Aur Allah Ta'ala ne (Surah Bani Isra'il mein) farmaya aur raat ke aik hissa mein Tahajjud parh yeh aap (salla Allahu alaihi wasallam) ke liye ziyada hukum hai .

Hum se Ali bin Abdullah Madini ne byaan kiya , kaha ke hum se Sufyan bin Uyaynah ne byaan kiya , kaha ke hum se Sulaiman bin Abi Muslim ne byaan kiya , un se Taa'us ne aur unhon ne Ibn Abbas razi Allahu anhuma se suna ke Rasool Allah salla Allahu alaihi wasallam jab raat mein Tahajjud ke liye kharay hote to yeh dua parhte . «Allahumma lakal hamdu anta qayyumus samawaati wal ardi wa man feehinna wa lakal hamdu , laka mulkus samawaati wal ardi wa man feehinna , wa lakal hamdu anta noorus samawaati wal ardi , wa lakal hamdu antal haqqu , wa wa'dukal haqqu , wa liqaa'uka haqqun , wa qauluka haqqun , wal jannatu haqqun , wan naaru haqqun , wan nabiyyoona haqqun , wa Muhammadun sallallahu alaihi wasallama haqqun , was saa'atu haqqun , Allahumma laka aslamtu , wa bika aamantu wa alaika tawakkaltu , wa ilaika anabtu , wa bika khasamtu , wa ilaika hakamtu , faghfir li ma qaddamtu wa ma akhkhartu , wa ma asrartu wa ma a'lantu , antal muqaddimu wa antal mu'akhkhiru , la ilaha illa anta , la ilaha ghairuka» (Tarjuma) ”Aye mere Allah! har tarah ki tareef tere hi liye zeba hai , tu aasmaan aur zameen aur un mein rehne wali tamam makhlooq ka sambhalne wala hai aur hamd tamam ki tamam bas tere hi liye munasib hai aasmaan aur zameen aur un ki tamam makhlooqat par hukoomat sirf tere hi liye hai aur tareef tere hi liye hai , tu aasmaan aur zameen ka noor hai aur tareef tere hi liye zeba hai , tu saccha hai , tera wa'dah saccha , teri mulaqat sacchi , tera farmaan saccha hai , Jannat sach hai , Dozakh sach hai , Ambiya sacche hain . Muhammad salla Allahu alaihi wasallam sacche hain aur Qayamah ka hona sach hai . Aye mere Allah! main tera hi farmaan bardaar hoon aur tujhi par imaan rakhta hoon , tujhi par bharosa hai , teri hi taraf rujoo karta hoon , tere hi ata kiye huay dalail ke zariye behas karta hoon aur tujhi ko hakam banata hoon . Pas jo khatan mujh se pehle huin aur jo baad mein hon gi un sab ki maghfirat farma , khwah woh zahir hui hon ya posheeda . Aage karne wala aur peeche rakhne wala tu hi hai . Ma'bood sirf tu hi hai . Ya (yeh kaha ke) tere siwa koi ma'bood nahi“ . Abu Sufyan ne byaan kiya ke Abdul Karim Abu Umayyah ne is dua mein yeh ziyadati ki hai ( «la hawla wa la quwwata illa billah») Sufyan ne byaan kiya ke Sulaiman bin Muslim ne Taa'us se yeh hadees suni thi , unhon ne Abdullah bin Abbas razi Allahu anhuma se aur unhon ne Nabi Karim salla Allahu alaihi wasallam se .