Aur Allah ne (Surah al-Baqarah) mein farmaya «wayas-aloounaka maazha yunfiqoona qul-il-afwa kazaalika yubay-yinullahu lakum-ul-aayaati la-allakum tata-fakkaroona * fid-duniya wal aakhirati» ke ”Ae Paighambar! Tujh se poochte hain kiya kharch karein ? Keh do jo bach rahe . Allah isi tarah dene ka hukm tum se byaan karta hai is liye ke tum duniya aur aakhirat donon ke kaamon ki fikr karo .“

Aur Imam Hasan Basri ne kaha is aayat mein «afwu» se woh maal murad hai jo zaroori kharch ke baad bach rahe .

Hum se Adam bin Abi Iyas ne byaan kiya , kaha hum se Shubah ne byaan kiya , in se Adi bin Sabit ne byaan kiya kaha main ne Abdullah bin Yazid Ansari se suna aur unhon ne Abu Masood Ansari razi Allahu anhu se (Abdullah bin Yazid Ansari ne byaan kiya ke) main ne in se poocha kiya tum is hadees ko Nabi Karim salla Allahu alaihi wasallam se riwayat karte ho . Unhon ne kaha ke ji haan , Nabi Karim salla Allahu alaihi wasallam se ke Aap salla Allahu alaihi wasallam ne farmaya ke jab Musalman apne ghar mein apne joru baal bachon par Allah ka hukm ada karne ki niyat se kharch kare to is mein bhi is ko sadqe ka sawab milta hai .