Jaisa ke irshad e Bari Ta'ala hai (Surah Bani Israeel mein) «wa laa taq-fu, laa taqul, maa laisa laka bi-hee ilmun» yani ”na kaho woh baat jis ka tum ko ilm na ho.“

Hum se Saeed bin Tulayd ne bayan kiya, kaha mujh se Abdullah bin Wahb ne, kaha mujh se Abd-ul-Rahman bin Shuraih aur in ke alawa Ibn Laya ne bayan kiya, in se Abu al-Aswad ne aur in se Urwah ne bayan kiya ke Abdullah bin Amr bin al-Aas razi Allahu anhu ne hamain le kar Hajj kiya to main ne unhein yeh kehte suna ke main ne Nabi Karim salla Allahu alaihi wasallam se suna, Aap salla Allahu alaihi wasallam ne farmaya ke Allah Ta'ala ilm ko, is ke baad ke tumhein diya hai ek dam se nahi utha le ga balkay usay is tarah khatm kare ga ke ulama ko in ke ilm ke saath utha le ga phir kuch jahil log baqi reh jayein ge, in se fatwa poochha jaye ga aur woh fatwa apni rai ke mutabiq dein ge. Pas woh logon ko gumrah karein ge aur woh khud bhi gumrah hon ge. Phir main ne yeh hadees Nabi Karim salla Allahu alaihi wasallam ki zauja mutahhara Aisha razi Allahu anha se bayan kiya. In ke baad Abdullah bin Umar razi Allahu anhuma ne dobara Hajj kiya to Umm al-Momineen ne mujh se kaha ke bhateejay Abdullah ke paas jao aur meere liye is hadees ko sun kar khoob mazboot kar lo jo hadees tum ne mujh se in ke wasta se bayan ki thi. Chunanche main in ke paas aaya aur main ne in se poochha to unhon ne mujh se woh hadees bayan ki, isi tarah jaisa ke woh pehle mujh se bayan kar chuke thay, phir main Aisha razi Allahu anha ke paas aaya aur unhein is ki khabar di to unhein taj-jub hua aur bolein ke wallah Abdullah bin Amr ne khoob yaad rakkha.