Hum se Abdullah bin Zubayr Humaydi ne byaan kiya, unhon ne kaha hum se Sufyan bin Uyaynah ne byaan kiya, unhon ne kaha ke hum ne yeh hadees Amr bin Dinar se yaad ki, unhon ne byaan kiya ke main ne Jabir bin Abdullah razi Allahu anhuma se suna, woh byaan karte thay ke hum ek ghazwa mein thay, achanaak Muhajireen ke ek aadmi ne Ansari ke ek aadmi ko maar diya. Ansar ne kaha: Ae Ansario! Dauro aur Muhajir ne kaha: Ae Muhajireen! Dauro. Allah Ta'ala ne yeh apne Rasool salla Allahu alaihi wasallam ko bhi sunaya. Nabi Karim salla Allahu alaihi wasallam ne daryaft farmaya kya baat hai? Logon ne bataya ke ek Muhajir ne ek Ansari ko maar diya hai. Is par Ansari ne kaha ke Ae Ansario! Dauro aur Muhajir ne kaha ke Ae Muhajireen! Dauro. Nabi Karim salla Allahu alaihi wasallam ne farmaya is tarah pukarna chhor do ke yeh nihayat na-paak baatein hain. Jabir razi Allahu anhu ne byaan kiya ke jab Nabi Karim salla Allahu alaihi wasallam Madinah tashreef laye to shuru mein Ansar ki tadaad zyada thi lekin baad mein Muhajireen zyada ho gaye thay. Abdullah bin Ubayy ne kaha achha ab naubat yahan tak pahunch gayi hai. Allah ki qasam! Madinah wapas ho kar izzat wale zaleelon ko bahar nikal dein ge. Umar bin Khattab razi Allahu anhu ne kaha: ya Rasool Allah! Ijazat ho to is munafiq ki gardan ura doon. To Nabi Karim salla Allahu alaihi wasallam ne farmaya ke nahi warna log yun kahein ge Muhammad (salla Allahu alaihi wasallam) apne sathiyon ko qatl karane lage hain.