Hum se Abul Waleed ne bayan kiya, kaha ke hum se Shuba ne bayan kiya ke Abdul Malik Bin Maisarah ne mujhe khabar di kaha ke mein ne Nazzal Bin Sabrah se suna, aur unhon ne Abdullah Bin Masood (Radi Allahu Anhu) se suna, unhon ne kaha ke mein ne ek shakhs ko Quran ki ayat is tarah parhte suna ke Rasul Allah (Sallallahu Alaihi Wasallam) se mein ne is ke khilaf suna tha. Is liye mein in ka hath thame Aap (Sallallahu Alaihi Wasallam) ki khidmat mein lay gaya. Aap (Sallallahu Alaihi Wasallam) ne (mera aitraz sun kar) farmaya ke tum donon durust ho. Shuba ne bayan kiya ke mein samajhta hoon ke Aap (Sallallahu Alaihi Wasallam) ne ye bhi farmaya ke ikhtilaf na karo, kyunke tum se pehle log ikhtilaf hi ki wajah se tabah ho gaye
.

Hum se Abu Al-Yaman ne bayan kiya kaha hum ko Shuaib ne khabar di un se Zuhri ne bayan kiya unhein Abu Salamah Bin Abdur Rahman aur Saeed Bin Musayyib ne khabar di aur un se Abu Hurairah (Radi Allahu Anhu) ne bayan kiya ke Musalmanon ki jamaat ke ek aadmi aur Yahoodiyon mein se ek shakhs ka jhagra hua. Musalman ne kaha ke is zaat ki qasam jis ne Muhammad (Sallallahu Alaihi Wasallam) ko sari duniya mein barguzida banaya qasam khate hue unhon ne ye kaha. Is par Yahoodi ne kaha: Qasam hai is zaat ki jis ne Musa (Alaihis Salam) ko sari duniya mein barguzida banaya. Is par Musalman ne apna hath utha kar Yahoodi ko thappar maar diya. Wo Yahoodi Nabi Kareem (Sallallahu Alaihi Wasallam) ki khidmat mein aaya aur apne aur Musalman ke jhagray ki Aap (Sallallahu Alaihi Wasallam) ko khabar di. Aap (Sallallahu Alaihi Wasallam) ne isi mauqa par farmaya ke mujhe Musa (Alaihis Salam) par tarjeeh na diya karo. Log qiyamat ke din be-hosh kar diye jayein ge aur sab se pehle mein hosh mein aoon ga phir dekhoon ga ke Musa (Alaihis Salam) Arsh ka paya pakre hue kharay hain. Ab mujhe maloom nahi ke wo bhi be-hosh hone walon mein thay aur mujh se pehle hi hosh mein aa gaye ya unhein Allah Ta'ala ne be-hosh hone walon mein hi nahi rakkha tha

