Hum se Abu-al-Walid ne bayan kiya, kaha ke hum se Shuba ne bayan kiya, un se Abdur Rahman Bin Asbahani ne, un se Abdullah Bin Maqal ne bayan kiya ke mein Kaab Bin Ujrah (Radi Allahu Anhu) ke paas betha hua tha, mein ne un se fidyah ke bare mein poocha to unhon ne kaha ke (Quran Shareef ki ayat) agarche khas mere bare mein nazil hui thi lekin is ka hukm tum sab ke liye hai. Hua ye ke mujhe Rasul Allah (Sallallahu Alaihi Wasallam) ki khidmat mein laya gaya to jooein sar se mere chehre par gir rahi theen. Aap (Sallallahu Alaihi Wasallam) ne (ye dekh kar farmaya) mein nahi samajhta tha ke tumhein itni zyada takleef ho gi ya (Aap ne yun farmaya ke) mein nahi samajhta tha ke juhd (mashaqqat) tumhein is had tak ho gi, kya tujh mein bakri (bator fidyah) dene ki taqat hai ? Mein ne kaha ke nahi, Aap (Sallallahu Alaihi Wasallam) ne farmaya ke phir teen din ke roze rakh ya chheh miskeenon ko khana khila, har miskeen ko aadha saa khilana
.

Hum se Mahmood ne bayan kiya, kaha hum ko Abdur Razzaq ne khabar di, kaha ke hum ko Mamar ne khabar di, unhein Zuhri ne, unhein Urwah ne aur unhein Miswar (Radi Allahu Anhu) ne ke Rasul Allah (Sallallahu Alaihi Wasallam) ne (sulh-e-Hudaibiyah ke mauqe par) qurbani sar mundwane se pehle ki thi. Aur Aap (Sallallahu Alaihi Wasallam) ne ashab ko bhi isi ka hukm diya tha
.

Hum se Abdullah Bin Yusuf ne bayan kiya, unhon ne kaha ke hum ko Imam Malik ne khabar di, unhein Humaid Bin Qais ne, unhein Mujahid ne, unhein Abdur Rahman Bin Abi Laila ne aur unhein Kaab Bin Ujrah (Radi Allahu Anhu) ne ke Rasul Allah (Sallallahu Alaihi Wasallam) ne un se farmaya, ghaliban joonon se tum ko takleef hai, unhon ne kaha ke ji han ya Rasul Allah! Aap (Sallallahu Alaihi Wasallam) ne farmaya ke phir apna sar munda le aur teen din ke roze rakh le ya chheh miskeenon ko khana khila de ya ek bakri zabah kar
.

Hum se Abu Nuaym ne bayan kiya, unhon ne kaha ke mujh se Mujahid ne bayan kiya, unhon ne kaha ke mein ne Abdur Rahman Bin Abi Laila se suna, un se Kaab Bin Ujrah (Radi Allahu Anhu) ne bayan kiya ke Rasul Allah (Sallallahu Alaihi Wasallam) Hudaibiyah mein mere paas aa kar kharay hue to jooein mere sar se barabar gir rahi theen. Aap (Sallallahu Alaihi Wasallam) ne farmaya ye jooein to tumhare liye takleef deh hain. Mein ne kaha ji han, Aap (Sallallahu Alaihi Wasallam) ne farmaya phir sar munda le ya Aap (Sallallahu Alaihi Wasallam) ne sirf ye lafz farmaya ke munda le. Unhon ne bayan kiya ke ye ayat mere hi bare mein nazil hui thi ke ”agar tum mein koi mareez ho ya is ke sar mein koi takleef ho“ aakhir ayat tak, phir Nabi Kareem (Sallallahu Alaihi Wasallam) ne farmaya teen din ke roze rakh le ya ek faraq ghalla se chheh miskeenon ko khana de ya jo maysar ho is ki qurbani kar de
.

Aur Muhammad Bin Yusuf se riwayat hai ke hum ko Warqa ne bayan kiya, un se Ibn Abi Najeeh ne bayan kiya, un se Mujahid ne bayan kiya, unhein Abdur Rahman Bin Abi Laila ne khabar di aur unhein Kaab Bin Ujrah (Radi Allahu Anhu) ne ke Rasul Allah (Sallallahu Alaihi Wasallam) ne unhein dekha to jooein un ke chehra par gir rahi thi, phir yehi hadees bayan ki
.

