Is Hadees ko hum se Abdullah bin Maslamah ne bayan kiya, woh Imam Maalik se, woh Zaid bin Aslam se, woh Ata bin Yasaar se, woh Abdullah Ibne-e-Abbas Radhiallahu Anhuma se naql karte hain ke Nabi kareem Sallallahu Alaihi Wasallam ne farmaaya mujhe dozakh dikhlaayi gayi to us mein ziyadatar aurtein thein jo kufr karti hain. Kaha gaya ya RasoolAllah! Kya woh Allah ke saath kufr karti hain? Aap Sallallahu Alaihi Wasallam ne farmaaya ke khaawind ki na-shukri karti hain. Aur ehsaan ki na-shukri karti hain. Agar tum Umar bhar un mein se kisi ke saath ehsaan karte raho. Phir tumhaari taraf se kabhi koi un ke khayaal mein nagawaari ki baat ho jaaye to fauran keh uthegi ke main ne kabhi bhi tujh se koi bhalaayi nahi dekhi.

Hum se Sulaiman bin Harb ne bayan kiya, un se Sho’bah ne Ayyub ke waaste se bayan kiya, unhon ne Ata bin Abi Ribaah se suna, unhon ne Ibne-e-Abbas Radhiallahu Anhuma se suna ke main Rasoolullah Sallallahu Alaihi Wasallam par gawaahi deta hun, ya Ata ne kaha ke main Ibne-e-Abbas par gawaahi deta hun ke Nabi Kareem Sallallahu Alaihi Wasallam (ek martaba eid ke mauqa’ par mardon ki safon mein se) nikle aur Aap Sallallahu Alaihi Wasallam ke saath Bilal Radhiallahu Anhu the. Aap ko khayaal huwa ke aurton ko (khutbah achchi tarah) nahi sunaayi diya. To Aap Sallallahu Alaihi Wasallam ne unhein alaahida naseehat farmaayi aur sadqe ka hukm diya (yeh waaz sun kar) koi aurat baali (aur koi aurat) angothi daalne lagi aur Bilal Radhiallahu Anhu apne kapde ke daaman mein (yeh cheezein) lene lage. Is Hadees ko Ismail bin ’Ulaiyah ne Ayyub se riwayat kiya, unhon ne Ata se ke Ibne-e-Abbas Radhiallahu Anhuma ne yun kaha ke main Nabi Kareem Sallallahu Alaihi Wasallam par gawaahi deta hun (is mein shak nahi hai). Imam Bukhari Rahimahullah ki gharz yeh hai ke agla baab aam logon se mutalliq tha aur yeh haakim aur imam se mutalliq hai ke woh bhi aurton ko waaz sunaaye.

Hum se Sa’eed bin Abi Maryam ne bayan kiya, unhon ne kaha hum se Muhammed bin Ja’far ne bayan kiya, unhon ne kaha mujhe Zaid ne aur yeh Zaid Aslam ke bete hain, unhon ne ’Iyaaz bin Abdullah se, unhon ne Abu Sa’eed Khudri Radhiallahu Anhu se ke aap ne farmaaya ke Rasoolullah Sallallahu Alaihi Wasallam Eid-ul-Azha ya Eid-ul-Fitr mein eidgaah tashreef le gaye. Wahan Aap Sallallahu Alaihi Wasallam aurton ke paas se guzre aur farmaaya aye aurton ki jama’at! Sadqa karo, kiunki main ne jahannam mein ziyada tum hi ko dekha hai. Unhon ne kaha ya Rasoolallah! Aisa kiun? Aap Sallallahu Alaihi Wasallam ne farmaaya ke tum la’an ta’an bahut karti ho aur shauhar ki na-shukri karti ho, bawjood aql aur deen mein naaqis hone ke main ne tum se ziyada kisi ko bhi ek aqalmand aur tajurbekaar aadmi ko dewaana bana dene waala nahi dekha. Aurton ne arz ki ke hamaare deen aur hamaari aql mein nuqsaan kya hai ya Rasoolallah? Aap Sallallahu Alaihi Wasallam ne farmaaya kya aurat ki gawaahi mard ki gawaahi se nisf nahi hai? Unhon ne kaha, ji hai. Aap Sallallahu Alaihi Wasallam ne farmaaya bas yahi us ki aql ka nuqsaan hai. Phir Aap ne poocha kya aisa nahi hai ke jab aurat haaiza ho to na Namaz padh sakti hai na Roza rakh sakti hai, aurton ne kaha aisa hi hai. Aap Sallallahu Alaihi Wasallam ne farmaaya ke yahi us ke deen ka nuqsaan hai.

