Hum se Malik bin Ismail ne bayan kiya, kaha hum se Zuhayr ne bayan kiya, kaha hum se Hisham bin Urwah ne, unhein Urwah ne khabar di, unhein Zaynub bint Abi Salamah razi Allahu anha ne khabar di aur unhein Umm Salamah razi Allahu anha ne khabar di ke Nabi Karim salla Allahu alaihi wasallam in ke paas tashreef rakhte thay. Ghar mein ek mukhan-nas bhi tha, us ne Umm Salamah razi Allahu anhuma ke bhai Abdullah razi Allahu anhu se kaha Abdullah! Agar kal tumhein Taif par fatah haasil ho jaye to main tumhein bint Ghaylan (Badiya naami) ko dikhlaoon ga woh jab samne aati hai to (is ke motapay ki wajah se) char salwatein dikhayi deti hain aur jab peeth pheerti hai to aath salwatein dikhayi deti hain. Nabi Karim salla Allahu alaihi wasallam ne farmaya ke ab yeh shakhs tum logon ke paas na aaya kare. Abu Abdullah (Imam Bukhari rahmahullah) ne kaha ke samne se char salwaton ka matlab yeh hai ke (motay hone ki wajah se) is ke pait mein char salwatein pari hui hain aur jab woh samne aati hai to woh dikhayi deti hain aur aath salwaton se peeche phirti hai ka mafhoom hai (aage ki) in charon salwaton ke kinare kyunke yeh donon pehluon ko ghere huay hote hain aur phir woh mil jati hain aur hadees mein «bi-samani» ka lafz hai haalan ke az ro-e qaida e nahv ke «bi-samaniyatin» hona tha kyunke murad aath atraf yani kinare hain aur «al-atraf» , «taraf» ki jama hai aur «taraf» ka lafz muzakkar hai. Magar kyunke «al-atraf» ka lafz mazkoor na tha is liye «bi-samani» bhi kehna durust hua.