Aur (khalifa-e-khaamis) Umar bin Abdul ’Aziz ne Abu Bakr bin Hazm ko likha ke tumhaare paas Rasoolullah Sallallahu Alaihi Wasallam ki jitni bhi Hadeesein hon, un par nazar karo aur unhein likh lo, kiunki mujhe ilm-e-deen ke mitne aur ulama-e-deen ke khatm ho jaane ka andeesha hai aur Rasoolullah Sallallahu Alaihi Wasallam ke siwa kisi ki Hadees qabool na karo aur logon ko chaahiye ke ilm phailaayen aur (ek jagah jam kar) baithen taake jaahil bhi jaan le aur ilm chupane hi se zaaye’ hota hai. Hum se ’Alaa bin Abdul Jabbar ne bayan kiya, unhon ne kaha hum se Abdul ’Aziz bin Muslim ne Abdullah bin Dinaar ke waaste se is ko bayan kiya yani Umar bin Abdul ’Aziz ki Hadees «ذَهَابَ الْعُلَمَاءِ» tak.

Hum se Ismail bin Abi Owais ne bayan kiya, un se Malik ne Hishaam bin ’Urwah se, unhon ne apne baap se naql kiya, unhon ne Abdullah bin ’Amr bin Al-’Aas Radhiallahu Anhuma se naql kiya ke main ne Rasoolullah Sallallahu Alaihi Wasallam se suna Aap Sallallahu Alaihi Wasallam farmaate the ke Allah ilm ko is tarah nahi utha lega ke us ko bandon se cheen le. Balke woh (pukhtakaar) ulama ko maut de kar ilm ko uthaayega. Hatta ke jab koi aalim baaqi nahi rahega to log jaahilon ko sardaar bana lenge, un se sawaalaat kiye jaayenge aur woh baghair ilm ke jawaab denge. Is liye khud bhi gumraah honge aur logon ko bhi gumraah karenge. Firabri ne kaha hum se Abbas ne bayan kiya, kaha hum se Qutaibah ne, kaha hum se Jareer ne, unhon ne Hishaam se maanind is Hadees ke.