Hum se Ubaid bin Ismail ne bayan kiya, kaha hum se Abu Usamah ne bayan kiya, in se Hisham bin Urwah ne, in se un ke walid ne aur in se Aisha razi Allahu anha ne bayan kiya ke Rasool Allah salla Allahu alaihi wasallam par jadoo kar diya gaya tha aur is ka asar yeh tha ke Aap ko khayal hota ke Aap koi cheez kar chuke hain haalan ke woh cheez na ki hoti ek din Nabi Karim salla Allahu alaihi wasallam mere yahan tashreef rakhte thay aur musalsal duaein kar rahe thay, phir farmaya: Aisha! Tumhein maloom hai Allah Ta'ala se jo baat main ne poochhi ku is ka jawab us ne mujhe de diya hai. Main ne arz ki woh kiya baat hai ya Rasool Allah! Aap salla Allahu alaihi wasallam ne farmaya mere paas do farishte (Jibrail wa Mikaeel alaihim-as-salam) aaye aur ek mere sar ke paas khara ho gaya aur doosra paon ki taraf phir ek ne apne doosre saathi se kaha in sahab ki takleef kya hai? Doosre ne jawab diya ke in par jadoo kiya gaya hai. Poochha kis ne in par jadoo kiya hai? Farmaya Bani Zurayq ke Labeed bin Aasam Yahudi ne, poochha kis cheez mein? Jawab diya ke kanghay aur baal mein jo nar khajoor ke khoushay mein rakkha hua hai. Poochha aur woh jadoo rakkha kahan hai? Jawab diya ke Zarwan ke kunwien mein. Bayan kiya ke phir Nabi Karim salla Allahu alaihi wasallam apne chand sahabah ke saath is kunwien par tashreef le gaye aur usay dekha wahan khajoor ke darakht bhi thay phir Aap wapas Aisha razi Allahu anha ke yahan tashreef laaye aur farmaya salla Allahu alaihi wasallam Allah ki qasam! Is ka pani mehndi ke arq jaisa (surkh) hai aur is ke khajoor ke darakht shayaateen ke saron jaise hain. Main ne arz kiya: ya Rasool Allah! Woh kanghi baal waghaira ghilaf se niklowaye ya nahi. Aap salla Allahu alaihi wasallam ne farmaya nahi, sun lo Allah ne to mujhko shifa de di, tandurust kar diya ab main dara kahin logon mein ek shor na phaile aur Nabi Karim salla Allahu alaihi wasallam ne is saman ke gaarr dene ka hukm diya woh gaarr diya gaya.