Hum se Abdullah bin Maslama ne bayan kiya , unhon ne Imam Malik ke wastay se bayan kiya , unhon ne Zaid bin Aslam se , unhon ne Ata bin Yasar se , unhon ne Abdullah bin Abbas raziyallahu anhuma se , unhon ne farmaya ke sooraj grahan hua to Nabi Karim salla Allahu alaihi wa sallam ne namaz parhi aur farmaya ke mujhe aaj dozakh dikhayi gayi , is se zyada bhayanak manzar mein ne kabhi nahi dekha .

Hum se Ismail ne byaan kiya , unhon ne kaha ke mujhe Imam Malik ne Zaid bin Aslam se byaan kiya , unhon ne Ata bin Yasar se , unhon ne Abdullah bin Abbas razi Allahu anhuma se , unhon ne farmaya ke Nabi Karim salla Allahu alaihi wasallam ke ahd mein sooraj grahan hua to Aap salla Allahu alaihi wasallam ne grahan ki namaaz parhi . Logon ne poocha ke ya Rasool Allah! hum ne dekha ke (namaaz mein) Aap salla Allahu alaihi wasallam apni jagah se kuch lene ko aage barhe thay phir hum ne dekha ke kuch peeche hate . Aap salla Allahu alaihi wasallam ne farmaya ke main ne jannat dekhi to us mein se ek khusha lena chaha aur agar main le leta to us waqt tak tum usay khate rehte jab tak dunya maujood hai .

Hum se Amr bin Ali Fallas ne byaan kiya , kaha ke hum se Yahya bin Saeed Qattan ne byaan kiya , kaha ke hum se Sufyan Thauri ne byaan kiya , kaha ke mujh se Abdur Rahman bin Aabis ne byaan kiya , kaha ke main ne Ibn Abbas razi Allahu anhuma se suna aur un se ek shakhs ne yeh poocha tha ke kya tum ne (auraton ka) nikalna eid ke din Nabi Karim salla Allahu alaihi wasallam ke saath dekha hai ? Unhon ne kaha haan dekha hai agar main Aap ka rishta daar aziz na hota to kabhi na dekhta (yani meri kam sini aur qarabat ki wajah se Nabi Karim salla Allahu alaihi wasallam mujh ko apne saath rakhte thay) Kathir bin Salt ke makaan ke paas jo nishaan hai pehle wahan Aap salla Allahu alaihi wasallam tashreef laye wahan Aap salla Allahu alaihi wasallam ne khutba sunaya phir Aap salla Allahu alaihi wasallam auraton ke paas tashreef laye aur unhein bhi waz o naseehat ki . Aap salla Allahu alaihi wasallam ne un se khairaat karne ke liye kaha , chunanchay auraton ne apne chhallay aur anguthiyan utaar utaar kar Bilal razi Allahu anhu ke kapre mein daalni shuru kar di . Aakhir Nabi Karim salla Allahu alaihi wasallam Bilal razi Allahu anhu ke saath ghar tashreef laye .

