Mujh se Muhammad bin Usman ne bayan kiya , kaha hum se Khalid bin Makhlad ne , kaha hum se Sulayman bin Bilal ne , in se Shareek bin Abdullah bin Abi Namr ne , in se Ata ne aur in se Abu Hurairah razi Allahu anhu ne bayan kiya ke Rasool Allah salla Allahu alaihi wasallam ne farmaya ”Allah Ta'ala farmata hai ke jis ne mere kisi wali se dushmani ki usay meri taraf se elaan e jang hai aur mera banda jin jin ibadaton se mera qurb haasil karta hai aur koi ibadat mujhko is se zyada pasand nahi hai jo main ne is par farz ki hai (yani faraiz mujhko bahut pasand hain jaise namaz , roza , Hajj , zakat) aur mera banda farz ada karne ke baad nafl ibadatein kar ke mujh se itna nazdeek ho jata hai ke main is se mohabbat karne lag jata hoon . Phir jab main is se mohabbat karne lag jata hoon to main is ka kaan ban jata hoon jis se woh sunta hai , is ki aankh ban jata hoon jis se woh dekhta hai , is ka hath ban jata hoon jis se woh pakarta hai , is ka paon ban jata hoon jis se woh chalta hai aur agar woh mujh se maangta hai to main usay deta hoon agar woh kisi dushman ya shaytan se meri panah maangta hai to main usay mahfooz rakkhta hoon aur main jo kaam karna chahta hoon is mein mujhe itna tarad-dud nahi hota jitna ke mujhe apne momin bande ki jaan nikaalne mein hota hai . Woh to maut ko baje takleef jismani ke pasand nahi karta aur mujhko bhi usay takleef dena bura lagta hai .“