main kabhi bosa na deta .“ Is ke baad Aap ne bosa diya . Phir farmaya ”Aur ab humein raml ki bhi kya zaroorat hai . Hum ne is ke zariya mushrikon ko apni quwwat dikhayi thi to Allah ne in ko tabah kar diya .“ Phir farmaya ”Jo amal Rasool Allah salla Allahu alaihi wasallam ne kiya hai usay ab chhorna bhi hum pasand nahi karte .“

Hum se Musaddad ne byaan kiya , un se Yahya Qattan ne byaan kiya , un se Ubaidullah Umari ne , un se Nafi ne aur un se Ibn Umar razi Allahu anhuma ne byaan kiya . Jab se maine Rasool Allah salla Allahu alaihi wasallam ko in dono Rukn-e-Yamani ko choomte hue dekha maine bhi is ke choomne ko khwah sakht haalat hon ya narm nahi chhora . Maine Nafi se poocha kya Ibn Umar razi Allahu anhuma in dono Yamani rukno ke darmiyan mamool ke mutabiq chalte thay ? To unhon ne bataya ke Aap mamool ke mutabiq is liye chalte thay taake Hajr-e-Aswad ko chhoune mein aasani rahe .