Hum se Ishaq Bin Wahb ne bayan kiya, unhon ne kaha ke hum se Amr Bin Yunus ne bayan kiya, unhon ne kaha ke mujh se mere baap ne bayan kiya, unhon ne kaha ke mujh se Ishaq Bin Abi Talha Ansari ne bayan kiya aur un se Anas Bin Malik (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne muhaqala, mukhadara, mulamasa, munabaza aur muzabana se mana farmaya hai
.

Hum se Ismail ne bayan kiya, kaha ke hum se Imam Malik ne bayan kiya, un se Nafay ne aur un se Abdullah Bin Umar (Radi Allahu Anhuma) ne ke Rasul Allah (Sallallahu Alaihi Wasallam) ne muzabana se mana farmaya, muzabana ye ke darakht par lagi hui khajoor khushk khajoor ke badla maap kar ke bechi jaye. Isi tarah bail par lage hue angoor ko munaqqa ke badal bechna
.

Abdullah Bin Umar (Radi Allahu Anhuma) ne bayan kiya, ke mujh se Zaid Bin Thabit (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne mujhe araya ki ijazat de di thi jo andaze hi se bai ki ek soorat hai
.

Hum se Abdullah Bin Yusuf ne bayan kiya, unhon ne kaha ke hum ko Imam Malik ne khabar di, unhein Nafay ne, unhein Abdullah Bin Umar (Radi Allahu Anhuma) ne ke Rasul Allah (Sallallahu Alaihi Wasallam) ne muzabana se mana farmaya, muzabana darakht par lagi hui khajoor ko tooti hui khajoor ke badle naap kar aur darakht ke angoor ko khushk angoor ke badle mein naap kar bechne ko kehte hain
.

Hum se Abdullah Bin Yusuf ne bayan kiya, unhon ne kaha ke hum ko Imam Malik ne khabar di, unhein Daud Bin Husain ne, unhein Ibn Abi Ahmad ke ghulam Abu Sufyan ne aur unhein Abu Saeed Khudri (Radi Allahu Anhu) ne ke Rasul Allah (Sallallahu Alaihi Wasallam) ne muzabana aur muhaqala se mana farmaya, muzabana darakht par lagi khajoor, torri hui khajoor ke badle mein khareedne ko kehte hain
.

Hum se Musaddad ne bayan kiya, kaha ke hum se Muawiya ne bayan kiya, un se Shaibani ne, un se Ikrima ne aur un se Ibn Abbas (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne muhaqala aur muzabana se mana farmaya
.

Hum se Ali Bin Abdullah ne bayan kiya, kaha hum se Sufyan Bin Uyainah ne bayan kiya, kaha ke Yahya Bin Saeed ne bayan kiya ke mein ne Bashir se suna, unhon ne bayan kiya ke mein ne Sahl Bin Abi Hathma (Radi Allahu Anhu) se suna ke Rasul Allah (Sallallahu Alaihi Wasallam) ne darakht par lagi hui khajoor ko torri hui khajoor ke badle bechne se mana farmaya, albatta ariya ki Aap (Sallallahu Alaihi Wasallam) ne ijazat di ke andaza kar ke ye bai ki ja sakti hai ke ariya wale is ke badal taza khajoor khayein. Sufyan ne doosri martaba ye riwayat bayan ki, lekin Nabi Kareem (Sallallahu Alaihi Wasallam) ne ariya ki ijazat de di thi. ke andaza kar ke ye bai ki ja sakti hai, khajoor hi ke badle mein. Donon ka mafhoom ek hi hai. Sufyan ne bayan kiya ke mein ne Yahya se poocha, is waqt mein abhi kam umr tha ke Makkah ke log kehte hain ke Nabi Kareem (Sallallahu Alaihi Wasallam) ne ariya ki ijazat di hai to unhon ne poocha ke ahl-e-Makkah ko ye kis tarah maloom hua ? mein ne kaha ke wo log Jabir (Radi Allahu Anhu) se riwayat karte hain. Is par wo khamosh ho gaye. Sufyan ne kaha ke meri murad is se ye thi ke Jabir (Radi Allahu Anhu) Madinah wale hain. Sufyan se poocha gaya ke kya un ki hadees mein ye maman'at nahi hai ke phalon ko bechne se aap (Sallallahu Alaihi Wasallam) ne mana farmaya jab tak un ki pukhtagi na khul jaye unhon ne kaha ke nahi
.

