Hum se Abu Al-Yaman ne bayan kiya, kaha hum ko Shuaib ne khabar di, kaha hum se Abu Az-Zinad ne bayan kiya, un se Abdur Rahman ne bayan kiya, unhon ne Abu Hurairah (Radi Allahu Anhu) se suna aur unhon ne Rasul Allah (Sallallahu Alaihi Wasallam) se suna Aap (Sallallahu Alaihi Wasallam) ne farmaya ke ek aurat apne bacche ko doodh pila rahi thi ke ek sawar idhar se guzra, wo is waqt bhi bacche ko doodh pila rahi thi (sawar ki shan dekh kar) aurat ne dua ki: Ae Allah! Mere bacche ko is waqt tak mout na dena jab tak ke is sawar jaisa na ho jaye. Isi waqt (ba-qudrat-e-Ilahi) baccha bol para. Ae Allah! Mujhe is jaisa na karna. Aur phir wo doodh peene laga. Is ke baad ek aurat ko idhar se le jaya gaya, ise le jane wale ise ghasit rahe thay aur is ka mazaq ura rahe thay. Maan ne dua ki: Ae Allah! Mere bacche ko is aurat jaisa na karna, lekin bacche ne kaha ke ae Allah! Mujhe isi jaisa bana dena (phir to maan ne poocha, arey ye kya maamla hai? Is bacche ne bataya ke sawar to kafir-o-zalim tha aur aurat ke mutaliq log kehte thay ke tu zina karati hai to wo jawab deti «hasbi-Allahu» (Allah mere liye kafi hai, wo meri pak-damni janta hai) log kehte ke tu chori karti hai to wo jawab deti «hasbi-Allahu» (Allah mere liye kafi hai aur wo meri pak-damni janta hai)
.

Hum se Saeed Bin Talid ne bayan kiya, kaha hum se Ibn Wahb ne bayan kiya, kaha ke mujhe Jarir Bin Hazim ne khabar di, unhein Ayub ne aur unhein Muhammad Bin Sireen ne aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne bayan farmaya "Ek kutta ek kunvein ke charon taraf chakkar kaat raha tha jaise pyas ki shiddat se is ki jaan nikal jane wali ho ke Bani Israel ki ek zaniya aurat ne ise dekh liya. Is aurat ne apna mouza utar kar kutte ko pani pilaya aur is ki maghfirat isi amal ki wajah se ho gayi
."

Hum se Abdullah Bin Maslamah ne bayan kiya, kaha hum se Imam Malik ne bayan kiya, un se Ibn Shihab ne, un se Humaid Bin Abdur Rahman ne aur unhon ne Muawiyah Bin Abi Sufyan (Radi Allahu Anhuma) se suna ek saal jab wo Hajj ke liye gaye hue thay to minbar-e-Nabwi par kharay ho kar unhon ne peshani ke balon ka ek kuccha liya jo un ke chokidar ke hath mein tha aur farmaya: Ae Madinah walon! Tumhare ulama kidhar gaye mein ne Nabi Kareem (Sallallahu Alaihi Wasallam) se suna hai. Aap (Sallallahu Alaihi Wasallam) ne is tarah (baal jorne ki) mamanat farmayi thi aur farmaya tha ke Bani Israel par barbadi is waqt aayi jab (shariat ke khilaf) un ki auraton ne is tarah baal sanwarne shuru kar diye thay
.

Hum se Abdul Aziz Bin Abdullah ne bayan kiya, unhon ne kaha hum se Ibrahim Bin Saad ne bayan kiya, un se un ke walid ne bayan kiya, un se Abu Salamah ne bayan kiya, aur un se Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "Guzashta ummaton mein muhaddis log hua karte thay aur agar meri ummat mein koi aisa hai to wo Umar Bin Khattab hain
."

