`Hum se Ali bin Abdullah Madini ne bayan kiya ‘ unhon ne kaha hum se Sufyan bin Uyaina ne bayan kiya ‘ un se Ibrahim bin Maisara ne bayan kiya ‘ unhon ne Amr bin Shareed se suna ‘ unhon ne bayan kiya ke Miswar bin Makhrama Radi Allahu Anhu aaye aur unhon ne mere mondhe par apna haath rakkha phir mein un ke saath Saad bin Abi Waqas Radi Allahu Anhu ke yahan gaya to Abu Rafi' ne is par kaha ke is ka chaar sau se zyada mein nahi de sakta aur wo bhi qiston mein doon ga. Is par unhon ne jawab diya ke mujhe to is ke paanch sau naqd mil rahe thay aur mein ne inkar kar diya. Agar mein ne Rasul Allah صلی اللہ علیہ وسلم se yeh na suna hota ke padosi zyada mustahiq hai to mein ise tumhein na bechta. Ali bin Abdullah Madini ne kaha mein ne Sufyan bin Uyaina se is par poocha ke Ma'mar ne is tarah nahi bayan kiya hai. Sufyan ne kaha ke lekin mujh se to Ibrahim bin Maisara ne yeh hadees isi tarah naql ki. Aur baaz log kehte hain ke agar koi shakhs chahe ke shafee' ko haqq-e-shufa' na de to ise heela karne ki ijazat hai aur heela yeh hai ke jayidad ka malik khareedar ko wo jayidad hiba kar de phir khareedar yaani muhoob-lah is hiba ke muawaza mein malik-e-jayidad ko hazar dirham maslan hiba kar de is surat mein shafee' ko shufa' ka haqq na rahe ga.