Hum se Abdullah bin Maslamah Qa'nabi ne byaan kiya , un se Imam Malik ne byaan kiya , un se Zaid bin Aslam ne byaan kiya , un se Ata bin Yasar ne byaan kiya , un se Abdullah bin Abbas razi Allahu anhuma ne ke Nabi Karim salla Allahu alaihi wasallam ke zamane mein sooraj ko grahan laga to Aap salla Allahu alaihi wasallam ne namaaz parhi thi Aap salla Allahu alaihi wasallam ne itna lamba qayam kiya ke itni der mein Surah Al-Baqarah parhi ja sakti thi . Phir Aap salla Allahu alaihi wasallam ne ruku lamba kiya aur is ke baad kharay huay to ab ki martaba bhi qayam bohat lamba tha lekin pehle se kuch kam phir aik doosra lamba ruku kiya jo pehle ruku se kuch kam tha phir Aap salla Allahu alaihi wasallam sajdah mein gaye , sajdah se uth kar phir lamba qayam kiya lekin pehle qayam ke muqable mein kam lamba tha phir aik lamba ruku kiya . Yeh ruku bhi pehle ruku ke muqabla mein kam tha ruku se sar uthane ke baad phir Aap salla Allahu alaihi wasallam bohat der tak kharay rahe aur yeh qayam bhi pehle se mukhtasir tha . Phir (chautha) ruku kiya yeh bhi bohat lamba tha lekin pehle se kuch kam . Phir Aap salla Allahu alaihi wasallam ne sajdah kiya aur namaaz se farigh huay to sooraj saaf ho chuka tha . Is ke baad Aap salla Allahu alaihi wasallam ne khutbah mein farmaya ke sooraj aur chaand donon Allah Ta'ala ki nishaniyan hain aur kisi ki maut o zindagi ki wajah se un mein grahan nahi lagta is liye jab tum ko maloom ho ke grahan lag gaya hai to Allah Ta'ala ka zikr karo . Sahaba razi Allahu anhum ne arz kiya Ya Rasool Allah! hum ne dekha ke (namaaz mein) apni jagah se aap kuch aage barhay aur phir is ke baad peeche hat gaye . Aap salla Allahu alaihi wasallam ne farmaya ke main ne Jannat dekhi aur us ka yak khosha torna chaha tha agar main use tor sakta to tum use rehti dunya tak khate aur mujhe Jahannum bhi dikhayi gayi main ne is se ziyada bhayanak aur khaufnaak manzar kabhi nahi dekha . Main ne dekha is mein auraten ziyada hain . Kisi ne poocha Ya Rasool Allah! is ki kya wajah hai ? Aap salla Allahu alaihi wasallam ne farmaya ke apne kufr (inkaar) ki wajah se , poocha gaya . Kya Allah Ta'ala ka kufr (inkaar) karti hain ? Aap salla Allahu alaihi wasallam ne farmaya ke shauhar ka aur ahsaan ka kufr karti hain . Zindagi bhar tum kisi aurat ke saath husn-e-sulook karo lekin kabhi agar koi khilaaf mizaaj baat aa gayi to foran yahi kahe gi ke main ne tum se kabhi bhalayi nahi dekhi .

Hum se Saeed bin Abi Maryam ne byaan kiya ‘ unhon ne kaha ke humein Muhammad bin Jafar ne khabar di ‘ unhon ne kaha ke mujhe Zaid bin Aslam ne khabar di ‘ unhein Iyadh bin Abdullah ne ‘ aur un se Abu Saeed Khudri razi Allahu anhu ne byaan kiya ‘ ke Rasool Allah salla Allahu alaihi wasallam Eid-ul-Adha ya Eid-ul-Fitr mein Eid gah tashreef le gaye . Phir (namaaz ke baad) logon ko waaz farmaya aur sadqa ka hukm diya . Farmaya: Logo! Sadqa do . Phir Aap salla Allahu alaihi wasallam auraton ki taraf gaye aur un se bhi yahi farmaya ke aurato! Sadqa do ke maine Jahannam mein bakasrat tum hi ko dekha hai . Auraton ne poocha ke Ya Rasool Allah! Aisa kyun hai ? Aap salla Allahu alaihi wasallam ne farmaya ‘ is liye ke tum laan-o-tan zyada karti ho aur apne shauhar ki nashukri karti ho . Maine tum se zyada aqal aur deen ke aitbar se naqis aisi koi makhlooq nahi dekhi jo kaar-aazmooda mard ki aqal ko bhi apni mutthi mein le leti ho . Haan ae aurato! Phir Aap salla Allahu alaihi wasallam wapas ghar puhanche to Ibn Masood razi Allahu anhu ki biwi Zainab razi Allahu anha aayin aur ijazat chahi . Aap salla Allahu alaihi wasallam se kaha gaya ke yeh Zainab aayi hain . Aap salla Allahu alaihi wasallam ne daryaft farmaya ke kaun si Zainab (kyunke Zainab naam ki bahut si auraten thi) kaha gaya ke Ibn Masood razi Allahu anhu ki biwi . Aap salla Allahu alaihi wasallam ne farmaya . Accha unhein ijazat de do ‘ chunanche ijazat de di gayi . Unhon ne aa kar arz kiya ke Ya Rasool Allah! Aaj Aap ne sadqa ka hukm diya tha . Aur mere paas bhi kuch zewar hai jisay main sadqa karna chahti thi . Lekin (mere khawand) Ibn Masood razi Allahu anhu yeh khayal karte hain ke woh aur un ke larke is ke in (miskeenon) se zyada mustahiq hain jin par main sadqa karoon gi . Rasool Allah salla Allahu alaihi wasallam ne is par farmaya ke Ibn Masood razi Allahu anhu ne sahih kaha . Tumhare shauhar aur tumhare larke is sadqa ke un se zyada mustahiq hain jinhein tum sadqa ke taur par do gi . (Maloom hua ke aqarib agar muhtaj hon to sadqa ke awwaleen mustahiq wahi hain) .

