Allah Ta'ala ne Surah Nisa mein farmaya «fankihoo ma taaba lakum minan-nisa'i» ke ”tum ko jo auratein pasand aayein un se nikah kar lo .“

Hum se Saeed bin Abi Maryam ne byaan kiya , kaha hum ko Muhammad bin Jafar ne khabar di , kaha hum ko Humayd bin Abi Humayd Taweel ne khabar di , unhon ne Anas bin Malik se suna , unhon ne byaan kiya ke teen hazrat (Ali bin Abi Talib , Abdullah bin Amr bin al-Aas aur Usman bin Mazoon razi Allahu anhum) Nabi Karim salla Allahu alaihi wasallam ki azwaj e mutahharat ke gharon ki taraf Aap ki ibadat ke mutalliq poochne aaye , jab unhein Nabi Karim salla Allahu alaihi wasallam ka amal bataya gaya to jaise unhon ne usay kam samjha aur kaha ke hamara Nabi Karim salla Allahu alaihi wasallam se kiya muqabla! Aap ki to tamam agli pichhli laghzishein maaf kar di gayi hain . In mein se ek ne kaha ke aaj se main hamesha raat bhar namaz parha karoon ga . Doosre ne kaha ke main hamesha roze se rahoon ga aur kabhi nagha nahi hone doon ga . Teesre ne kaha ke main auraton se judayi ikhtiyar kar loon ga aur kabhi nikah nahi karoon ga . Phir Nabi Karim salla Allahu alaihi wasallam tashreef laye aur in se poocha kiya tum ne hi yeh baatein kahi hain ? Sun lo! Allah Ta'ala ki qasam! Allah Rabb-ul-Aalameen se main tum sab se zyada darne wala hoon . Main tum mein sab se zyada parhezgar hoon lekin main agar roze rakhta hoon to iftaar bhi karta hoon . Namaz parhta hoon (raat mein) aur sota bhi hoon aur main auraton se nikah karta hoon . «faman raghiba an sunnati falaysa minni» mere tariqe se jis ne be-raghbati ki woh mujh mein se nahi hai .

Hum se Muhammad bin Musanna ne byaan kiya , kaha hum se Yahya ne byaan kiya , kaha hum se Ismail ne byaan kiya , un se Qays ne byaan kiya aur un se Ibn Masood razi Allahu anhu ne byaan kiya ke hum Nabi Karim salla Allahu alaihi wasallam ke saath jihad kiya karte thay aur hamare saath biwiyaan nahi thien . Is liye hum ne kaha ke ya Rasool Allah! Hum apne aap ko khasi kyun na kar lein ? Aap salla Allahu alaihi wasallam ne hamain is se mana farmaya .