Hum se Muhammad Bin Bashar ne bayan kiya kaha hum se Muhammad Bin Abi Adi ne bayan kiya un se Shuba ne un se Qatada ne un se Abu Siddiq Naji Bakr Bin Qais ne aur un se Abu Saeed Khudri (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "Bani Israel mein ek shakhs tha jis ne ninnanway khoon-e-nahaq kiye thay phir wo nadim ho kar) masla poochne nikla. Wo ek darvesh ke pas aaya aur is se poocha kya is gunah se toubah qabool hone ki koi surat hai? Darvesh ne jawab diya ke nahi. Ye sun kar is ne is darvesh ko bhi qatl kar diya (aur sou khoon poore kar diye) phir wo (doosron se) poochne laga. Aakhir is ko ek darvesh ne bataya ke falan basti mein chala ja) (wo aadhe raste bhi nahi pahuncha tha ke) is ki mout waqi ho gayi. Marte marte is ne apna seena is basti ki taraf jhuka diya. Aakhir rahmat ke farishton aur azab ke farishton mein ba-ham jhagray hua. (Ke kaun ise le jaye) lekin Allah Ta'ala ne is Nasrah nami basti ko (jahan wo toubah ke liye ja raha tha) hukam diya ke is ki naash se qareeb ho jaye aur doosri basti ko (jahan se wo nikla tha) hukam diya ke is ki naash se door ho ja. Phir Allah Ta'ala ne farishton se farmaya ke ab dono ka fasla dekho aur (jab napa to) is basti ko (jahan wo toubah ke liye ja raha tha) ek balisht naash se nazdeek paya is liye wo bakhsh diya gaya
.

Hum se Ali Bin Abdullah Madini ne bayan kiya, kaha hum se Sufyan Bin Uyainah ne bayan kiya, kaha hum se Abu Az-Zinad ne bayan kiya, un se Aaraj ne un se Abu Salamah ne aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne subah ki namaz parhi phir logon ki taraf tawajjo hue aur farmaya "Ek shakhs (Bani Israel ka) apni gaye hanke liye ja raha tha ke wo is par sawar ho gaya aur phir ise mara. Is gaye ne (ba-qudrat-e-Ilahi) kaha ke hum janwar sawari ke liye nahi paida kiye gaye. Hamari paidaish to kheti ke liye hui hai." Logon ne kaha SubhanAllah! Gaye baat karti hai. Phir Aap (Sallallahu Alaihi Wasallam) ne farmaya ke mein is baat par iman lata hoon aur Abu Bakr aur Umar bhi. Halanke ye dono wahan maujood bhi nahi thay. Isi tarah ek shakhs apni bakriyan chara raha tha ke ek bheriya aaya aur rewar mein se ek bakri utha kar le jane laga. Rewar wala daura aur is ne bakri ko bheriye se chura liya. Is par bheriya (ba-qudrat-e-Ilahi) bola, aaj to tum ne mujh se ise chura liya lekin darindon wale din mein (qurb-e-qiyamat) ise kaun bachaye ga jis din mere siwa aur koi is ka charwaha na hoga? Logon ne kaha, SubhanAllah! Bheriya baatein karta hai. Aap (Sallallahu Alaihi Wasallam) ne farmaya ke mein to is baat par iman laya aur Abu Bakr-o-Umar bhi halanke wo dono is waqt wahan maujood na thay. Imam Bukhari (Rahimahullah) ne kaha aur hum se Ali Bin Abdullah Madini ne kaha, hum se Sufyan Bin Uyainah ne bayan kiya, unhon ne Misar se, unhon ne Saad Bin Ibrahim se, unhon ne Abu Salamah se riwayat kiya aur unhon ne Abu Hurairah (Radi Allahu Anhu) se aur unhon ne Rasul Allah (Sallallahu Alaihi Wasallam) se yehi hadees bayan ki
.

Hum se Ishaq Bin Nasr ne bayan kiya, unhon ne kaha hum ko Abdur Razzaq ne khabar di, unhein Maamar ne, unhein Hammam ne aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya "Ek shakhs ne doosre shakhs se makan khareeda aur makan ke khareedar ko is makan mein ek ghara mila jis mein sona tha jis se wo makan is ne khareeda tha is se is ne kaha bhai ghara le ja. Kyunke mein ne tum se ghar khareeda hai sona nahi khareeda tha. Lekin pehle malik ne kaha ke mein ne ghar ko in tamam cheezon samait tumhein bech diya tha jo is ke andar maujood hon. Ye dono ek teesre shakhs ke pas apna muqaddama le gaye. Faisla karne wale ne un se poocha kya tumhari koi aulad hai? Is par ek ne kaha ke mere ek larka hai aur doosre ne kaha ke meri ek larki hai. Faisla karne wale ne un se kaha ke larke ka larki se nikah kar do aur sona unhein par kharch kar do aur khairat bhi kar do
."

