Hum se Abu Nu’aim (Fazl bin Dukain) ne bayan kiya, kaha ke hum se Ma’mar bin Yahya bin Saam ne riwayat kiya, kaha ke hum se Abu Ja’far (Muhammed Baqir) ne bayan kiya, unhon ne kaha ke hum se Jabir ne bayan kiya ke mere paas tumhaare chacha ke bete (un ki muraad Hasan bin Muhammed Ibn-e-Hanafiyyah se thi) aaye. Unhon ne poocha ke janabat ke ghusl ka kya tareeqa hai? Main ne kaha ke Nabi-e-Kareem Sallallahu Alaihi Wasallam teen chullu paani lete aur un ko apne sar par bahaate the. Phir apne tamaam badan par paani bahaate the. Hasan ne us par kaha ke main to bahut baalon waala aadmi hun. Main ne jawab diya ke Nabi-e-Kareem Sallallahu Alaihi Wasallam ke baal tum se ziyada the.

Hum se Abdullah bin Yousuf ne bayan kiya, unhon ne kaha hamein Malik ne Hishaam se khabar di, woh apne waalid se, woh Nabi-e-Kareem Sallallahu Alaihi Wasallam ki zauja-e-mutahharah Aisha Radhiallahu Anha se riwayat karte hain ke Nabi-e-Kareem Sallallahu Alaihi Wasallam jab ghusl farmaate to Aap Sallallahu Alaihi Wasallam pehle apne dono haath dhote phir usi tarah Wuzu karte jaisa Namaz ke liye Aap Sallallahu Alaihi Wasallam Wuzu kiya karte the. Phir paani mein apni ungliyaan daakhil farmaate aur un se baalon ki jadon ka khilaal karte. Phir apne haathon se teen chullu sar par daalte phir tamaam badan par paani baha lete.

Hum se Muhammed bin Yousuf ne Hadees bayan ki, unhon ne kaha ke hum se Sufyan ne bayan kiya A’mash se riwayat kar ke, woh Salim Ibn-e-Abi Al-Ja’d se, woh Kuraib se, woh Ibn-e-Abbas Radhiallahu Anhuma se, woh Maimunah Radhiallahu Anha Nabi-e-Kareem Sallallahu Alaihi Wasallam ki zauja-e-mutahharah se riwayat karte hain, unhon ne batlaaya ke Nabi-e-Kareem Sallallahu Alaihi Wasallam ne Namaz ke Wuzu ki tarah ek martaba Wuzu kiya, albattah paaon nahi dhoye. Phir apni sharmgaah ko dhoya aur jahaan kahien bhi najasat lag gayi thi, us ko dhoya. Phir apne upar paani baha liya. Phir pehli jagah se hat kar apne dono paaon ko dhoya. Aap ka ghusl-e-janabat isi tarah huwa karta tha.

Hum se Abdullah bin Muhammed ne Hadees bayan ki, unhon ne kaha ke hum se Yahya bin Adam ne Hadees bayan ki, unhon ne kaha hum se Zubair ne Abu Ishaaq ke waaste se, unhon ne kaha hum se Abu Ja’far (Muhammed Baqir) ne bayan kiya ke woh aur un ke waalid (janab Zain-ul-Aabideen) Jabir bin Abdullah Radhiallahu Anhu ke paas the aur kuch aur log bhi baithe huwe the. Un logon ne aap se ghusl ke baare mein poocha to aap ne farmaaya ke ek Saa’ kaafi hai. Us par ek shakhs bola yeh mujhe to kaafi na hoga. Jabir Radhiallahu Anhu ne farmaaya ke yeh un ke liye kaafi hota tha jin ke baal tum se ziyada the aur jo tum se behtar the (yani Rasoolullah Sallallahu Alaihi Wasallam) phir Jabir Radhiallahu Anhu ne sirf ek kapda pahan kar hamein Namaz padhaayi. (Note: Saa’ ke andar 2.488 Kilogram hota hai.)

Abu Nu’aim ne hum se bayan kiya, unhon ne kaha ke hum se Zubair ne riwayat ki Abu Ishaaq se, unhon ne kaha ke hum se Jubair bin Mut’im Radhiallahu Anhu ne riwayat ki. Unhon ne kaha ke Rasoolullah Sallallahu Alaihi Wasallam ne farmaaya main to apne sar par teen martaba paani bahaata hun aur Aap Sallallahu Alaihi Wasallam ne apne dono haathon se ishaara kiya.

Muhammed bin Bashshaar ne hum se Hadees bayan ki, unhon ne kaha hum se Ghundar ne bayan kiya, unhon ne kaha ke hum se Sho’bah ne bayan kiya, Mikhwal bin Rashid ke waaste se, woh Muhammed bin ’Ali se, woh Jabir bin Abdullah Radhiallahu Anhuma se, unhon ne farmaaya ke Nabi-e-Kareem Sallallahu Alaihi Wasallam apne sar par teen martaba paani bahaate the.