Hum se Umar bin Hafs bin Ghiyath ne byaan kiya ‘ kaha ke hum se mere baap ne byaan kiya ‘ kaha ke hum se Aamash ne byaan kiya ‘ un se Shaqeeq ne ‘ un se Amru bin Al-Harith ne aur un se Abdullah bin Masood razi Allahu anhu ki biwi Zainab razi Allahu anha ne . (Aamash ne) kaha ke maine is hadees ka zikr Ibrahim Nakh'ee se kiya . To unhon ne bhi mujh se Abu Ubaidah se byaan kiya . Un se Amru bin Harith ne aur un se Abdullah bin Masood razi Allahu anhu ki biwi Zainab ne ‘ bilkul isi tarah hadees byaan ki (jis tarah Shaqeeq ne ki ke) Zainab razi Allahu anha ne byaan kiya ke main Masjid-e-Nabwi mein thi . Rasool Allah salla Allahu alaihi wasallam ko maine dekha . Aap salla Allahu alaihi wasallam yeh farma rahe thay ‘ sadqa karo ‘ khwah apne zewar hi mein se do . Aur Zainab apna sadqa apne shauhar Abdullah bin Masood razi Allahu anhu aur chand yateemon par bhi jo in ki parwarish mein thay kharch kiya karti thin . Is liye unhon ne apne khawand se kaha ke Aap Rasool Allah salla Allahu alaihi wasallam se poochiye ke kya woh sadqa bhi mujh se kifayat kare ga jo main Aap par aur in chand yateemon par kharch karoon jo meri supardagi mein hain . Lekin Abdullah bin Masood razi Allahu anhu ne kaha ke tum khud ja kar Rasool Allah salla Allahu alaihi wasallam se pooch lo . Aakhir main khud Rasool Allah salla Allahu alaihi wasallam ki khidmat mein hazir hui . Is waqt maine Aap salla Allahu alaihi wasallam ke darwaze par ek Ansari khatoon ko paya . Jo meri hi jaisi zaroorat le kar maujood thin . (Jo Zainab Abu Masood Ansari ki biwi thin) phir hamare saamne se Bilal guzre . To hum ne un se kaha ke Aap Rasool Allah salla Allahu alaihi wasallam se yeh masla daryaft kijiye ke kya woh sadqa mujh se kifayat kare ga jisay main apne shauhar aur apni zair-e-tehweel chand yateem baccho par kharch kar doon . Hum ne Bilal se yeh bhi kaha ke hamara naam na lena . Woh andar gaye aur Aap salla Allahu alaihi wasallam se arz kiya ke do auraten masla daryaft karti hain . To Nabi Karim salla Allahu alaihi wasallam ne farmaya ke yeh dono kaun hain ? Bilal razi Allahu anhu ne keh diya ke Zainab naam ki hain . Aap salla Allahu alaihi wasallam ne farmaya ke kaun si Zainab ? Bilal razi Allahu anhu ne kaha ke Abdullah bin Masood razi Allahu anhu ki biwi . Aap salla Allahu alaihi wasallam ne farmaya ke haan! Beshak durust hai . Aur unhein do guna sawab mile ga . Ek qarabut-daari ka aur doosra khairat karne ka .

Hum se Ismail Bin Abi Uwais ne bayan kiya, unhon ne kaha ke mujh se Imam Malik ne bayan kiya, un se Zaid Bin Aslam ne, un se Ata Bin Yasar ne aur un se Abdullah Bin Abbas (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne farmaya "Sooraj aur chand Allah Ta'ala ki nishaniyon mein se do nishaniyan hain kisi ki maut-o-hayat se un mein grahan nahi lagta. Is liye jab tum grahan dekho to Allah ki yaad mein lag jaya karo."
.