Hum se Yahya Bin Bukair ne bayan kiya kaha hum se Laith Bin Saad ne un se Abdul Aziz Bin Salamah ne un se Abdullah Bin Fuzail ne un se Aaraj ne aur un se Abu Hurairah (Radi Allahu Anhu) ne bayan kiya ke ek martaba logon ko ek Yahoodi apna saman dikha raha tha lekin ise is ki jo qeemat lagayi gayi is par wo raazi na tha. Is liye kehne laga ke hargiz nahi is zaat ki qasam jis ne Musa ko tamam insanon mein barguzida qarar diya. Ye lafz ek Ansari sahabi ne sun liye aur kharay ho kar unhon ne ek thappar is ke munh par mara aur kaha ke Nabi Kareem (Sallallahu Alaihi Wasallam) abhi hum mein maujood hain aur tu is tarah qasam khata hai ke is zaat ki qasam jis ne Musa (Alaihis Salam) ko tamam insanon mein barguzida qarar diya. Is par wo Yahoodi Nabi Kareem (Sallallahu Alaihi Wasallam) ki khidmat mein hazir hua aur kaha: Ae Abu Al-Qasim! Mera Musalmanon ke sath aman aur sulah ka ahd-o-paiman hai. Phir falan shakhs ka kya haal hoga jis ne mere munh par chanta mara hai Nabi Kareem (Sallallahu Alaihi Wasallam) ne is sahabi se daryaft farmaya ke tum ne is ke munh par kyun chanta mara? Unhon ne wajah bayan ki to Aap (Sallallahu Alaihi Wasallam) ghusse ho gaye is qadar ke ghusse ke aasar chehra mubarak par numayan ho gaye. Phir Nabi Kareem (Sallallahu Alaihi Wasallam) ne farmaya ke Allah Ta'ala ke anbiya mein aapas mein ek ko doosre par fazeelat na diya karo jab soor phoonka jaye ga to aasman-o-zameen ki tamam makhlooq par be-hoshi tari ho jaye gi siwa un ke jinhein Allah Ta'ala chahe ga. Phir doosri martaba soor phoonka jaye ga aur sab se pehle mujhe uthaya jaye ga lekin mein dekhoon ga ke Musa (Alaihis Salam) Arsh ko pakre hue kharay hon ge ab mujhe maloom nahi ke ye unhein Toor ki be-hoshi ka badla diya gaya hoga ya mujh se bhi pehle un ki be-hoshi khatam kar di gayi hogi

Hum se Adam Bin Abi Iyas ne bayan kiya, kaha hum se Shuba ne bayan kiya, kaha hum se Abdul Malik Bin Maisarah ne bayan kiya, kaha ke mein ne Nazzal Bin Sabrah Hilali se suna aur un se Abdullah Bin Masood (Radi Allahu Anhu) ne bayan kiya ke mein ne ek sahabi (Amr Bin Al-Aas) ko Quran Majeed ki ek aayat parhte suna. Wohi aayat Nabi Kareem (Sallallahu Alaihi Wasallam) se is ke khilaf qiraat ke sath mein sun chuka tha, is liye mein unhein sath le kar Aap (Sallallahu Alaihi Wasallam) ki khidmat mein hazir hua aur Aap (Sallallahu Alaihi Wasallam) se ye waqia bayan kiya lekin mein ne Aap (Sallallahu Alaihi Wasallam) ke chehra mubarak par is ki wajah se narazgi ke aasar dekhe. Aap (Sallallahu Alaihi Wasallam) ne farmaya tum dono accha parhte ho. Aapas mein ikhtilaf na kiya karo. Tum se pehle log isi qism ke jhagron se tabah ho gaye
.

Mujh se Hasan ne byaan kiya , kaha hum se Ismail bin Khaleel ne byaan kiya , kaha hum ko Abdur Raheem ne khabar di , unhein Zakariya bin Abi Zaidah ne , unhein Aamir ne aur un se Abu Hurairah razi Allahu anhu ne ke Nabi Karim salla Allahu alaihi wasallam ne farmaya ke aakhri martaba soor phoonke jaane ke baad sab se pehle apna sar uthane wala main hoon ga lekin is waqt main Musa alaihissalam ko dekhoon ga ke Arsh ke saath lipeite huay hain , ab mujhe nahi maloom ke woh pehle hi se isi tarah thay ya doosre soor ke baad (mujh se pehle) uth kar Arsh e Ilahi ko thaam lein ge .

Hum se Sulayman bin Harb ne byaan kiya , kaha hum se Shubah ne , un se Abdul Malik bin Maysarah ne , un se Nazzal bin Sabrah ne ke Abdullah bin Masood razi Allahu anhu ne ek sahab (Ubayy bin Kabb razi Allahu anhu) ko ek aayat parhte suna , wahi aayat unhon ne Rasool Allah salla Allahu alaihi wasallam se is ke khilaf suni ku . (Ibn Masood razi Allahu anhu ne byaan kiya ke) phir main ne un ka hath pakra aur unhein Nabi Karim salla Allahu alaihi wasallam ki khidmat mein laya . Nabi Karim salla Allahu alaihi wasallam ne farmaya ke tum donon sahih ho (is liye apne apne taur par parho .) (Shubah kehte hain ke) mera ghalib guman yeh hai ke Nabi Karim salla Allahu alaihi wasallam ne yeh bhi farmaya ke (ikhtilaf o niza na kiya karo) kyunke tum se pehle ki ummaton ne ikhtilaf kiya aur isi wajah se Allah Ta'ala ne unhein halak kar diya .