Hum se Musa bin Ismail ne bayan kiya, unhon ne kaha hum se Abdul Waahid ne A’mash ke waaste se bayan kiya, unhon ne Salim bin Abi-Ja’d se, unhon ne Kuraib se, unhon ne Abdullah bin Abbas Radhiallahu Anhuma se, Aap ne farmaaya ke Umm-ul-Mo’mineen Maimunah Radhiallahu Anha ne farmaaya ke main ne Nabi-e-Kareem Sallallahu Alaihi Wasallam ke liye ghusl ka paani rakha to Aap Sallallahu Alaihi Wasallam ne apne haath do martaba ya teen martaba dhoye. Phir paani apne baayein haath mein le kar apni sharmgaah ko dhoya. Phir zameen par haath ragda. Us ke baad kulli ki aur naak mein paani daala aur apne chehre aur haathon ko dhoya. Phir apne saare badan par paani baha liya aur apni jagah se hat kar dono paaon dhoye.

Hum se Umar bin Hafs bin Ghiyath ne bayan kiya, kaha ke hum se mere waalid ne bayan kiya, kaha ke hum se A’mash ne, kaha mujh se Salim ne Kuraib ke waasta se, woh Ibn-e-Abbas Radhiallahu Anhuma se riwayat karte hain, kaha hum se Maimunah ne bayan farmaaya ke main ne Nabi-e-Kareem Sallallahu Alaihi Wasallam ke liye ghusl ka paani rakha. To pehle Aap Sallallahu Alaihi Wasallam ne paani ko daayen haath se baayein par giraaya. Is tarah apne dono haathon ko dhoya. Phir apni sharmgaah ko dhoya. Phir apne haath ko zameen par ragad kar use mitti se mila aur dhoya. Phir kulli ki aur naak mein paani daala. Phir apne chehre ko dhoya aur apne sar par paani bahaaya. Phir ek taraf ho kar dono paaon dhoye. Phir Aap Sallallahu Alaihi Wasallam ko rumaal diya gaya. Lekin Aap Sallallahu Alaihi Wasallam ne us se paani ko khushk nahi kiya.

Hum se Abdullah bin Zubair Humaidi ne bayan kiya, unhon ne kaha hum se Sufyan ne bayan kiya, unhon ne kaha ke hum se A’mash ne bayan kiya Salim bin Abi-Ja’d ke waaste se, unhon ne Kuraib se, unhon ne Abdullah bin Abbas Radhiallahu Anhuma se, unhon ne Maimunah Radhiallahu Anha se ke Nabi-e-Kareem Sallallahu Alaihi Wasallam ne ghusl-e-janabat kiya to pehle apni sharmgaah ko apne haath se dhoya. Phir haath ko deewaar par ragad kar dhoya. Phir Namaz ki tarah Wuzu kiya aur jab Aap Sallallahu Alaihi Wasallam apne ghusl se faarigh ho gaye to dono paaon dhoye.

Hum se Musaddad ne bayan kiya, unhon ne kaha hum se Hammad ne Hishaam ke waaste se bayan kiya, woh apne waalid se, woh Aisha Radhiallahu Anha se, aap ne farmaaya ke jab Rasoolullah Sallallahu Alaihi Wasallam ghusl-e-janabat farmaate to (pehle) apna haath dhote.

Hum se Muhammed bin Mahboob ne bayan kiya, unhon ne kaha hum se Abdul Wahid bin Ziyaad ne bayan kiya, unhon ne kaha hum se A’mash ne Salim bin Abi-Ja’d ke waaste se bayan kiya, unhon ne Kuraib Maula Ibn-e-Abbas se, unhon ne Abdullah bin Abbas Radhiallahu Anhuma se ke Maimunah Radhiallahu Anha ne kaha ke main ne Nabi-e-Kareem Sallallahu Alaihi Wasallam ke liye ghusl ka paani rakha. To Aap Sallallahu Alaihi Wasallam ne pehle paani apne haathon par gira kar unhein do ya teen baar dhoya. Phir apne daahne haath se baayein par gira kar apni sharamgaahon ko dhoya. Phir haath ko zameen par ragda. Phir kulli ki aur naak mein paani daala phir apne chehre aur haathon ko dhoya. Phir apne sar ko teen martaba dhoya, phir apne saare badan par paani bahaaya, phir Aap apni ghusl ki jagah se alag ho gaye. Phir apne qadmon ko dhoya.

