‏‏‏‏ (Note: Is baab mein hadees nahi hai)

‏‏‏‏ «raj-un baeedun» yani duniya ki taraf phir jana door az qiyas hai . «furoojan» ke maani surakh rauzan , «farjun» ki jama hai . «wareedun» halaq ki ragg . Aur «jabalun» mondhay ki ragg . Mujahid ne kaha «ma tanqus-ul-ardu» se un ki hadiyan murad hain jin ko zameen kha jati hai . «tabsiratan» ke maani raah dikhana . «habbal haseedi» gehoon ke dane . «baasiqaatun» lambi lambi baal . «afa-ayeena» kya hum is se aajiz ho gaye hain . «qaala qareenuhu» mein «qareenun» se Shaytan (ham-zaad) murad hai jo har aadmi ke saath laga hua hai . «fanaqqaboo fil biladi» yani shehron mein phire , daura kiya . «au alqas-sama» ka yeh matlab hai ke dilli mein doosra kuch khayal na kare , kaan laga kar sune . «afa-ayeena bil-khalq-il-awwali» yani jab tum ko shuru mein paida kiya to kya is ke baad hum aajiz ban gaye ab dobara paida nahi kar sakte ? «sa'iqun» aur «shaheedun» do farishte hain ek likhne wala doosra gawah . «shaheedun» se murad yeh hai ke dil laga kar sune . «lughoobun» thakan . Mujahid ke siwa auron ne kaha «nadeedun» woh gaabha hai , jab tak woh patton ke ghilaf mein chhupa rahe . «nadeedun» is ko is liye kehte hain ke woh tah-ba-tah hota hai jab darakht ka gaabha ghilaf se nikal aaye to phir is ko «nadeedun» nahi kahein ge . «adbar-an-nujoomi» (jo Surah at-Toor mein hai) aur «adbar-as-sujoodi» jo is surat mein hai . To Aasim Surah Qaaf mein ( «adbara» ko) ba-fataha alif aur Surah at-Toor mein ba-kasra alif parhte hain . Baazon ne donon jagah ba-kasra alif parha hai baazon ne donon jagah ba-fataha alif parha hai . Ibn Abbas razi Allahu anhuma ne kaha «yawm-ul-khurooji» se woh din murad hai jis din qabron se niklein ge .

Hum se Abdullah bin Abi al-Aswad ne byaan kiya , kaha hum se Harami ne byaan kiya , kaha hum se Shubah ne byaan kiya , un se Qatadah ne aur un se Anas razi Allahu anhu ne ke Nabi Karim salla Allahu alaihi wasallam ne farmaya ke jahannum mein dozakhiyon ko dala jaye ga aur woh kahe gi «hal mim mazeedin» ke kuch aur bhi hai ? Yahan tak ke Allah Rabb al-Izzat apna qadam is par rakkhe ga aur woh kahe gi ke bas bas .