Hum se Qutaiba ne bayan kiya, kaha ke hum se Liath ne bayan kiya, un se Nafay ne, un se Abdullah Bin Umar (Radi Allahu Anhuma) ne bayan kiya, ke Nabi Kareem (Sallallahu Alaihi Wasallam) ne muzabana se mana farmaya. Yaani bagh ke phalon ko agar wo khajoor hain to torri hui khajoor ke badle mein naap kar becha jaye. Aur agar angoor hain to usay khushk angoor ke badle naap kar becha jaye aur agar wo kheti hai to naap kar ghalla ke badle mein becha jaye. Aap (Sallallahu Alaihi Wasallam) ne in tamam qismon ke lein dein se mana farmaya hai
.

Aur Rafi Bin Khadij (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne zameeno ko kiraya par dene se mana farmaya tha aur Ubaidullah ne Nafi se bayan kiya, aur un se Ibn Umar (Radi Allahu Anhuma) ne ke (Khaibar ke Yahoodiyon ke sath wahan ki zameen ka muamla barabar chalta raha) yahan tak ke Umar (Radi Allahu Anhu) ne unhein jala watan kar diya
.

Hum se Sadaqah Bin Fadl ne bayan kiya, kaha ke hum ko Sufyan Bin Uyainah ne khabar di, unhein Yahya Bin Saeed Ansari ne, unhon ne Hanzalah Zurqi se suna ke Rafi Bin Khadij (Radi Allahu Anhu) ne kaha ke humare paas Madinah ke doosre logon ke muqable mein zameen ziyada thi. Humare yahan tareeqa ye tha ke jab zameen basurat-e-jins kiraya par dete to ye shart laga dete ke is hissa ki paidawar to meri rahegi aur is hissa ki tumhari rahegi. Phir kabhi aisa hota ke ek hissa ki paidawar khoob hoti aur doosre ki na hoti. Is liye Nabi Kareem (Sallallahu Alaihi Wasallam) ne logon ko is tarah muamla karne se mana farma diya
.

Phir Rafi Bin Khadij (Radi Allahu Anhu) ke waste se bayan kiya gaya ke Nabi Kareem (Sallallahu Alaihi Wasallam) ne kheton ko kiraya par dene se mana kiya tha. (Ye sun kar) Ibn Umar (Radi Allahu Anhuma) Rafi Bin Khadij (Radi Allahu Anhu) ke paas gaye. Mein bhi un ke sath tha. Ibn Umar (Radi Allahu Anhuma) ne un se poocha to unhon ne farmaya ke Nabi Kareem (Sallallahu Alaihi Wasallam) ne kheton ko kiraya par dene se mana farmaya. Is par Ibn Umar (Radi Allahu Anhuma) ne kaha ke aap ko maloom hai Nabi Kareem (Sallallahu Alaihi Wasallam) ke ahad mein hum apne kheton ko is paidawar ke badal jo naliyon par ho aur thori ghas ke badal diya karte thay
.

Hum se Yahya Bin Bukair ne bayan kiya, unhon ne kaha ke hum se Laith Bin Saad ne bayan kiya, un se Aqeel ne bayan kiya, un se Ibn Shihab ne, unhein Salim ne khabar di ke Abdullah Bin Umar (Radi Allahu Anhuma) ne bayan kiya ke Rasul Allah (Sallallahu Alaihi Wasallam) ke zamana mein mujhe maloom tha ke zameen ko batayi par diya jata tha. Phir unhein dar hua ke mumkin hai ke Nabi Kareem (Sallallahu Alaihi Wasallam) ne is silsile mein koi nayi hidayat farmayi ho jis ka ilm unhein na hua ho. Chunanche unhon ne (ihtiyatan) zameen ko batayi par dena chhor diya
.

