Hum se Qutaiba bin Saeed ne bayan kiya , kaha hum se Abdul Aziz bin Abi Hazim ne bayan kiya , unhon ne apne walid Abu Hazim Sahl bin Dinar se , unhon ne Sahl bin Saad raziyallahu anhu se ke Rasool Allah salla Allahu alaihi wa sallam Fatima raziyallahu anha ke ghar tashreef laye dekha ke Ali raziyallahu anhu ghar mein mojood nahi hain . Aap salla Allahu alaihi wa sallam ne darayaf farmaya ke tumhare chacha ke bete kahan hain ? Unhon ne bataya ke mere aur un ke darmiyan kuch nagawari pesh aa gayi aur woh mujh par khafa ho kar kahin bahar chale gaye hain aur mere yahan qailoola bhi nahi kiya hai . Is ke baad Rasool Allah salla Allahu alaihi wa sallam ne ek shakhs se kaha ke Ali raziyallahu anhu ko talash karo ke kahan hain ? Woh aaye aur bataya ke masjid mein soye hue hain . Phir Nabi Karim salla Allahu alaihi wa sallam tashreef laye . Ali raziyallahu anhu lete hue thay , chadar aap salla Allahu alaihi wa sallam ke pehlu se gir gayi thi aur jism par mitti lag gayi thi . Rasool Allah salla Allahu alaihi wa sallam jism se dhool jhar rahe thay aur farma rahe thay utho Abu Turab utho .