Hum se Muhammad Bin Salam ne bayan kiya, kaha hum ko Makhlad Bin Yazid ne khabar di, kaha humein Ibn Juraij ne khabar di, kaha ke mujhe Amr Bin Dinar ne khabar di aur unhon ne Jabir (Radi Allahu Anhu) se suna ke hum Nabi Kareem (Sallallahu Alaihi Wasallam) ke sath jihad mein shareek thay, Muhajireen bari tadad mein Aap (Sallallahu Alaihi Wasallam) ke pas jama ho gaye. Wajah ye hui ke Muhajireen mein ek sahab thay bare dil-lagi karne wale, unhon ne ek Ansari ke sureen par zarb lagayi, Ansari bahut sakht ghussa hua. Is ne apni biradri walon ko madad ke liye pukara aur naubat yahan tak pahunchi ke in logon ne yani Ansari ne kaha: Ae qabail-e-Ansar! Madad ko pahuncho! Aur Muhajir ne kaha: Ae Muhajireen! Madad ko pahuncho! Ye ghul sun kar Nabi Kareem (Sallallahu Alaihi Wasallam) (khima se) bahar tashreef laye aur farmaya: Kya baat hai? Ye Jahilliyat ki pukar kaisi hai? Aap (Sallallahu Alaihi Wasallam) ke surat-e-haal daryaft karne par Muhajir sahabi ke Ansari sahabi ko maar dene ka waqia bayan kiya gaya to Aap (Sallallahu Alaihi Wasallam) ne farmaya ke aaisi Jahilliyat ki na-paak baatein chor do aur Abdullah Bin Ubayy Salool (munafiq) ne kaha ke ye Muhajireen ab hamare khilaf apni qoum walon ki duhayi dene lage. Madinah pahunch kar hum samajh lein ge, izzat dar zaleel ko yaqeenan nikal bahar kare ga. Umar (Radi Allahu Anhu) ne ijazat chahi ya Rasul Allah! Hum is na-paak paleed Abdullah Bin Ubayy ko qatl kyun na kar dein? Lekin Aap (Sallallahu Alaihi Wasallam) ne farmaya ke aisa na hona chahiye ke log kahein ke Muhammad (Sallallahu Alaihi Wasallam) apne logon ko qatl kar diya karte hain
.