Hum se Muhammad bin Abdullah ne byaan kiya . Kaha ke mujh se mere walid Abdullah bin Musanna ne byaan kiya . Kaha ke mujh se Sumamah bin Abdullah ne byaan kiya . Un se Anas razi Allahu anhu ne ke Abu Bakr Siddiq razi Allahu anhu ne unhein (apne daur-e-khilafat mein farz zakat se mutalliq hidayat dete hue) Allah aur Rasool ke hukm ke mutabiq yeh farmaan likha ke jis ka sadqa ”bint-e-makhad“ tak puhanch gaya ho aur us ke paas ”bint-e-makhad“ nahi balke ”bint-e-laboon“ hai . To us se wahi le liya jaye ga aur us ke badla mein sadqa wasool karne wala bees dirham ya do bakriyan zaid dede ga aur agar us ke paas ”bint-e-makhad“ nahi hai balke ”ibn-e-laboon“ hai to yeh ”ibn-e-laboon“ hi le liya jaye ga aur is soorat mein kuch nahi diya jaye ga ‘ woh mada ya nar oont jo teesre saal mein laga ho .

Hum se Ishaq bin Yazid ne hadees byaan ki ‘ unhon ne kaha ke humein Shuayb bin Ishaq ne khabar di ‘ unhon ne kaha ke humein Imam Awzai ne khabar di ‘ unhon ne kaha ke mujhe Yahya bin Abi Kaseer ne khabar di ke Amru bin Yahya bin Amarah ne unhein khabar di apne walid Yahya bin Amarah bin Abul Hasan se aur unhon ne Abu Saeed Khudri razi Allahu anhu se unhon ne byaan kiya ke Rasool Allah salla Allahu alaihi wasallam ne farmaya paanch oqiyah se kam chandi mein zakat nahi hai aur paanch oonton se kam mein zakat nahi hai aur paanch wasaq se kam (ghalla) mein zakat nahi hai .

Hum se Abdullah bin Yusuf Tanisi ne byaan kiya ‘ unhon ne kaha ke humein Imam Malik ne khabar di ‘ unhein Amru bin Yahya Mazni ne ‘ unhein un ke baap Yahya ne . Unhon ne kaha ke maine Abu Saeed Khudri razi Allahu anhu se suna ‘ unhon ne kaha ke Rasool Allah salla Allahu alaihi wasallam ne farmaya ke paanch oont se kam mein zakat nahi aur paanch oqiyah se kam (chandi) mein zakat nahi . Isi tarah paanch wasaq se kam (ghalla) mein zakat nahi .

Hum se Muhammad bin Abdullah ne byaan kiya ‘ kaha ke mujh se mere baap ne byaan kiya ‘ kaha ke mujh se Sumamah ne byaan kiya aur un se Anas razi Allahu anhu ne ke Abu Bakr razi Allahu anhu ne unhein farz zakat mein wahi baat likhi thi jo Rasool Allah salla Allahu alaihi wasallam ne muqarrar farmayi thi is mein yeh bhi likhwaya tha ke jab do shareek hon to woh apna hisab barabar kar lein .

Hum se Muhammad bin Abdullah Ansari ne byaan kiya ‘ kaha ke mujh se mere baap ne byaan kiya ‘ kaha ke mujh se Sumamah ne byaan kiya aur un se Anas razi Allahu anhu ne ke Abu Bakr razi Allahu anhu ne un ke paas farz zakat ke in fareezon ke mutalliq likha tha jin ka Allah ne apne Rasool salla Allahu alaihi wasallam ko hukm diya hai . Yeh ke jis ke oonton ki zakat ”jaz'ah“ tak puhanch jaye aur woh ”jaz'ah“ us ke paas na ho balke ”hiqqah“ ho to us se zakat mein ”hiqqah“ hi le liya jaye ga lekin is ke saath do bakriyan bhi li jayeingi ‘ agar un ke dene mein usay aasani ho warna bees dirham liye jayeinge . (Taake ”hiqqah“ ki kami poori ho jaye) aur agar kisi par zakat mein ”hiqqah“ wajib ho aur ”hiqqah“ us ke paas na ho balke ”jaz'ah“ ho to us se ”jaz'ah“ hi le liya jaye ga aur zakat wasool karne wala zakat dene wale ko bees dirham ya do bakriyan de ga aur agar kisi par zakat ”hiqqah“ ke barabar wajib ho gayi aur us ke paas sirf ”bint-e-laboon“ hai to us se ”bint-e-laboon“ le li jaye gi aur zakat dene wale ko do bakriyan ya bees dirham saath mein aur dene pareinge aur agar kisi par zakat ”bint-e-laboon“ wajib ho aur us ke paas ”hiqqah“ ho to ”hiqqah“ hi us se le liya jaye ga aur is soorat mein zakat wasool karne wala bees dirham ya do bakriyan zakat dene wale ko de ga aur kisi ke paas zakat mein ”bint-e-laboon“ wajib hua aur ”bint-e-laboon“ us ke paas nahi balke ”bint-e-makhad“ hai to us se ”bint-e-makhad“ hi le liya jaye ga . Lekin zakat dene wala is ke saath bees dirham ya do bakriyan de ga .