Hum se Hasan Bin Khalf ne bayan kiya ‘ kaha ke mujh se Ishaq Bin Yusuf ne bayan kiya ‘ in se Abu Bishr Warqa Bin Umar ne ‘ in se Ibn Abi Najeeh ne ‘ in se Mujahid ne bayan kiya ‘ in se Abdur Rahman Bin Abi Laila ne bayan kiya aur in se Kaab Bin Ujrah Radi Allahu Anhu ne ke Rasul Allah Sallallahu Alaihi Wasallam ne unhein dekha ke jooein in ke chehre par gir rahi hain to Aap Sallallahu Alaihi Wasallam ne daryaft farmaya ke kya is se tumhein takleef hoti hai? Wo bole ke ji haan ‘ is par Aap Sallallahu Alaihi Wasallam ne unhein sar mundwane ka hukm diya. Aap is waqt Hudaibiya mein thay (umra ke liye ihram baandhe hue) aur in ko ye maloom nahi hua tha ke wo umra se roke jayein ge. Hudaibiya hi mein in ko ihram khol dena pare ga. Balkey in ki to ye aarzu thi ke Makka mein kisi tarah dakhil hua jaye. Phir Allah Ta'ala ne fidiya ka hukm nazil farmaya (yani ihram ki halat mein) sar mundwane waghaira par ‘ is waqt Aap Sallallahu Alaihi Wasallam ne Kaab ko hukm diya ke ek farq anaj che miskeenon ko khila dein ya ek bakri ki qurbani karein ya teen den roze rakhein
.

Hum se Sulaiman Bin Harb ne bayan kiya ‘ kaha hum se Hammad Bin Zaid ne bayan kiya ‘ in se Ayub Sakhtiyani ne ‘ in se Mujahid ne ‘ in se Ibn Abi Laila ne ‘ in se Kaab Bin Ujrah Radi Allahu Anhu ne bayan kiya ke wo umra-e-Hudaibiya ke mauqe par Nabi Kareem Sallallahu Alaihi Wasallam ki khidmat mein hazir hue to jooein in ke chehre par gir rahi thin. Nabi Kareem Sallallahu Alaihi Wasallam ne daryaft farmaya ke ye jooein jo tumhare sar se gir rahi hain ‘ takleef de rahi hain? Unhon ne arz kiya: Ji haan! Nabi Kareem Sallallahu Alaihi Wasallam ne farmaya ke phir sar mundwa lo aur teen den roza rakh lo ya che miskeenon ka khana khila do ya phir koi qurbani kar dalo. (Sar mundwane ka fidiya hoga) Ayub Sakhtiyani ne bayan kiya ke mujhe maloom nahi ke in teeno umoor mein se pehle Nabi Kareem Sallallahu Alaihi Wasallam ne kaun si baat irshad farmai thi
.

Mujh se Abu Abdullah Muhammad Bin Hisham ne bayan kiya ‘ kaha hum se Hushaim ne bayan kiya in se Abu Bisr ne ‘ in se Mujahid ne ‘ in se Abdur Rahman Bin Abi Laila ne aur in se Kaab Bin Ujrah Radi Allahu Anhu ne bayan kiya ke sulh-e-Hudaibiya ke mauqe par hum Rasul Allah Sallallahu Alaihi Wasallam ke sath thay aur ihram baandhe hue thay. Udhar mushrikeen humein Bait-Allah tak jane nahi dena chahte thay. Unhon ne bayan kiya ke mere sar par baal bare bare thay jin se jooein mere chehre par girne lagin. Nabi Kareem Sallallahu Alaihi Wasallam ne mujhe dekh kar daryaft farmaya ke kya ye jooein takleef de rahi hain? Mein ne kaha: Ji haan. Unhon ne bayan kiya ke phir ye ayat nazil hui «faman kana minkum marizan au bihi azan min rasihi fafidyatun min siyamin au sadaqatin au nusukin» ”Pas agar tum mein koi mareez ho ya is ke sar mein koi takleef dene wali cheez ho to ise (baal mundwa lene chahiyein aur) teen den ke roze ya sadqa ya qurbani ka fidiya dena chahiye.“
.

