Hum se Ishaq ne bayan kiya, kaha hum se Rooh ne bayan kiya, un se Shibl Bin Ibad ne bayan kiya, un se Ibn Abi Najeeh ne bayan kiya, un se Mujahid ne bayan kiya ke mujh se Abdur Rahman Bin Abi Laila ne bayan kiya aur un se Kaab Bin Ujrah (Radi Allahu Anhu) ne ke Rasul Allah (Sallallahu Alaihi Wasallam) ne unhein dekha to jooein un ke chehre par gir rahi theen, Aap (Sallallahu Alaihi Wasallam) ne poocha kya in joonon se tumhein takleef hai ? Unhon ne kaha ke ji han, Aap (Sallallahu Alaihi Wasallam) ne unhein hukm diya ke apna sar munda lein. Wo is waqt Hudaibiyah mein thay. (Sulh-e-Hudaibiyah ke saal) aur kisi ko ye maloom nahi tha ke wo Hudaibiyah hi mein reh jayein ge balkay sab ki khwahish ye thi ke Makkah mein dakhil hon. Phir Allah Ta'ala ne fidyah ka hukm nazil farmaya aur Rasul Allah (Sallallahu Alaihi Wasallam) ne hukm diya ke chheh miskeenon ko ek faraq (yani teen saa ghalla) taqseem kar diya jaye ya ek bakri ki qurbani kare ya teen din ke roze rakhe
.

Aur Muhammad Bin Yusuf se riwayat hai ke hum ko Warqa ne bayan kiya, un se Ibn Abi Najeeh ne bayan kiya, un se Mujahid ne bayan kiya, unhein Abdur Rahman Bin Abi Laila ne khabar di aur unhein Kaab Bin Ujrah (Radi Allahu Anhu) ne ke Rasul Allah (Sallallahu Alaihi Wasallam) ne unhein dekha to jooein un ke chehra par gir rahi thi, phir yehi hadees bayan ki
.