Hum se Amr Bin Aun ne bayan kiya, kaha hum se Hammad Bin Zaid ne bayan kiya, un se Sabit ne aur un se Anas Bin Malik (Radi Allahu Anhu) ne ke Nabi Kareem (Sallallahu Alaihi Wasallam) ghore ki nangi peeth par jis par zeen nahi thi, sawar ho kar sahaba se aage nikal gaye thay. Nabi Kareem (Sallallahu Alaihi Wasallam) ki gardan mubarak mein talwar latak rahi thi
.

Hum se Adam ne bayan kiya, kaha hum se Shuba ne bayan kiya Qatada se ke mein ne Anas (Radi Allahu Anhu) se suna. Aap ne bayan kiya ke Madine par (dushman ke hamle ka) khauf tha. Is liye Nabi Kareem (Sallallahu Alaihi Wasallam) ne Abu Talha (Radi Allahu Anhu) se ek ghora jis ka naam Mandoob tha mustaar liya, phir Aap (Sallallahu Alaihi Wasallam) is par sawaar hue (Sahaba bhi sath thay) phir jab wapas hue to farmaya, hamein to koi khatra ki cheez nazar na aayi, albatta ye ghora samandar ki tarah (teiz daurta) paya
.

Hum se Ahmad Bin Abdul Malik Bin Waqid ne bayan kiya, kaha hum se Hammad Bin Zaid ne bayan kiya Sabit Banani se aur un se Anas Bin Malik (Radi Allahu Anhu) ne ke Nabi Kareem (Sallallahu Alaihi Wasallam) sab se ziyada haseen (khoobsurat) sab se ziyada bahadur aur sab se ziyada fayyaz thay, Madinah Tayyibah ke tamam log (ek raat) khauf-zada thay (awaz sunayi di thi aur sab log is ki taraf barh rahe thay) lekin Nabi Kareem (Sallallahu Alaihi Wasallam) is waqt ek ghore par sawar sab se aage thay (jab wapas hue to) farmaya is ghore ko (dorne mein) hum ne samundar paya
.

Hum se Muhammad Bin Bashar ne bayan kiya, kaha hum se Ghundar ne bayan kiya, kaha hum se Shuba ne bayan kiya ke mein ne Qatada se suna ke Anas Bin Malik (Radi Allahu Anhu) ne bayan kiya (ek raat) Madinah mein kuch khatra sa mehsoos hua to Nabi Kareem (Sallallahu Alaihi Wasallam) ne hamara (Abu Talha Radi Allahu Anhu ka jo Aap ke azeez thay) ghora mangwaya, ghore ka naam Mandub tha. Phir Aap (Sallallahu Alaihi Wasallam) ne farmaya "Khatra to hum ne koi nahi dekha albatta is ghore ko hum ne samundar paya hai."
.

Hum se Ahmad Bin Muhammad ne bayan kiya, kaha hum ko Abdullah Bin Mubarak ne khabar di, kaha hum ko Shuba ne khabar di, unhein Qatada ne aur unhon ne Anas Bin Malik (Radi Allahu Anhu) se suna ke Madinah mein (ek raat) kuch khauf aur ghabrahat hui to Nabi Kareem (Sallallahu Alaihi Wasallam) ne Abu Talha (Radi Allahu Anhu) ka ek ghora mang liya. Is ghore ka naam ”Mandub“ tha. Aap (Sallallahu Alaihi Wasallam) is par sawar hue aur wapas aa kar farmaya ke khauf ki to koi baat hum ne nahi dekhi albatta ye ghora kya hai darya hai!
.

Hum se Abdul Ala Bin Hammad ne bayan kiya, kaha hum se Yazid Bin Zuraie ne bayan kiya, kaha hum se Saeed ne bayan kiya, un se Qatada ne aur un se Anas Bin Malik (Radi Allahu Anhu) ne ke ek martaba (raat mein) ahl-e-Madinah ko dushman ka khatra hua to Nabi Kareem (Sallallahu Alaihi Wasallam) Abu Talha (Radi Allahu Anhu) ke ek ghore (Mandub) par sawar hue, ghora sust raftar tha ya (rawi ne yun kaha ke) is ki raftar mein susti thi, phir jab Aap (Sallallahu Alaihi Wasallam) wapas hue to farmaya ke hum ne to tumhare is ghore ko darya paya (ye bara hi tez raftar hai) chunancha is ke baad koi ghora is se aage nahi nikal sakta tha
.

Hum se Sulaiman Bin Harb ne bayan kiya, kaha hum se Hammad Bin Zaid ne bayan kiya, un se Sabit ne aur un se Anas (Radi Allahu Anhu) ne bayan kiya ke Nabi Kareem (Sallallahu Alaihi Wasallam) sab se ziyada khoobsurat aur sab se ziyada bahadur thay. Ek raat Madinah par (ek awaz sun kar) bara khauf chha gaya tha, sab log is awaz ki taraf barhe lekin Nabi Kareem (Sallallahu Alaihi Wasallam) sab se aage thay aur aap (Sallallahu Alaihi Wasallam) ne hi waqea ki tahqeeq ki. Aap (Sallallahu Alaihi Wasallam) Abu Talha (Radi Allahu Anhu) ke ek ghore par sawar thay jis ki pusht nangi thi. Aap (Sallallahu Alaihi Wasallam) ki gardan se talwar latak rahi thi aur aap (Sallallahu Alaihi Wasallam) farma rahe thay ke daro mat. Phir aap (Sallallahu Alaihi Wasallam) ne farmaya ke hum ne to ghore ko samundar ki tarah tez paya hai ya ye farmaya ke ghora jaise samundar hai
.