Hum se Adam bin Abi Iyas ne byaan kiya , kaha hum se Shubah ne , un se Abdur Rahman bin Asbahani ne , kaha main ne Abdullah bin Maqal se suna , unhon ne byaan kiya ke main Kabb bin Ujrah razi Allahu anhu ki khidmat mein is masjid mein hazir hua , un ki murad Kufa ki masjid se thi aur un se roze ke fidye ke mutalliq poocha . Unhon ne byaan kiya ke mujhe ihram mein Rasool Allah salla Allahu alaihi wasallam ki khidmat mein log le gaye aur juein (sar se) mere chehre par gir rahi thien . Aap salla Allahu alaihi wasallam ne farmaya ke mera khayal yeh nahi tha ke tum is had tak takleef mein mubtala ho gaye ho tum koi bakri nahi muhayya kar sakte ? Main ne arz kiya ke nahi . Farmaya , phir teen din ke roze rakh lo ya chhay miskeenon ko khana khila do , har miskeen ko aadha sa khana khilana aur apna sar mundwa lo . Kabb razi Allahu anhu ne kaha to yeh aayat khaas mere baare mein nazil hui thi aur is ka hukm tum sab ke liye aam hai .

Hum se Qubaysah ne bayan kiya, kaha hum se Sufyan ne bayan kiya, in se Ibn Abi Najih aur Ayub ne, in se Mujahid ne, in se Abdur Rahman bin Abi Layla ne aur in se Kabb bin Ujrah razi Allahu anhu ne ke Nabi Karim salla Allahu alaihi wasallam mere qareeb se guzre aur main handiya ke neeche aag sulga raha thu. Nabi Karim salla Allahu alaihi wasallam ne farmaya kiya tumhare sar ki jooein tumhein takleef pahunchati hain. Main ne arz kiya: ji haan! Phir Aap salla Allahu alaihi wasallam ne hajjam bulwaya aur us ne mera sar moond diya is ke baad Nabi Karim salla Allahu alaihi wasallam ne mujhe fdiya ada kar dene ka hukm farmaya.

Hum se Musaddad ne bayan kiya, kaha hum se Hammad bin Zayd ne bayan kiya, in se Ayub Sakhtiyani ne, kaha ke main ne Mujahid se suna, in se Abdur Rahman bin Abi Layla ne aur in se Kabb bin Ujrah razi Allahu anhu ne bayan kiya ke Sulah Hudaybiyah ke mauqa par Nabi Karim salla Allahu alaihi wasallam mere paas tashreef laaye main ek haandi ke neeche aag jala raha tha aur jooein mere sar se gir rahi thi (aur main ihram baandhe huay tha) Nabi Karim salla Allahu alaihi wasallam ne daryaft farmaya ke sar ki yeh jooein tumhein takleef pahunchati hain? Main ne arz kiya ke ji haan. Farmaya ke phir sar mundwa le aur (kaffara ke taur par) teen din ke roze rakh ya chhay miskeenon ko khana khila ya ek qurbani kar de. Ayub ne kaha ke mujhe yaad nahi ke (in teen cheezon mein se) kis ka zikr sab se pehle kiya tha.

Hum se Ahmad bin Yunus ne bayan kiya, kaha hum se Abu Shihab Abdullah bin Nafi ne bayan kiya, in se Ibn Aun ne, in se Mujahid ne, in se Abd-ul-Rahman bin Abi Layla ne, in se Kabb bin Ujrah razi Allahu anhu ne bayan kiya ke main Nabi Karim salla Allahu alaihi wasallam ki khidmat mein hazir hua to Nabi Karim salla Allahu alaihi wasallam ne farmaya ke qareeb ho ja, main qareeb hua to Aap salla Allahu alaihi wasallam ne poochha kiya tumhare sar ke kapre takleef de rahe hain? Main ne arz kiya, ji haan, Nabi Karim salla Allahu alaihi wasallam ne farmaya ke phir roze sadqa ya qurbani ka fidya de-de. Aur mujhe Ibn Aun ne khabar di, in se Ayub ne bayan kiya ke roze teen din ke hon ge aur qurbani ek bakri ki aur (khane ke liye) chhah miskeen hon ge.