Hum se Amr Bin Khalid ne bayan kiya, kaha ke hum se Laith Bin Saad ne bayan kiya, un se Rabia Bin Abi Abdur Rahman ne bayan kiya, un se Hanzalah Bin Qais ne bayan kiya, un se Rafi Bin Khadij (Radi Allahu Anhu) ne bayan kiya ke mere chacha (Zuhair aur Muhair Radi Allahu Anhuma) ne bayan kiya ke wo log Nabi Kareem (Sallallahu Alaihi Wasallam) ke zamane mein zameen ko batayi par nehar (ke qareeb ki paidawar) ki shart par diya karte. Ya koi bhi aisa khitta hota jise malik-e-zameen (apne liye) chhaant leta. Is liye Nabi Kareem (Sallallahu Alaihi Wasallam) ne is se mana farma diya. Hanzalah ne kaha ke is par mein ne Rafi Bin Khadij (Radi Allahu Anhu) se poocha, agar dirham-o-dinar ke badle ye muamla kiya jaye to kya hukum hai ? Unhon ne farmaya ke agar dinar-o-dirham ke badle mein ho to is mein koi haraj nahi. Aur Laith ne kaha ke Nabi Kareem (Sallallahu Alaihi Wasallam) ne jis tarah ki batayi se mana farmaya tha, wo aisi surat hai ke halal-o-haram ki tameez rakhne wala koi bhi shakhs ise jayez nahi qarar day sakta. Kyunke is mein khula dhoka hai
.

Hum se Abdullah Bin Muhammad ne bayan kiya, kaha ke hum se Ibn Uyainah ne bayan kiya, un se Ibn Jurayj ne, un se Ata ne, unhon ne Jabir Bin Abdullah (Radi Allahu Anhuma) se suna ke Nabi Kareem (Sallallahu Alaihi Wasallam) ne mukhabarah, muhaqalah, aur muzabanah se mana farmaya tha. Isi tarah phal ko pukhta hone se pehle bechne se mana farmaya tha, aur ye ke mewa ya ghalla jo darakht par laga ho, dinar-o-dirham hi ke badle becha jaye. Albatta araya ki ijazat di hai
.

Hum se Zakariya Bin Yahya ne bayan kiya, kaha ke hum ko Abu Usama ne khabar di, kaha ke mujhe Waleed Bin Kaseer ne khabar di, kaha ke mujhe Bani Harisah ke ghulam Bashir Bin Yasar ne khabar di, un se Rafi Bin Khadij (Radi Allahu Anhu) aur Sahl Bin Abi Hasmah (Radi Allahu Anhu) ne bayan kiya, ke Rasul Allah (Sallallahu Alaihi Wasallam) ne bai-muzabanah yani darakht par lage hue khajoor ko khushk ki hui khajoor ke badle bechne se mana farmaya, Ariya karne walon ke ilawa ke unhein Aap (Sallallahu Alaihi Wasallam) ne ijazat day di thi. Abu Abdullah (Imam Bukhari Rahimahullah) ne kaha ke Ibn Ishaq ne kaha ke mujh se Bashir ne isi tarah ye hadees bayan ki thi. (Ye taliq hai kyunke Imam Bukhari (Rahimahullah) ne Ibn Ishaq ko nahi paya. Hafiz ne kaha ke mujh ko ye taliq mausalan nahi mili.)
.

Hum se Malik Bin Ismail ne bayan kiya, kaha hum se Ibn Uyainah ne bayan kiya, kaha hum se Yahya Bin Saeed ne bayan kiya, kaha ke mein ne Hanzalah Zurqi se suna, unhon ne kaha ke mein ne Rafay Bin Khadij (Radi Allahu Anhu) se suna, aap bayan karte thay ke hum aksar Ansar kashtkari kiya karte thay aur hum zameen batai par dete thay. Aksar aisa hota ke kisi khet ke ek tukre mein paidawar hoti aur doosre mein na hoti, is liye humein is se mana kar diya gaya. Lekin chandi (rupai waghairah) ke lagan se mana nahi kiya gaya
.

Hum se Abdullah Bin Muhammad Bin Asma ne bayan kiya, kaha hum se Juwayriyah Bin Asma ne bayan kiya, un se Imam Malik Rahimahullah, un se Zuhri, unhein Salim Bin Abdullah ne khabar di, bayan kiya ke Rafi Bin Khadeej Radi Allahu Anhu ne Abdullah Bin Umar Radi Allahu Anhuma ko khabar di ke in ke do chachaon (Zuhair aur Mazhar Rafi Bin Adi Bin Zaid Ansari ke beton) jinhon ne Badr ki larai mein shirkat ki thi, ne unhein khabar di ke Rasul Allah Sallallahu Alaihi Wasallam ne zameen ko kiraya par dene se mana kiya tha. Mein ne Salim se kaha lekin aap to kiraya par dete hain. Unhon ne kaha ke haan, Rafi Radi Allahu Anhu ne apne upar zyada-ti ki thi
.