Hum se Abdullah bin Yusuf ne byaan kiya , unhon ne kaha hum ko Imam Malik ne khabar di , unhein Zayd bin Aslam ne , unhein Ata bin Yasar ne aur unhein Abdullah bin Abbas razi Allahu anhuma ne , unhon ne byaan kiya ke Nabi Karim salla Allahu alaihi wasallam ke zamana mein sooraj girhan hua to Nabi Karim salla Allahu alaihi wasallam ne logon ke saath is ki namaz parhi . Aap ne bahut lamba qiyam ki itna taveel ke Surah al-Baqarah parhi ja sake phir taveel ruku kiya . Ruku se sar utha kar bahut der tak qiyam kiya . Yeh qiyam pehle qiyam se kuch kam tha . Phir Aap ne doosra taveel ruku kiya . Yeh ruku tawalat mein pehle ruku se kuch kam tha . Phir sar uthaya aur sajda kiya . Phir dobara qiyam kiya aur bahut der tak halat e qiyam mein rahe . Yeh qiyam pehli rakat ke qiyam se kuch kam tha . Phir taveel ruku kiya , yeh ruku pehle ruku se kuch kam taveel tha . Phir sar uthaya aur taveel qiyam kiya . Yeh qiyam pehle qiyam se kuch kam tha . Phir ruku kiya , taveel ruku . Aur yeh ruku pehle ruku se kuch kam taveel tha . Phir sar uthaya aur sajda mein gaye . Jab Aap namaz se farigh huay to girhan khatam ho chuka tha . Is ke baad Aap salla Allahu alaihi wasallam ne farmaya ke sooraj aur chaand Allah ki nishaniyon mein se do nishaniyan hain . In mein girhan kisi ki maut ya kisi ki hayat ki wajah se nahi hota . Is liye jab tum girhan dekho to Allah ko yaad karo . Sahabah ne arz kiya: ya Rasool Allah! Hum ne Aap ko dekha ke Aap ne apni jagah se koi cheez barh kar li . Phir hum ne dekha ke Aap hamain se hatt gaye . Nabi Karim salla Allahu alaihi wasallam ne farmaya ke main ne jannat dekhi ku ya (Nabi Karim salla Allahu alaihi wasallam ne farmaya rawi ko shak tha) mujhe jannat dikhayi gayi thi . Main ne is ka khosha torne ke liye hath barhaya tha aur agar main usay torr leta to tum rehti duniya tak usay khate aur main ne dozakh dekhi aaj ka is se zyada haibat-naak manzar main ne kabhi nahi dekha aur main ne dekha ke is mein auraton ki tadaad zyada hai . Sahabah ne arz kiya: ya Rasool Allah! Aaisa kyun hai ? Nabi Karim salla Allahu alaihi wasallam ne farmaya ke woh shohar ki na-shukri karti hain aur in ke ihsan ka inkar karti hain , agar tum in mein se kisi ek ke saath zindagi bhar bhi husn e sulook ka muamla karo phir bhi tumhari taraf se koi cheez is ke liye nagowari e khaatir hui to keh de gi ke main ne to tum se kabhi bhalayi dekhi hi nahi .

Hum se Abu Aasim Nabeel ne bayan kiya, unhon ne kaha hum ko Ibn Jurayj ne khabar di, unhon ne kaha hum ko Hasan bin Muslim ne khabar di, unhein Taoos ne aur unhein Ibn Abbas razi Allahu anhuma ne ke main Eid-ul-Fitr ki namaz mein Rasool Allah salla Allahu alaihi wasallam ke saath maujood tha. Nabi Karim salla Allahu alaihi wasallam ne khutba se pehle namaz parhayi aur Ibn Wahb ne Jurayj se yeh lafz barhaye ke phir Nabi Karim salla Allahu alaihi wasallam auraton ke majma ki taraf gaye (aur sadqa ki targheeb dilayi) to auratein Bilal razi Allahu anhu ke kapre mein chhalle-dar angoothiyaan daalne lagein.

Hum se Muhammad bin Ar-ara ne bayan kiya, kaha hum se Shubah ne bayan kiya, in se Adi bin Sabit ne, in se Saeed bin Jubayr ne aur in se Ibn Abbas razi Allahu anhuma ne bayan kiya ke Rasool Allah salla Allahu alaihi wasallam Eid-ul-Fitr ke din (aabadi se bahar) gaye aur do rakat namaz parhayi Aap ne is se pehle aur is ke baad koi doosri nafl namaz nahi parhi phir Aap auraton ke majma ki taraf aaye aur unhein sadqa ka hukm farmaya. Chunanche auratein apni baaliyaan aur khushboo aur mushk ke haar sadqa mein dene lagein.