Hum se Saeed bin Abi Maryam ne byaan kiya , kaha hum ko Muhammad bin Jafar ne khabar di , kaha hum ko Humayd bin Abi Humayd Taweel ne khabar di , unhon ne Anas bin Malik se suna , unhon ne byaan kiya ke teen hazrat (Ali bin Abi Talib , Abdullah bin Amr bin al-Aas aur Usman bin Mazoon razi Allahu anhum) Nabi Karim salla Allahu alaihi wasallam ki azwaj e mutahharat ke gharon ki taraf Aap ki ibadat ke mutalliq poochne aaye , jab unhein Nabi Karim salla Allahu alaihi wasallam ka amal bataya gaya to jaise unhon ne usay kam samjha aur kaha ke hamara Nabi Karim salla Allahu alaihi wasallam se kiya muqabla! Aap ki to tamam agli pichhli laghzishein maaf kar di gayi hain . In mein se ek ne kaha ke aaj se main hamesha raat bhar namaz parha karoon ga . Doosre ne kaha ke main hamesha roze se rahoon ga aur kabhi nagha nahi hone doon ga . Teesre ne kaha ke main auraton se judayi ikhtiyar kar loon ga aur kabhi nikah nahi karoon ga . Phir Nabi Karim salla Allahu alaihi wasallam tashreef laye aur in se poocha kiya tum ne hi yeh baatein kahi hain ? Sun lo! Allah Ta'ala ki qasam! Allah Rabb-ul-Aalameen se main tum sab se zyada darne wala hoon . Main tum mein sab se zyada parhezgar hoon lekin main agar roze rakhta hoon to iftaar bhi karta hoon . Namaz parhta hoon (raat mein) aur sota bhi hoon aur main auraton se nikah karta hoon . «faman raghiba an sunnati falaysa minni» mere tariqe se jis ne be-raghbati ki woh mujh mein se nahi hai .

Hum se Abdullah bin Yusuf ne bayan kiya, kaha hum se Layth ne bayan kiya, kaha hum se Saeed ne bayan kiya woh Saeed Muqbiri hain, in se un ke walid ne aur in se Abu Hurairah razi Allahu anhu ne bayan kiya ke Nabi Karim salla Allahu alaihi wasallam farmaya karte thay ”Ae Musalman aurato! Tum mein se koi aurat apni kisi parosan ke liye kisi bhi cheez ko (hadiya mein) dene ke liye haqeer na samjhe khwah bakri ka paaya hi kyun na ho.“

Aur Majishoon ne Abdullah bin Fadl se riwayat ki, in se Abu Salamah ne aur in se Abu Hurairah razi Allahu anhu ne ke Nabi Karim salla Allahu alaihi wasallam ne farmaya ”phir main sab se pehle uthne wala hoon ga aur dekhoon ga ke Musa alaihissalam arsh ka paya thaame huay hain.“

Hum se Yahya ne bayan kiya , unhon ne kaha hum se Abd-ul-Razzaq ne bayan kiya , in se Mamar ne , in se Humam ne aur unhon ne Abu Hurairah razi Allahu anhu se suna ke Rasool Allah salla Allahu alaihi wasallam ne farmaya ”koi shakhs is tarah dua na kare ke Ae Allah! agar tu chahe to meri maghfirat kar , agar tu chahe to mujh par raham kar , agar tu chahe to mujhe rozi de , balkay pukhtagi ke saath sawal karna chahiye kyunke Allahjo chahta hai karta hai koi is par jabr karne wala nahi .“