Hum se Musa bin Ismail ne bayan kiya, unhon ne kaha hum se Abu ’Awaanah ne bayan kiya, unhon ne kaha hum se A’mash ne Salim bin Abi-Ja’d ke waaste se bayan kiya, woh Ibn-e-Abbas Radhiallahu Anhuma ke Maula Kuraib se, unhon ne Ibn-e-Abbas Radhiallahu Anhuma se, unhon ne Maimunah Bint-e-Haris Radhiallahu Anha se, unhon ne kaha ke main ne Nabi-e-Kareem Sallallahu Alaihi Wasallam ke liye (ghusl ka) paani rakha aur pardah kar diya, Aap ne (pehle ghusl mein) apne haath par paani daala aur use ek ya do baar dhoya. Sulaiman Al-A’mash kehte hain ke mujhe yaad nahi rawi (Salim bin Abi-Ja’d) ne teesri baar ka bhi zikr kiya ya nahi. Phir daahne haath se baayein par paani daala. Aur sharmgaah dhoyi, phir apne haath ko zameen par ya deewaar par ragda. Phir kulli ki aur naak mein paani daala aur chehre aur haathon ko dhoya. Aur sar ko dhoya. Phir saare badan par paani bahaaya. Phir ek taraf sarak kar dono paaon dhoye. Baad mein main ne ek kapda diya to Aap Sallallahu Alaihi Wasallam ne apne haath se ishaara kiya is tarah ke ise hataao aur Aap ne us kapde ka iradah nahi farmaaya.

Aur Aisha Radhiallahu Anha ne farmaaya ke main aur Rasoolullah Sallallahu Alaihi Wasallam ek bartan mein ghusl karte the. Hum dono us se chullu bhar bhar kar paani lete the.

Hum se Yousuf bin Esa ne bayan kiya, unhon ne kaha hum se Fazl bin Musa ne bayan kiya, unhon ne kaha hum se A’mash ne bayan kiya unhon ne Salim ke waaste se, unhon ne Kuraib Maula Ibn-e-Abbas se, unhon ne Abdullah bin Abbas Radhiallahu Anhuma se bayan kiya, unhon ne Umm-ul-Mo’mineen Maimunah Radhiallahu Anha se riwayat kiya, unhon ne farmaaya ke Rasoolullah Sallallahu Alaihi Wasallam ne ghusl-e-janabat ke liye paani rakha phir Aap Sallallahu Alaihi Wasallam ne pehle do ya teen martaba apne daayen haath se baayein haath par paani daala. Phir sharmgaah dhoyi. Phir haath ko zameen par ya deewaar par do ya teen baar ragda. Phir kulli ki aur naak mein paani daala aur apne chehre aur baazuon ko dhoya. Phir sar par paani bahaaya aur saare badan ka ghusl kiya. Phir apni jagah se sarak kar paaon dhoye. Maimunah Radhiallahu Anha ne farmaaya ke main ek kapda laayi to Aap Sallallahu Alaihi Wasallam ne use nahi liya aur haathon hi se paani jhaadne lage.

Hum se Abdan ne bayan kiya, kaha hum se Abu Hamza (Muhammed bin Maymoon) ne, kaha main ne A’mash se suna, unhon ne Salim bin Abi-Ja’d se, unhon ne Kuraib se, unhon ne Ibn-e-Abbas se, aap ne kaha ke Maimunah Radhiallahu Anha ne farmaaya ke main ne Nabi-e-Kareem Sallallahu Alaihi Wasallam ke liye ghusl ka paani rakha aur ek kapde se pardah kar diya. Pehle Aap Sallallahu Alaihi Wasallam ne apne dono haathon par paani daala aur unhein dhoya. Phir apne daahne haath se baayein haath mein paani liya aur sharmgaah dhoyi. Phir haath ko zameen par maara aur dhoya. Phir kulli ki aur naak mein paani daala aur chehre aur baazu dhoye. Phir sar par paani bahaaya aur saare badan ka ghusl kiya. Us ke baad Aap Sallallahu Alaihi Wasallam maqam-e-ghusl se ek taraf ho gaye. Phir dono paaon dhoye. Us ke baad main ne Aap Sallallahu Alaihi Wasallam ko ek kapda dena chaaha. To Aap Sallallahu Alaihi Wasallam ne use nahi liya aur Aap Sallallahu Alaihi Wasallam haathon se paani jhaadne lage.

Hum se Abdan ne bayan kiya, unhon ne kaha hum se Abdullah bin Mubarak ne bayan kiya, unhon ne kaha hum se Sufyan ne bayan kiya, unhon ne A’mash se, woh Salim bin Abi-Ja’d se, woh Kuraib se, woh Ibn-e-Abbas Radhiallahu Anhuma se, woh Maimunah Radhiallahu Anha se, unhon ne kaha ke jab Nabi-e-Kareem Sallallahu Alaihi Wasallam ghusl-e-janabat farmaa rahe the main ne Aap Sallallahu Alaihi Wasallam ka pardah kiya tha. To Aap Sallallahu Alaihi Wasallam ne pehle apne haath dhoye, phir daahne haath se baayein par paani bahaaya aur sharmgaah dhoyi aur jo kuch us mein lag gaya tha use dhoya phir haath ko zameen ya deewaar par ragad kar (dhoya) phir Namaz ki tarah Wuzu kiya. Paaon ke alawah. Phir paani apne saare badan par bahaaya aur us jagah se hat kar dono qadmon ko dhoya. Is Hadees mein Abu ’Awaanah aur Muhammed bin Fuzail ne bhi parde ka zikr kiya hai.