Hum se Muhammad bin Abdullah bin Musanna Ansari ne byaan kiya ‘ unhon ne kaha ke mujh se mere walid ne byaan kiya ‘ unhon ne kaha ke mujh Sumamah bin Abdullah bin Anas ne byaan kiya ‘ un se Anas bin Malik razi Allahu anhu ne ke Abu Bakr razi Allahu anhu ne jab unhein Bahrain (ka haakim bana kar) bheja to un ko yeh parwana likh diya . Shuroo Allah ke naam se jo bara meharbaan nihayat rehm karne wala hai . Yeh zakat ka woh fareezah hai jisay Rasool Allah salla Allahu alaihi wasallam ne musalmanon ke liye farz qarar diya hai aur Rasool Allah salla Allahu alaihi wasallam ko Allah Ta'ala ne is ka hukm diya . Is liye jo shakhs musalmanon se is parwana ke mutabiq zakat maange to musalmanon ko usay de dena chahiye aur agar koi is se zyada maange to hargiz na de . Chaubees ya is se kam oonton mein har paanch oont par ek bakri deni ho gi . (Paanch se kam mein kuch nahi) lekin jab oonton ki tadaad pacchees tak puhanch jaye to pacchees se paintis tak ek ek baras ki oontni wajib ho gi jo mada hoti hai . Jab oont ki tadaad chhattis tak puhanch jaye (to chhattis se) paintalis tak do baras ki mada wajib ho gi . Jab tadaad chhiyalis tak puhanch jaye (to chhiyalis se) saath tak mein teen baras ki oontni wajib ho gi jo jufti ke qabil hoti hai . Jab tadaad iksath tak puhanch jaye (to iksath se) pachattar tak chaar baras ki mada wajib ho gi . Jab tadaad chhihattar tak puhanch jaye (to chhihattar se) nawway tak do do baras ki do oontniyan wajib hon gi . Jab tadaad ikyaanway tak puhanch jaye to (ikyaanway se) ek sau bees tak teen teen baras ki do oontniyan wajib hon gi jo jufti ke qabil hon . Phir ek sau bees se bhi tadaad aage barh jaye to har chalis par do baras ki oontni wajib ho gi aur har pachaas par ek teen baras ki . Aur agar kisi ke paas chaar oont se zyada nahi to us par zakat wajib na ho gi magar jab un ka maalik apni khushi se kuch de aur in bakriyon ki zakat jo (saal ke aksar hisse jangal ya maidan waghera mein) char kar guzarti hain agar un ki tadaad chalis tak puhanch gayi ho to (chalis se) ek sau bees tak ek bakri wajib ho gi aur jab ek sau bees se tadaad barh jaye (to ek sau bees se) se do sau tak do bakriyan wajib hon gi . Agar do sau se bhi tadaad barh jaye to (to do sau se) teen sau tak teen bakriyan wajib hon gi aur jab teen sau se bhi tadaad aage nikal jaye to ab har ek sau par ek bakri wajib ho gi . Agar kisi shakhs ki charne wali bakriyan chalis se ek bhi kam hon to un par zakat wajib nahi ho gi magar apni khushi se maalik kuch dena chahe to de sakta hai . Aur chandi mein zakat chaliswaan hissa wajib ho gi lekin agar kisi ke paas ek sau nawway (dirham) se zyada nahi hain to us par zakat wajib nahi ho gi magar khushi se kuch agar maalik dena chahiye to aur baat hai .

Hum se Muhammad bin Abdullah ne byaan kiya ‘ unhon ne kaha ke mujh se mere baap ne byaan kiya ‘ unhon ne kaha mujh se Sumamah ne byaan kiya ‘ un se Anas bin Malik razi Allahu anhu ne byaan kiya ke Abu Bakr razi Allahu anhu ne unhein Rasool Allah salla Allahu alaihi wasallam ke byaan karda ahkaam-e-zakat ke mutabiq likha ke zakat mein boorhe , aibi aur nar na liye jayein ‘ albatta agar sadqa wasool karne wala munasib samjhe to le sakta hai .

