`Hum se Mahmood bin Gailan ne bayan kiya, unhon ne kaha hum se Abdur Razzaq ne bayan kiya, kaha hum ko Ibn Jurayj ne khabar di, unhon ne mujh ko Sulaiman Ahwal ne khabar di, unhein Taus Yamani ne khabar di, unhon ne Abdullah bin Abbas Radi Allahu Anhuma se suna, unhon ne bayan kiya ke Nabi Kareem صلی اللہ علیہ وسلم jab raat mein tahajjud parhne uthte to kehte «Allahumma lakal hamdu Anta noorus-samawati wal-ardi, wa lakal hamdu Anta qayyumus-samawati wal-ardi, wa lakal hamdu Anta Rabbus-samawati wal-ardi wa man feehinna, Antal Haqqu, wa wa'dukal haqqu, wa qaulukal haqqu, wa liqa'ukal haqqu, wal-jannatu haqqun, wan-naru haqqun, wan-nabiyyoona haqqun, was-sa'atu haqqun. Allahumma laka aslamtu, wa bika aamantu, wa alaika tawakkaltu, wa ilaika anabtu, wa bika khasantu, wa ilaika hakamtu, fagfir lee ma qaddamtu wa ma akhartu, wa ma asrartu wa ma a'lantu, Anta Ilahi, la ilaha illa Anta» ”Hamd Tere hi liye hai ke Tu aasman o zameen ka noor hai, hamd Tere hi liye hai ke Tu aasman o zameen ka thamne wala hai, hamd Tere hi liye hai ke Tu aasman o zameen ka aur jo kuch is mein hai sab ka Rabb hai. Tu sach hai, Tera wa'da saccha hai aur Tera qaul saccha hai, Teri mulaqat sacchi hai, jannat sach hai aur dozakh sach hai, saare ambiya sacche hain aur qayamat sach hai. Ae Allah! mein Tere samne hi jhuka, Tujh par iman laya, Tujh par bharosa kiya, Teri hi taraf ruju kiya, Tere hi samne apna jhagda pesh karta aur Tujh hi se apna faisla chahta hoon, pas Tu meri magfirat kar de agle pichle tamam gunahon ki jo mein ne chhupa kar kiye aur jo zahir kiye, Tu hi mera mabood hai, Tere siwa aur koi mabood nahi.“