Aur Ibrahim Taimi (waa’iz) ne kaha main ne apne guftaar aur kirdaar ko jab milaaya, to mujh ko darr huwa ke kahin main Shari’at ke jhultaane waale (kaafiron) se na ho jaaon aur Ibn-e-Abi Mulaikah ne kaha ke main Nabi Akram Sallallahu Alaihi Wasallam ke tees sahaba se mila, un mein se har ek ko apne upar nifaaq ka darr laga huwa tha, un mein koi yun nahi kehta tha ke mera imaan Jibrael o Mikaail ke imaan jaisa hai aur Hasan Basri se manqool hai, nifaaq se wahi darta hai jo imaandaar hota hai aur us se nidar wahi hota hai jo munafiq hai. Is baab mein aapas ki ladaayi aur gunaahon par ade rahne aur taubah na karne se bhi daraaya gaya hai. Kiunki Allah paak ne Surah Aal-e-Imran mein farmaaya: "Aur apne bure kaamon par jaan boojh kar woh ada nahi karte".

Hum se Muhammed bin ’Ar’arah ne bayan kiya, woh kehte hain ke hum se Sho’bah ne bayan kiya, unhon ne Zubaid bin Haarith se, kaha main ne Abu Waail se Murjiyah ke baare main poocha, (woh kehte hain gunaah se aadmi faasiq nahi hota) unhon ne kaha ke mujh se Abdullah bin Mas’ood Radhiallahu Anhu ne bayan kiya ke Nabi Kareem Sallallahu Alaihi Wasallam ne farmaaya ke musalmaan ko gaali dene se aadmi faasiq ho jaata hai aur musalmaan se ladna kufr hai.