Aur Ibn Tahman hi ne byaan kiya ke un se Hussain ne , un se Yahya bin Abi Kaseer ne , un se Hafs bin Ubaidullah bin Anas razi Allahu anhu ne aur un se Anas bin Malik razi Allahu anhu ne byaan kiya ke Nabi Karim salla Allahu alaihi wasallam safar mein maghrib aur isha aik saath mila kar parhte thay . Is riwayat ki mutabi'at Ali bin Mubarak aur Harb ne Yahya se ki hai . Yahya , Hafs se aur Hafs Anas razi Allahu anhu se riwayat karte hain ke Nabi Karim salla Allahu alaihi wasallam ne (maghrib aur isha) aik saath mila kar parhi thin .

Laith bin Saad ne is riwayat mein itna ziyada kiya ke mujh se Yunus ne Ibn Shihab se byaan kiya , ke Salim ne byaan kiya ke Ibn Umar razi Allahu anhuma Muzdalifah mein maghrib aur isha aik saath jama kar ke parhte thay . Salim ne kaha ke Ibn Umar razi Allahu anhuma ne maghrib ki namaaz us din der mein parhi thi jab unhen un ki biwi Safiyyah bint Abi Ubaid ki sakht bimari ki ittila mili thi (chalte huay) main ne kaha ke namaaz! (yani waqt khatam hua chahta hai) lekin aap ne farmaya ke chale chalo phir dobara main ne kaha ke namaaz! aap ne phir farmaya ke chale chalo is tarah jab hum do ya teen meel nikal gaye to aap utre aur namaaz parhi phir farmaya ke main ne khud dekha hai ke jab Nabi Karim salla Allahu alaihi wasallam safar mein tezi ke saath chalna chahte to isi tarah karte thay Abdullah bin Umar razi Allahu anhuma ne yeh bhi farmaya ke main ne khud dekha ke jab Nabi Karim salla Allahu alaihi wasallam (manzil-e-maqsood tak) jaldi pohanchna chahte to pehle maghrib ki takbeer kehlwate aur Aap is ki teen rakat parha kar salam pherte . Phir thori der thehar kar isha parhate aur is ki do hi rakat par salam pherte . Isha ke farz ke baad aap sunnaten waghaira nahi parhte thay aadhi raat ke baad kharay ho kar namaaz parhte .

Hum se Abul Yaman ne byaan kiya , kaha ke hamen Shu'aib ne Zuhri se khabar di , unhon ne kaha ke mujhe Salim ne Abdullah bin Umar razi Allahu anhuma se khabar di . Aap ne kaha ke Rasool Allah salla Allahu alaihi wasallam ko jab jaldi safar tey karna hota to maghrib ki namaaz mu'akhkhar kar dete . Phir use isha ke saath mila kar parhte thay . Salim ne byaan kiya ke Abdullah bin Umar razi Allahu anhuma bhi agar safar sur'at ke saath tey karna chahte to isi tarah karte thay . Maghrib ki takbeer pehle kahi jati aur aap teen rakat maghrib ki namaaz parh kar salam pher dete . Phir maamooli se tawaqquf ke baad isha ki takbeer kahi jati aur aap is ki do rakaten parh kar salam pher dete . Donon namazon ke darmiyan aik rakat bhi sunnat waghaira na parhte aur isi tarah isha ke baad bhi namaaz nahi parhte thay . Yahan tak ke darmiyan shab mein aap uthte (aur Tahajjud ada karte) .

Hum se Ishaq ne byaan kiya , unhon ne kaha ke hum se Abdus Samad bin Abdul Waris ne byaan kiya . Unhon ne kaha hum se Harb bin Shaddad ne byaan kiya , unhon ne kaha ke hum se Yahya bin Abi Kaseer ne byaan kiya , unhon ne kaha ke mujh se Hafs bin Ubaidullah bin Anas ne byaan kiya ke Anas razi Allahu anhu ne un se yeh byaan kiya ke Rasool Allah salla Allahu alaihi wasallam in do namazon yani maghrib aur isha ko safar mein aik saath mila kar parha karte thay .

Hum se Hassan Wasiti ne byaan kiya , unhon ne kaha ke hum se Mufaddal bin Fudalah ne byaan kiya , un se Aqeel ne byaan kiya , un se Ibn Shihab ne byaan kiya , un se Anas bin Malik razi Allahu anhu ne byaan kiya ke Nabi Karim salla Allahu alaihi wasallam agar sooraj dhalne se pehle safar shuru karte to zuhar ki namaaz asar tak na parhte phir zuhar aur asar aik saath parhte aur agar sooraj dhal chuka hota to pehle zuhar parh lete phir sawar hote .

Hum se Qutaibah bin Saeed ne byaan kiya , unhon ne kaha ke hum se Mufaddal bin Fudalah ne byaan kiya , un se Aqeel ne , un se Ibn Shihab ne aur un se Anas bin Malik razi Allahu anhu ne ke Rasool Allah salla Allahu alaihi wasallam jab sooraj dhalne se pehle safar shuru karte to zuhar asar ka waqt aane tak na parhte . Phir kahin (raaste mein) theharte aur zuhar aur asar mila kar parhte lekin agar safar shuru karne se pehle sooraj dhal chuka hota to pehle zuhar parhte phir sawar hote .

Hum se Saeed Bin Abi Maryam ne bayan kiya, unhon ne kaha hum ko Muhammad Bin Jafar ne khabar di, unhon ne kaha ke mujhe Zaid Bin Aslam ne khabar di, un se un ke baap ne bayan kiya ke mein Abdullah Bin Umar (Radi Allahu Anhuma) ke sath Makkah ke raste mein tha ke unhein (apni biwi) Safiyah Bint Abi Ubaid ki sakht bimari ki khabar mili aur wo nihayat tezi se chalne lage, phir jab surkhi ghuroob ho gayi to sawari se neeche utre aur Maghrib aur Isha ek sath mila kar parhin, is ke baad farmaya ke mein ne Rasul Allah (Sallallahu Alaihi Wasallam) ko dekha ke jab jaldi chalna hota to Maghrib mein dair kar ke donon (Isha aur Maghrib) ko ek sath mila kar parhte thay
.

Hum se Ahmad Bin Yunus ne bayan kiya, kaha hum se Zuhair ne bayan kiya, kaha hum se Humaid ne bayan kiya aur un se Anas Bin Malik (Radi Allahu Anhu) ne bayan kiya ke hum Nabi Kareem (Sallallahu Alaihi Wasallam) ki sath Ghazwah-e-Tabook se wapas hue
.

Hum se Saeed Bin Abi Maryam ne bayan kiya, kaha hum ko Muhammad Bin Jafar ne khabar di, kaha ke mujhe Zaid Bin Aslam ne khabar di, in se un ke walid ne bayan kiya ke mein ne Abdullah Bin Umar (Radi Allahu Anhuma) ke sath Makkah ke raste mein tha, itne mein un ko Safiyyah Bint Abi Ubaid (Radi Allahu Anha) (un ki biwi) ke mutalliq sakht bemari ki khabar mili. Chunancha Aap ne tez chalna shuru kar diya aur jab (sooraj ghuroob hone ke baad) shafaq doob gayi to Aap sawari se utre aur maghrib aur isha ki namaz mila kar parhi, phir kaha ke mein ne Nabi Kareem (Sallallahu Alaihi Wasallam) ko dekha ke jab Aap (Sallallahu Alaihi Wasallam) tezi ke sath safar karna chahte to maghrib mein takheer kar ke donon namazein (maghrib aur isha) ek sath ada farmate
.