Hum se Musaddad ne bayan kiya, kaha hum se Yahya ne bayan kiya, un se Shuba ne, un se Qatada ne bayan kiya aur un se Anas Bin Malik (Radi Allahu Anhu) ne bayan kiya ke Madinah mein ek dafa kuch dahshat phail gayi to Rasul Allah (Sallallahu Alaihi Wasallam) Abu Talha (Radi Allahu Anhu) ke ek ghore par sawar ho kar (halat maloom karne ke liye sab se aage thay) phir Aap (Sallallahu Alaihi Wasallam) ne farmaya ke hum ne to koi baat nahi dekhi. Albatta is ghore ko hum ne dorne mein darya ki rawani jaisa tez paya hai (baab aur hadees mein mutabiqat zahir hai)
.

Hum se Fazl Bin Sahl ne bayan kiya, kaha hum se Husain Bin Muhammad ne bayan kiya, kaha hum se Jarir Bin Hazim ne bayan kiya, un se Muhammad ne un se Anas Bin Malik (Radi Allahu Anhu) ne bayan kiya ke (Madinah mein) logon mein dahshat phail gayi thi to Rasul Allah (Sallallahu Alaihi Wasallam) Abu Talha (Radi Allahu Anhu) ke ek ghore par jo bahut sust tha, sawar hue aur tanha eer lagate hue aage barhe. Sahaba (Radi Allahu Anhum) bhi Aap ke peeche sawar ho kar nikle. Is ke baad wapasi par Aap (Sallallahu Alaihi Wasallam) ne farmaya ke khaufzada hone ki koi baat nahi hai, albatta ye ghora darya hai. Is din ke baad phir wo ghora (dour waghaira ke mauqe par) kabhi peeche nahi raha
.

Hum se Qutaiba Bin Saeed ne bayan kiya ‘ kaha hum se Hammad ne bayan kiya ‘ in se Sabit ne aur in se Anas (Radi Allahu Anhu) ne ke Rasul Allah (Sallallahu Alaihi Wasallam) sab se ziyada haseen ‘ sab se ziyada sakhi aur sab se ziyada bahadur thay. Unhon ne kaha ke ek martaba raat ke waqt ahl-e-Madinah ghabra gaye thay ‘ kyunke ek awaz sunayi di thi. Phir Abu Talha (Radi Allahu Anhu) ke ek ghore par jis ki peeth nangi thi Rasul Allah (Sallallahu Alaihi Wasallam) haqeeqat-e-haal maloom karne ke liye tanha atraaf-e-Madinah mein sab se aage tashreef le gaye. Phir Aap (Sallallahu Alaihi Wasallam) wapas aa kar Sahaba (Radi Allahu Anhum) se mile to talwar Aap (Sallallahu Alaihi Wasallam) ki gardan mein latak rahi thi aur Aap (Sallallahu Alaihi Wasallam) farma rahe thay ke ghabrane ki koi baat nahi ‘ ghabrane ki koi baat nahi. Is ke baad Aap (Sallallahu Alaihi Wasallam) ne farmaya ke mein ne to ise darya ki tarah paya. (tez dorne mein) Aap (Sallallahu Alaihi Wasallam) ka ishara ghore ki taraf tha
.

Hum se Amr bin Aun ne bayan kiya, kaha hum se Hammad bin Zayd ne bayan kiya, in se Sabit ne aur in se Anas razi Allahu anhu ne bayan kiya ke Nabi Karim salla Allahu alaihi wasallam sab se zyada khoobsurat, sab se zyada sakhi aur sab se zyada bahadur thay. Ek raat Madinah wale (shehar ke bahar shor sun kar) ghabra gaye. (ke shayad dushman ne hamla kiya hai) sab log is shor ki taraf barhe. Lekin Nabi Karim salla Allahu alaihi wasallam aawaz ki taraf barhne walon mein sab se aage thay aur farmate jaate thay ke koi dar ki baat nahi, koi dar ki baat nahi. Nabi Karim salla Allahu alaihi wasallam is waqt Abu Talha ke (Mandub naami) ghore ki nangi peeth par sawar thay, is par koi zain nahi thi aur gale mein talwar latak rahi thi. Aap ne farmaya ke main ne is ghore ko samundar paya ya farmaya ke yeh teiz dorne mein samundar ki tarah tha.

Hum se Musaddad ne bayan kiya, kaha hum se Yahya ne bayan kiya, in se Shubah ne, in se Qatadah ne aur in se Anas bin Malik razi Allahu anhu ne ke Madinah Munawwarah par (ek raat na-maloom aawaz ki wajah se) dar tari ho gaya. Chunanche Rasool Allahsalla Allahu alaihi wasallam Abu Talha ke ek ghore par sawar huay. Phir (wapas aa kar) farmaya ”hamain to koi (khauf ki) cheez nazar na aayi, albatta yeh ghora to goya darya thu.“