(Surah al-Nahl mein Allah Ta'ala ka irshad hai) «wa maa amrus-saa-ati illaa kalamhil-basari au huwa aqrabu innallaaha alaa kulli shay-in qadeer» ”aur Qayamat ka muamla to bas aankh jhapkne ki tarah hai ya woh is se bhi jald hai beshak Allah har cheez par qudrat rakhne wala hai .“

Hum se Saeed bin Abi Maryam ne bayan kiya , kaha hum se Abu Ghassan ne bayan kiya , kaha hum se Abu Hazim ne bayan kiya , in se Sahl razi Allahu anhu ne bayan kiya ke Rasool Allah salla Allahu alaihi wasallam ne farmaya ”main aur Qayamat itne nazdeek nazdeek bheje gaye hain aur Nabi Karim salla Allahu alaihi wasallam ne apni do ungliyon ke isharah se (is nazdeeki ko) bataya phir in donon ko phailaya .“