Hum Abdullah bin Yusuf Tanisi ne byaan kiya ‘ unhon ne kaha ke humein Imam Malik ne khabar di ‘ unhein Muhammad bin Abdul Rahman bin Abi Sasah Mazni ne ‘ unhein un ke baap ne aur unhein Abu Saeed Khudri razi Allahu anhu ne ke Rasool Allah salla Allahu alaihi wasallam ne farmaya ke paanch wasaq se kam khajooron mein zakat nahi aur paanch oqiyah se kam chandi mein zakat nahi . Isi tarah paanch oonton se kam mein zakat nahi hai .

Hum se Musaddad ne byaan kiya ‘ unhon ne kaha ke hum se Yahya bin Saeed Qattan ne byaan kiya ‘ unhon ne kaha ke hum se Imam Malik rahmatullah alaihi ne byaan kiya ‘ unhon ne kaha ke mujh se Muhammad bin Abdullah bin Abdul Rahman bin Abi Sasah ne byaan kiya ‘ un se in ke baap ne byaan kiya aur un se Abu Saeed Khudri razi Allahu anhu ne byaan kiya ke Nabi Karim salla Allahu alaihi wasallam ne farmaya paanch wasaq se kam mein zakat nahi hai , aur paanch mahaar oonton se kam mein zakat nahi hai . Aur chandi ke paanch oqiyah se kam mein zakat nahi hai .

Hum se Muhammad Bin Abdullah Bin Musanna ne bayan kiya, unhon ne kaha ke mujh se mere walid ne bayan ne bayan kiya, unhon ne kaha ke mujh se Sumama Bin Abdullah Bin Anas ne bayan kiya, un se Anas (Radi Allahu Anhu) ne bayan kiya ke Abu Bakr (Radi Allahu Anhu) ne un ke liye farz zakat ka bayan tehrer kiya tha jo Rasul Allah (Sallallahu Alaihi Wasallam) ne muqarrar ki thi. Aap (Sallallahu Alaihi Wasallam) ne farmaya ke jab kisi mal mein do aadmi sajhi hon to wo zakat mein ek doosre se barabar barabar mujra kar lein (yani zakat ki raqam aapas mein barabar taqseem kar lein)
.

Hum se Muhammad Bin Abdullah Ansari ne bayan kiya, kaha ke mujh se mere walid Abdullah ne bayan kiya, un se Sumama ne aur un se Anas (Radi Allahu Anhu) ne ke jab Abu Bakr (Radi Allahu Anhu) Khalifa hue to unhon ne un ko (yaani Anas Radi Allahu Anhu ko) Bahrain (aamil bana kar) bheja aur ek parwana likh kar un ko diya aur is par Nabi Kareem (Sallallahu Alaihi Wasallam) ki angoothi ki mohr lagayi, mohr mubarak par teen satrain kanda theen, ek satar mein "Muhammad" doosri mein "Rasul" teesri mein "Allah" kanda tha
.

Mujh se Abdullah Ansari ne bayan kiya, kaha ke mujh se mere walid Abdullah bin Musanna ne bayan kiya, in se Sumama bin Abdullah bin Anas ne aur in se Anas razi Allahu anhu ne ke Abu Bakr razi Allahu anhu jab khaleefa huay to unhon ne mujhko zakat ke masail likhwa diye aur angoothi (mohar) ka naqsh teen satron mein tha ek satar mein ”Muhammad“ doosri satar mein ”Rasool“ aur teesri satar mein ”Allah“.

`Hum se Muhammad bin Abdullah al-Ansari ne bayan kiya, kaha hum se hamare walid ne bayan kiya, kaha hum se Sumama bin Abdullah bin Anas ne bayan kiya, aur un se Anas bin Malik Radi Allahu Anhu ne bayan kiya ke Abu Bakr Radi Allahu Anhu ne unhein (Zakat) ka hukm nama likh kar bheja jo Rasul Allah صلی اللہ علیہ وسلم ne farz qarar diya tha ke mutafarriq sadqa ko ek jagah jama na kiya jaye aur na mujtami sadqa ko mutafarriq kiya jaye Zakat ke khauf se.

Hum se Muhammad bin Abdullah Ansari ne byaan kiya ‘ kaha ke mujh se mere walid ne byaan kiya ‘ kaha ke mujh se Sumamah ne byaan kiya ‘ aur un se Anas razi Allahu anhu ne byaan kiya ke Abu Bakr razi Allahu anhu ne unhein wahi cheez likhi thi jisay Rasool Allah salla Allahu alaihi wasallam ne zaroori qarar diya tha . Yeh ke zakat (ki zyada-ti) ke khauf se juda juda maal ko yakja aur yakja maal ko juda juda na kiya jaye .