Mujh se Abdullah bin Muneer ne byaan kiya , kaha ke main ne Abdullah bin Bakr Sahmi se suna , un se Humayd ne byaan kiya aur un se Anas razi Allahu anhu ne ke meri phoopi Rubayyi ne ek larki ke daant torr diye , phir is larki se logon ne maafi ki darkhwast ki lekin is larki ke qabile wale maafi dene ko tayyar nahi huay aur Rasool Allah salla Allahu alaihi wasallam ki khidmat mein hazir huay aur qisas ke siwa aur kisi cheez par raazi nahi thay . Chunanche Aap salla Allahu alaihi wasallam ne qisas ka hukm de diya . Is par Anas bin Nadr razi Allahu anhu ne arz kiya: ya Rasool Allah! Kya Rubayyi razi Allahu anha ke daant torr diye jayein ge , nahi , is zaat ki qasam jis ne Aap ko haq ke saath maboos kiya hai , un ke daant na torey jayein ge . Is par Aap salla Allahu alaihi wasallam ne farmaya ke Anas! Kitab Allah ka hukm qisas ka hi hai . Phir larki wale raazi ho gaye aur unhon ne maaf kar diya . Is par Aap salla Allahu alaihi wasallam ne farmaya ke kuch Allah ke bande aise hain ke agar woh Allah ka naam le kar qasam khayein to Allah un ki qasam poori kar hi deta hai .