Hum se Abdul Aziz Bin Abdullah Uwaisi ne bayan kiya, unhon ne kaha mujh se Imam Malik ne bayan kiya, un se Muhammad Bin Munkadir aur Umar Bin Ubaidullah ke moula Abu Al-Nazr ne, un se Aamir Bin Saad Bin Abi Waqqas ne bayan kiya aur unhon ne (Aamir ne) apne walid (Saad Bin Abi Waqqas (Radi Allahu Anhu)) ko Usamah Bin Zaid (Radi Allahu Anhuma) se ye poochte suna tha ke Taaoon ke baare mein aap ne Nabi Kareem (Sallallahu Alaihi Wasallam) se kya suna hai? Unhon ne kaha ke Rasul Allah (Sallallahu Alaihi Wasallam) ne farmaya ke Taaoon ek azab hai jo pehle Bani Israel ke ek giroh par bheja gaya tha ya Aap (Sallallahu Alaihi Wasallam) ne ye farmaya ke ek guzashta ummat par bheja gaya tha. Is liye jab kisi jagah ke mutaliq tum suno (ke wahan Taaoon phela hua hai) to wahan na jao. Lekin agar kisi aisi jagah ye waba phel jaye jahan tum pehle se maujood ho to wahan se mat niklo. Abu Al-Nazr ne kaha yani bhagne ke siwa aur koi gharz na ho to mat niklo
.

Hum se Musa Bin Ismail ne bayan kiya, unhon ne kaha hum se Dawood Bin Abi Furat ne bayan kiya, kaha hum se Abdullah Bin Buraidah ne bayan kiya, un se Yahya Bin Yamar ne aur un se Umm-ul-Momineen Aisha (Radi Allahu Anha) ne bayan kiya ke mein ne Rasul Allah (Sallallahu Alaihi Wasallam) se Taaoon ke baare mein poocha to Aap (Sallallahu Alaihi Wasallam) ne farmaya ke ye ek azab hai, Allah Ta'ala jis par chahta hai bhejta hai lekin Allah Ta'ala ne is ko mominon ke liye rahmat bana diya hai. Agar kisi shakhs ki basti mein Taaoon phel jaye aur wo sabar ke sath Allah ki rahmat se umeed lagaye hue waheen thehra rahe ke hoga wohi jo Allah Ta'ala ne qismat mein likha hai to ise shaheed ke barabar sawab mile ga
.

Hum se Qutaibah Bin Saeed ne bayan kiya, kaha hum se Laith ne bayan kiya, un se Ibn Shihab ne un se Urwah ne aur un se Aisha (Radi Allahu Anha) ne ke Makhzumiyah khatoon (Fatima Bint-e-Aswad) jis ne (Ghazwa-e-Fatah ke mauqa par) chori kar li thi, is ke maamla ne Quraish ko fikr mein daal diya. Unhon ne aapas mein mashwara kiya ke is maamla par Rasul Allah (Sallallahu Alaihi Wasallam) se guftagu kaun kare! Aakhir ye tay paya ke Usamah Bin Zaid (Radi Allahu Anhuma) Aap (Sallallahu Alaihi Wasallam) ko bahut aziz hain. In ke siwa aur koi is ki himmat nahi kar sakta. Chunancha Usamah (Radi Allahu Anhu) ne Aap (Sallallahu Alaihi Wasallam) se is baare mein kuch kaha to Aap (Sallallahu Alaihi Wasallam) ne farmaya. Ae Usamah! Kya tu Allah ki hudood mein se ek hadd ke baare mein mujh se sifarish karta hai? Phir Aap (Sallallahu Alaihi Wasallam) kharay hue aur khutba diya (jis mein) Aap (Sallallahu Alaihi Wasallam) ne farmaya. Pichli bahut si ummatein is liye halak ho gayeen ke jab un ka koi shareef aadmi chori karta to ise chor dete aur agar koi kamzor chori karta to is par hadd qaim karte aur Allah ki qasam! Agar Fatima Bint-e-Muhammad (Sallallahu Alaihi Wasallam) bhi chori kare to mein is ka bhi hath kaat daloon
.